5 ເດືອນຕົ້ນປີ 2022 ລາວ-ຫວຽດນາມບັນລຸມູນຄ່າການຄ້າ 690 ລ້ານໂດລາ
ວັນທີ 8 ກໍລະກົດ 2022 ຢູ່ນະຄອນຫລວງວຽງຈັນ, ທ່ານ ວຽງສະຫວັນ ວິໄລພອນ ຮອງປະທານຄະ ນະກໍາມະການຮ່ວມມືລາວ-ຫວຽດນາມ ແລະ ທ່ານ ເຈິນ ກວັກ ເຟືອງ ຮອງລັດຖະມົນຕີກະຊວງແຜນ ການ ແລະ ການລົງທຶນ ສສ ຫວຽດນາມ, ຮອງປະທານຄະນະກໍາມະການຮ່ວມມື ຫວຽດນາມ-ລາວໄດ້ຮ່ວມກອງປະຊຸມຕີລາຄາຜົນສຳເລັດການຕິດຕາມຊຸກຍູ້ໂຄງການຊ່ວຍເຫຼືອ ແລະ ການລົງທຶນຂອງຫວຽດ ນາມຈຳນວນໜຶ່ງຢູ່ ສປປ ລາວ ໂດຍສອງຝ່າຍເຫັນວ່າ: ໃນ 6 ເດືອນຕົ້ນປີ 2022ໄດ້ປະສານສົມທົບຈັດຕັ້ງປະຕິບັດບັນດາເນື້ອໃນຂໍ້ຕົກລົງວ່າດ້ວຍແຜນການຮ່ວມມືລາວ-ຫວຽດນາມ ປະຈໍາປີ 2022, ຊຸກຍູ້ການພົວພັນຮ່ວມມືສອງປະເທດໃນທຸກຂົງເຂດ ເປັນຢ່າງດີ ແລະ ມີປະສິດທິຜົນຕົວຈິງ.
ກອງປະຊຸມຍົກຝຫ້ເຫັນວ່າ: ການລົງທຶນໃນ 5 ເດືອນຕົ້ນປີ 2022, ເຖິງວ່າສືບຕໍ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ແຕ່ບັນດາວິສາຫະກິດໄດ້ພະຍາຍາມ, ຕັດສິນໃຈສູງເຂົ້າມາລົງທຶນຢູ່ລາວ ໂດຍໄດ້ອະນຸມັດໃໝ່ 1 ໂຄງການ ແລະ ດັດແກ້ເພີ່ມທຶນຈົດທະບຽນ 3 ໂຄງການມູນຄ່າ 64,5 ລ້ານໂດລາ ສົ່ງຜົນເຮັດໃຫ້ປັດຈຸບັນ ມີໂຄງການທີ່ໄດ້ຮັບອະນຸຍາດ 214 ໂຄງການ ມູນຄ່າ 5,38 ຕື້ໂດລາ ຈັດຢູ່ອັນດັບທີ 3 ຂອງບັນດາປະເທດທີ່ມາລົງມຶນຢູ່ລາວ (ຕໍ່ຈາກຈີນ ແລະ ໄທ). ຂະນະດຽວກັນກໍໄດ້ປະສານສົມທົບຍູ້ແຮງການດຶງດູດບັນດານັກລົງທຶນຍຸດທະສາດເຂົ້າມາລາວໃນບັນດາໂຄງການຍຸດທະສາດສຳຄັນຕ່າງໆ. ສ່ວນການຄ້າ 5 ເດືອນຕົ້ນປີ 2022 ບັນລຸມູນຄ່າ 690 ລ້ານໂດລາເພີ່ມຂຶ້ນ 20,2% ທຽບໃສ່ໄລຍະດຽວກັນປີ 2021.
ໂຄງການຮ່ວມມືຂະໜາດໃຫຍ່ຈຳນວນໜຶ່ງ ການນຳຂັ້ນສູງສອງປະເທດໄດ້ໃຫ້ຄວາມສຳຄັນ ມີບາດກ້າວຫັນປ່ຽນຢ່າງຈະແຈ້ງ ພິເສດແມ່ນໂຄງການເຂື່ອນໄຟຟ້າເຊຂະໝານ ໄດ້ກັບມາຜະລິດໄຟຟ້າໃນເດືຶອນພຶດສະພາ 2022. ນອກນີ້ ຍັງໄດ້ເອົາໃຈໃສ່ພັດທະນາຊັບພະຍາກອນມະ ນຸດ ຊຶ່ງປັດຈຸບັນ, ມີພະນັກງານ, ນັກສຶກສາລາວ ໄປສຶກສາຢູ່ຫວຽດນາມ 14.000 ກວ່າຄົນ.
