ຫາລື ແກ້ໄຂບັນຫາລາຄາສິນຄ້າ-ຄ່າບໍລິການໄລຍະສັ້ນ ແລະ ໄລຍະຍາວ

ວັນທີ 12 ກໍລະກົດ 2022, ກະຊວງອຸດສາຫະກໍາ ແລະ ການຄ້າ (ກົມການຄ້າພາຍໃນ) ໄດ້ຈັດກອງປະຊຸມປຶກສາຫາລື, ແລກປ່ຽນຄວາມຄິດເຫັນ ແລະ ຄວາມເປັນເອກະພາບ ກ່ຽວກັບວິທີທາງແກ້ໄຂບັນຫາລາຄາສິນຄ້າ ແລະ ຄ່າບໍລິການ ບາງລາຍການສິນຄ້າທີ່ຈໍາເປັນທີ່ມີລາຄາເພີ່ມຂຶ້ນສູງໃນປະຈຸບັນ ໂດຍການເປັນປະທານຂອງ ທ່ານ ພູວຽງ ພົງສາ ຫົວໜ້າກົມການຄ້າພາຍໃນ, ມີບັນດາທ່ານຮອງຫົວໜ້າກົມ, ຄະນະພະແນກພາຍໃນກົມການຄ້າພາຍໃນ ແລະ ບັນດາພະແນກອຸດສາຫະກຳ ແລະ ການຄ້າແຂວງ/ນະຄອນຫຼວງວຽງຈັນ ໃນຂອບເຂດທົ່ວປະເທດ (ຜ່ານລະບົບທາງໄກ).

ກອງປະຊຸມ ຕົກລົງສະເໜີວິທີແກ້ໄຂ ທີ່ຕິດພັນກັບພາລະບົດບາດຂອງຂະແໜງອຸດສາຫະກໍາ ແລະ ການຄ້າ ໃນຮູບແບບໄລຍະສັ້ນ ແລະ ໄລຍະຍາວ,ດັ່ງນີ້:

• ໄລຍະສັ້ນ
1) ຄິດໄລ່ໂຄງປະກອບລາຄາ ສິນຄ້າປະເພດຄວບຄຸມທີ່ຍັງບໍ່ທັນໄດ້ກຳນົດໂຄງປະກອບລາຄາ ລວມໄປເຖິງບາງລາຍການສິນຄ້າທີ່ີບໍ່ນອນຢູ່ໃນບັນຊີຄວບຄຸມ ແຕ່ມີການເໜັງຕີງເພີ່ມຂຶ້ນສູງ ແລະ ຕໍ່ເນື່ອງຫຼາຍເດືອນ ທີ່ອາດສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ.

2) ສືບຕໍ່ການຈັດຕັ້ງປະຕິບັດ ແຈ້ງການສະບັບເລກທີ 0519/ກຄພນ, ລົງວັນທີ 17 ມີຖຸນາ 2022 ວ່າດ້ວຍການລົງຕິດ ຕາມ, ກວດກາ ການຈໍລະຈອນນໍ້າມັນເຊື້ອໄຟຈາກສາງປໍ້ານໍ້າມັນເຊື້ອໄຟ ແລະ ແຈ້ງການ ສະບັບເລກທີ 0768/ອຄ, ລົງວັນທີ 17 ມິຖຸນາ 2022 ວ່າດ້ວຍການຕິດຕາມ, ກວດກາການແຈກຢາຍສິນຄ້າອຸປະໂພກ-ບໍລິໂພກ.

3) ສືບຕໍ່ການຈັດຕັ້ງປະຕິບັດກົນໄກ, ມາດຕະການ ແລະ ລະບຽບການຕ່າງໆຂອງຄະນະຄຸ້ມຄອງລາຄາສິນຄ້າ ແລະ ຄ່າບໍລິການ (ຄະນະ 71/ນຍ ຫຼື ຄະນະຍ່ອຍຂອງແຂວງ ແລະ ນະຄອນຫຼວງ) ຜ່ານມາເປັນຄືແນວໃດ ເພື່ອຄຸ້ມຄອງລາຄາສິນຄ້າ ແລະ ຄ່າບໍລິການ ທີ່ມີຫຼາຍພາກສ່ວນ ຫຼື ຂະແໜງການຕ່າງໆກ່ຽວຂ້ອງຮັບຜິດຊອບ;

