ສຶກສາ ແບບຢ່າງອັນລ້ຳຄ່າຂອງປະທານສຸພານຸວົງ

ຜ່ານເສັ້ນທາງການປະຕິວັດປົດປ່ອຍປະເທດຊາດ ຢ່າງລຳບາກ ແລະ ລະອິດລະອ້ຽວ, ປະທານ ສຸພານຸວົງ ໄດ້ເປັນແບບຢ່າງ ແລະປະບົດຮຽນຕົວຈິງອັນລ້ຳຄ່າທີ່ສຸດໃຫ້ແກ່ຄົນຮຸ່ນຫລັງທັງການດຳລົງຊີວິດ ແລະ ການເຄື່ອນໄຫວພາລະກິດວຽກງານຂອງຕົນ ຊຶ່ງທຸກປີເມື່ອເຖິງວັນທີ 13 ກໍລະກົດ ສຳນັກງານກົມກອງທັງສູນກາງ ແລະ ທ້ອງຖິ່ນຕ່າງກໍຈັດຕັ້ງການປາຖະກະຖາ ການເລົ່າມູນເຊື້ອທີ່ດີງາມຂອງເພິ່ນ ທັງຮຽກຮ້ອງໃຫ້ປະຕິບັດຕາມແບບຢ່າງຂອງເພິ່ນ, ແຕ່ຕົວຈິງແລ້ວເກີດຫຍັງໃໝ່ແດ່ ມີອັນໃດແດ່ທີ່ເຮັດໄດ້ ແລະ ເຮັດບໍ່ໄດ້ ພວກເຮົາມາຮ່ວມກັນສຶກສາຄືນຄວາມເປັນແບບຢ່າງ ບົດຮຽນທີ່ແສນປະເສີດຂອງເພິ່ນອີກເທື່ອໜຶ່ງ.

ໜຶ່ງ: ເປັນຜູ້ທີ່ສະດຸ້ງໄວ, ມີທັດສະນະແນວຄິດກ້າວໜ້າ, ສາມາດປະຖິ້ມຍົດຖາບັນດາສັກ ແລະ ຄວາມ ສຸກສ່ວນຕົວ ແບບສັກດິນາມາຢູ່ໃນຖັນແຖວນັກປະຕິວັດ.

ສອງ: ເປັນຜູ້ທີ່ມີນໍ້າໃຈຮັກຊາດອັນດູດດື່ມທີ່ບໍ່ມີອໍານາດອິດທິພົນໃດໆຈະສາມາດທຳລາຍໄດ້.

ສາມ: ເປັນຜູ້ທີ່ເດັດດ່ຽວຍອມເສຍສະລະທຸກສິ່ງທຸກຢ່າງເພື່ອປະເທດຊາດ ເພື່ອປະຊາຊົນລາວທຸກທົ່ວໜ້າ.

ສີ່: ເປັນຜູ້ມີຄວາມພິລະອາດຫານ, ກ້າຜະເຊີນໜ້າກັບທຸກຄວາມຫຍຸ້ງຍາກ ແລະ ທຸກອຸປະສັກ, ບໍ່ໄດ້ຫວັ່ນກົວຕໍ່ການເສຍສະລະແມ່ນແຕ່ຊີວິດຂອງເພິ່ນເອງ.

ຫ້າ: ເປັນຜູ້ທີ່ເອົາໃຈໃສ່ພາກພຽນນສຶກສາຮໍ່າຮຽນເຮັດໃຫ້ເພີ່ນມີຄວາມຮູ້ອັນກວ້າງຂວາງເລິກເຊິ່ງໃນຫລາຍຂະແໜງວິທະຍາສາດ ຊຶ່ງຄວາມຮູ້ນັ້ນໄດ້ກາຍເປັນຊັບສົມບັດອັນປະເສີດທີ່ສຸດ ແລະ ກໍບໍ່ມີມື້ບົກແຫ້ງ.

ຫົກ: ເປັນຜູ້ທີ່ມີລະບຽບເຄັ່ງຄັດຕໍ່ຕົນເອງສະແດງອອກໃຫ້ເຫັນແຈ້ງຈາກຄໍາເວົ້າ ແລະ ການກະທຳລ້ວນແຕ່ກົງກັນ.

ເຈັດ: ເປັນຜູ້ທີ່ມີຄວາມດຸໝັ່ນ, ປະຢັດ.

ແປດ: ເປັນຜູ້ມີຈິດໃຈກວ້າງຂວາງ, ບໍ່ຖືຕົວ, ສາມາດເຈືອຈານເຂົ້າກັບມະຫາຊົນທຸກເພດໄວ-ທຸກຊັ້ນຄົນໄດ້, ເພິ່ນມີຄວາມຫ່ວງໃຍຕໍ່ຄວາມສຸກທຸກ, ຄວາມກ້າວໜ້າຂອງປະຊາຊົນໂດຍສະເພາະຊາວໜຸ່ມ ແລະ ເຍົາວະຊົນທີ່ຈະເປັນຜູ້ສືບທອດພາລະກິດປະຕິວັດຂອງປະເທດຊາດໃນອະນາຄົດ.