ສຳລັບ 6 ເດືອນທ້າຍປີ 2022, ຄະນະກຳມະການຮ່ວມມືລາວ-ຫວຽດນາມ, ຫວຽດນາມ-ລາວ ຈະສືບຕໍ່ເສີມຂະຫຍາຍບັນດາກົນໄກການຮ່ວມມືສອງຝ່າຍຢ່າງມີປະສິດທິຜົນ; ປະສານສົມທົບຈັດຕັ້ງຜັນຂະຫຍາຍບັນດາຂໍ້ຕົກລົງທີ່ລະບຸໃນກອງປະຊຸມຄັ້ງທີ 44 ຢ່າງມີປະສິດທິຜົນ; ຊຸກຍູ້ບັນດາກະຊວງ, ຂະແໜງການ, ທ້ອງຖິ່ນ ຜັນຂະຫຍາຍບັນດາຂໍ້ຕົກລົງທີ່ໄດ້ໃຫ້ຄຳໝັ້ນສັນຍາຢ່າງມີປະສິດທິຜົນເພື່ອສະເຫຼີມສະຫຼອງປີສາມັ ກຄີມິດຕະພາບລາວ-ຫວຽດນາມ, ຫວຽດນາມ-ລາວ 2022; ສືບຕໍ່ຊຸກຍູ້ບັນດາໂຄງການຈຸດສຸມ ເຊັ່ນ: ເສັ້ນທາງດ່ວນວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ຫວຸ່ງອ່າງ, ບໍ່ເກືອກາລີ ຄຳມ່ວນ, ສະໜາມບິນໜອງຄ້າງ, ພິເສດ ສູ້ຊົນປະສານສົມທົບແກ້ໄຂຂໍ້ຫຍຸ້ງຍາກ, ຄົງຄ້າງເພື່ອເຮັດໃຫ້ວຽກກຳມະສິດຖືຮຸ້ນຂອງລັດຖະບານລາວຢູ່ບໍລິສັດຮຸ້ນສ່ວນສາກົນລາວ-ຫວຽດ (ທ່າເຮືອຫວຸ່ງອ່າງ 1, 2 ແລະ 3)ເພີ່ມຂຶ້ນເປັນ 60% ໃຫ້ສຳເລັດ. ສ່ວນທຶນຊ່ວຍຂອງລັດຖະບານຫວຽດນາມໃຫ້ແກ່ລາວຈະຊຸກຍູ້ບັນດາອົງການ, ຫົວໜ່ວຍກ່ຽວ ຂ້ອງຍູ້ຄວາມຄືບໜ້າການຈັດຕັ້ງປະຕິບັດບັນດາໂຄງການຄື ກໍ່ສ້າງສະຖາບັນການເງິນດົງຄຳຊ້າງໄລຍະ 3, ໂຮງໝໍມິດຕະພາບແຂວງຊຽງຂວາງ, ສະຖານີວິທະຍຸ-ໂທລະພາບແຂວງບໍ່ແກ້ວໃຫ້ສຳເລັດ ແລະໂຄງການ ອື່ນໆອີກ.
ສຳລັບການນຳໃຊ້ທຶນຊ່ວຍເຫຼືອຂອງຫວຽດນາມ, ສອງຝ່າຍເປັນເອກະພາບເພີ່ມທະວີຊຸກຍູ້ບັນ ດາໂຄງການທີ່ຊັກຊ້າເນື່ອງຈາກການແພ່ລະບາດຂອງພະຍາດໂຄວິດ-19 ຜ່ານມາ; ຮັບຊາບການປະຕິບັດສຳເລັດ, ມອບ-ຮັບ ແລະ ເອົາເຂົ້າສູ່ການນຳໃຊ້ 4 ໂຄງການລວມມີໂຄງການກໍ່ສ້າງໂຮງຮຽນນາຍສິບ ຢູ່ ແຂວງໄຊສົມບູນ; ໂຄງການຍົກລະດັບຊົນລະປະທານນ້ຳລອງເມືອງສົບເບົາແຂວງຫົວພັນ; ໂຄງການສ້ອມ ແປງ, ຍົກລະດັບເຂດອະນຸສອນສະຖານປະທານ ໂຮ່ຈິມິງ ແຂວງຄຳມ່ວນ ແລະ ສະຖານີວິທະຍຸ-ໂທລະ ພາບ ແຂວງບໍ່ແກ້ວ, ຈັດຕັ້ງວາງສີລາລືກ 2 ໂຄງການ ເຊັ່ນໂຄງການກໍ່ສ້າງສວນອຸທິຍານ ມິດຕະພາບ ລາວ-ຫວຽດນາມຢູ່ນະຄອນຫຼວງວຽງຈັນ ແລະ ສູນບໍລິການເຕັກນິກກະສິກຳແຂວງໄຊສົມບູນ.