4) ການມີສ່ວນຮ່ວມຜ່ານມາໃນການຈັດຕັ້ງປະຕິບັດວຽກງານຊຸກຍູ້ສົ່ງເສີມການຜະລິດພາຍໃນຢ່າງແຂງແຮງ, ຄຸ້ມຄອງການນຳເຂົ້າ-ສົ່ງອອກ ຂອງຄະນະ 99/ນຍ ໃຫ້ເປັນຮູບປະທຳ ເພື່ອແກ້ໄຂການສະໜອງສິນຄ້າທີ່ຜະລິດໄດ້ພາຍໃນທົດແທນສິນຄ້ານຳເຂົ້າໃຫ້ນັບມື້ນັບຫຼາຍຂຶ້ນ ໃນລາຄາ ແລະ ຄຸນນະພາບໃກ້ຄຽງກັນ;

5) ຊຸກຍູ້ ແລະ ສົ່ງເສີມການສົ່ງອອກຢ່າງແຂງແຮງສໍາລັບສິນຄ້າທີ່ປະເທດມີທ່າແຮງ ແລະ ສິນຄ້າໃໝ່ທີ່ມີຕະຫຼາດຮອງຮັບ ໂດຍການແກ້ໄຂຂັ້ນຂອດທີ່ສ້າງຕົ້ນທຶນທີ່ບໍ່ຈໍາເປັນຕໍ່ພາກທຸລະກິດ; ນອກນັ້ນ ກຳນົດນະໂຍບາຍທາງດ້ານອາກອນທີ່ເໝາະສົມ, ສ້າງ ແລະ ອໍານວຍຄວາມສະດວກໃຫ້ແກ່ລະບົບຂົນສົ່ງ ແລະ ຄ່ຽນຖ່າຍສິນຄ້າມີປະສິດທິພາບສາມາດຫຼຸດຜ່ອນຕົ້ນທຶນຂົນສົ່ງທັງພາຍໃນ ແລະ ຕ່າງປະເທດ.

6) ການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ ໂດຍສະເພາະ ການຊີ້ແຈງ ແລະ ແກ້ໄຂຄຳຮ້ອງທຸກຜ່ານສາຍດ່ວນ 1510 ໃນຂອບເຂດທົ່ວປະເທດ ໃຫ້ສອດຄ່ອງກັບສະພາບຕົວຈິງ, ສະຫຼຸບສັງລວມ, ຕິລາຄາ ລາຍງານຂັ້ນເທິງຊາບ ແລະ ມີທິດຊີ້ນໍາ ເປັນແຕ່ລະໄລຍະ.

7) ການຈັດຕັ້ງປະຕິບັດວຽກງານແຂ່ງຂັນທາງທຸລະກິດໂດຍສະເພາະການ ເຜີຍແຜ່, ແລກປ່ຽນ ກ່ຽວກັບການປະຕິ ບັດການແຂ່ງຂັນທີ່ບໍ່ເປັນທໍາ ເພື່ອຊ່ວຍຜູ້ດຳເນີນທຸລະກິດທີ່ຖືກຜົນກະທົບຈາກພຶດຕິກໍາຜິດກົດໝາຍແຂ່ງຂັນທາງທຸລະກິດ.

8) ການລົງຕິດຕາມກວດກາ, ການອາຢັດ, ການປັບໃໝ, ທໍາລາຍສິນຄ້າ ຜ່ານມາມີຄືແນວໃດ ນອກນັ້ນການຕິດ ຕາມກວດກາສິນຄ້າຈໍາເປັນໃນສາງຂອງບັນດາບໍລິສັດນໍ້າເຂົ້າ ມີການສັ່ງຊື້ສິນຄ້າເຂົ້າ-ອອກ ແລະ ຍັງເຫຼືອ ເພື່ອ ຈໍາໜ່າຍພາຍໃນເປັນຄືແນວໃດ ເພາະຕິດພັນກັບການກຸ້ມການສະໜອງໃນໄລຍະເວລາໃດໜຶ່ງ, ການກໍານົດລາຄາຂາຍຍົກ ຕິດພັນກັບອັດຕາແລກປ່ຽນ ແລະ ຕົ້ນທຶນ, ການກັກຕຸນ ຫຼື ເກງກໍາໄລ ເຫຼົ່ານີ້ເປັນຕົ້ນ.

• ໄລຍະຍາວ
1) ປັບປຸງ ແລະ ສ້າງຄວາມເຂັ້ມແຂງໃຫ້ລັດວິສາຫະກິດໃຫ້ກາຍເປັນຫົວໜ່ວຍວິສາຫະກິດນໍາໜ້າທີ່ສາມາດຂຸດຄົ້ນແຫຼ່ງລາຍຮັບເປັນເງິນຕາຕ່າງປະເທດຢ່າງແທ້ຈິງ.

2) ຊຸກຍູ້, ສົ່ງເສີມ ແລະ ຄຸ້ມຄອງການຜະລິດພາຍໃນໃຫ້ເຂັ້ມແຂງ ສາມາດຜະລິດ ແລະ ສະໜອງສິນຄ້າໃຫ້ນັບມື້ນັບກວ້າງຂວາງ, ຫຼາກຫຼາຍ ແລະ ທົ່ວເຖິງສັງຄົມ ທີ່ມີການແຂ່ງຂັນທີ່ເປັນທໍາ, ລາຄາສິນຄ້າສົມເຫດສົມຜົນ ແລະ ສິນຄ້າມີຄຸນນະພາບນັບມື້ນັບດີຂຶ້ນ ໂດຍການຊຸກຍູ້, ສົ່ງເສີມ ແລະ ສະໜອງເຕັກນິກ, ເຕັກໂນໂລຍີ, ແນວພັນ ແລະ ວັດຖຸດິບທີ່ມີຢູ່ພາຍໃນປະເທດໃຫ້ຫຼາຍຂຶ້ນ ເຂົ້າໃນຂະບວນການຜະລິດ ເພື່ອລົດຕົ້ນທຶນການຜະລິດລົງ ຫຼີກລ້ຽງການນໍາເຂົ້າທີ່ຕິດພັນກັບອັດຕາແລກປ່ຽນທີ່ສົ່ງຜົນເຮັດໃຫ້ຕົ້ນທຶນສູງຂຶ້ນ.

3) ຊຸກຍູ້, ສົ່ງເສີມ ແລະ ຄຸ້ມຄອງກຸ່ມ, ສະມາຄົມ ແລະ ສະຫະກອນການຜະລິດ ແລະ ການຄ້າໃຫ້ເຂັ້ມແຂງ, ເປັນລະບົບ ແລະ ສາມາດຈັດຕັ້ງໄດ້ເປັນຮູບປະທໍາ ເພື່ອເຮັດໜ້າທີ່ເປັນກໍາລັງແຮງໃນການດັດສົມການສະໜອງ ແລະ ຄວາມຕ້ອງການສິນຄ້າໃຫ້ທົ່ວເຖິງສັງຄົມ, ຮັບປະກັນໄດ້ໃນລະດັບໜຶ່ງຂອງສະຖຽນລະພາບທາງດ້ານລາຄາ ໝາຍວ່າຄາບໍ່ແພງ ແລະ ບໍ່ຖືກເກີນໄປ, ສິນຄ້າມີຄຸນນະພາບໃນລະດັບນັບມື້ນັບດີຂຶ້ນ ແລະ ສ້າງຄວາມເຂັ້ມແຂງໃຫ້ລັດວິສາຫະກິດໃຫ້ກາຍເປັນຫົວໜ່ວຍວິສາຫະກິດນໍາໜ້າທີ່ສາມາດຂຸດຄົ້ນແຫຼ່ງລາຍຮັບເປັນເງິນຕາຕ່າງປະເທດຢ່າງແທ້ຈິງ.

4) ຊຸກຍູ້, ສົ່ງເສີມ ແລະ ສ້າງແຫຼ່ງທ່ອງທ່ຽວໃໝ່ໆທັງຮູບແບບທີ່ມີການສ້າງຂຶ້ນ ຫຼື ອະນຸລັກທາງທໍາມະຊາດ ທີ່ມີເອກກະລັກສະເພາະຕິດພັນກັບການຮັກສາວັດທະນາທໍາ ແລະ ສິ່ງແວດລ້ອມຂອງຊາດ ເພື່ອດຶງດູດນັກທ່ອງທ່ຽວ ແລະ ສ້າງລາຍຮັບເປັນເງິນຕາຕ່າງປະເທດໃຫ້ເພີ່ມຂຶ້ນ, ສົ່ງເສີມ ແລະ ຄຸ້ມຄອງການຜະລິດພາຍໃນໃຫ້ເຂັ້ມແຂງ ສາມາດຜະລິດ ແລະ ສະໜອງສິນຄ້າໃຫ້ນັບມື້ນັບກວ້າງຂວາງ, ຫຼາກຫຼາຍ ແລະ ທົ່ວເຖິງສັງຄົມ ທີ່ມີການແຂ່ງຂັນທີ່ເປັນທໍາ, ລາຄາສິນຄ້າສົມເຫດສົມຜົນ ແລະ ສິນຄ້າມີຄຸນນະພາບນັບມື້ນັບດີຂຶ້ນ.

ລາຍລະອຽດສາມາດເບິ່ງໄດ້ທີ່: www.moic.gov.la