ການຈອດລົດເທິງທາງຍ່າງ ທີ່ເປັນບັນຫາຊຳເຮື້ອ ທີ່ສ້າງຜົນກະທົບຕໍ່ປະຊາຊົນຜູ້ທຽວທາງ ແລະ ສ້າງຄວາມເຂົ້າໃຈຜິດແກ່ນັກທ່ອງທ່ຽວ
ບັນຫາການຈອດລົດເທິງທາງຍ່າງ ເປັນບັນຫາຊຳເຮື້ອມາຍາວນານ ເປັນບັນຫາທີ່ຖືກສ່ອງແສງຈາກສັງຄົມເປັນຈຳນວນຫລາຍໃນຕະຫລອດໄລຍະຜ່ານມາ ທັງນີ້ກໍເນື່ອງມາຈາກພວກເຂົາໄດ້ຮັບຄວາມເດືອດຮ້ອນ, ສ້າງຄວາມຫຍຸ້ງຍາກເວລາຍ່າງ, ມີຄວາມບໍ່ປອດໄພ ແລະ ຄວາມບໍ່ຈົບງາມໃຫ້ແກ່ຕົວເມືອງ.
ຖ້າເວົ້າເຖິງບັນຫານີ້ແລ້ວເຮົາມັກຈະເວົ້າເຖິງການຖືເບົາເວົ້າຄວາມງ່າຍ ແລະ ການບໍ່ພິຈາລະນາຄົ້ນຄິດຖີ່ຖ້ວນເປັນບົດພິສູດທີ່ສາມາດຊີ້ໃຫ້ເຫັນຄວາມຜິດພາດຂອງພາກສ່ວນກ່ຽວຂ້ອງລວມທັງບັນດານັກຂັບຂີ່ລົດທັງຫລາຍ ຊຶ່ງຄວາມຈິງແລ້ວທຸກການກໍ່ສ້າງ ເພື່ອການນຳໃຊ້ ດັ່ງທາງຍ່າງ ຊຶ່ງຄໍາວ່າ ທາງຍ່າງ ບໍ່ຈຳເປັນອະທິບາຍ ພຽງແຕ່ຊື່ກໍຮູ້ແລ້ວ, ແຕ່ບັນຫາ ການນໍາໃຊ້ຜົນປະໂຫຍດຈາກມັນຖືກເປົ້າໝາຍໜ້ອຍຫລາຍສໍ່າໃດ ຊຶ່ງເທົ່າທີ່ສັງເກດເຫັນທັງປັດຈຸບັນແລະ ຜ່ານມາຢູ່ນະຄອນຫລວງວຽງຈັນໄດ້ຫັນເອົາ ບາງເສັ້ນທາງຍ່າງ ມາເປັນບ່ອນຈອດລົດ.
ຖ້າຕັ້ງຄຳຖາມຂຶ້ນວ່າ: ຄວນ ຫລື ບໍ່ຄວນ? ຄຳຕອບເຮົາກໍຊັດເຈນຢູ່ແລ້ວ ເພາະກ່ອນອື່ນເຮົາຕ້ອງສຳນຶກນຳກັນວ່າ ກົດລະບຽບທີ່ຕັ້ງອອກມານັ້ນເຮັດເພື່ອໃຫ້ທຸກຄົນປະຕິບັດ ບໍ່ແມ່ນເອົາເຫັນແຕ່ຄວາມສະດວກສະບາຍຂອງຕົນພຽງຝ່າຍດຽວມາຕັດສິນ ເຊິ່ງພວກເຮົາທຸກຄົນມີຄວາມເທົ່າທຽມໃນການຈັດຕັ້ງປະຕິບັດ ເພື່ອຄວາມເປັນລະບຽບຈົບງາມ, ຄວາມຖືກຕ້ອງ ຢ່າງໜ້ອຍທີ່ສຸດຂໍໃຫ້ຄິດເຖິງຄວາມປອດໄພໃນການສັນຈອນໄປມາຂອງຄົນອື່ນທີ່ຍ່າງເທິງທາງຍ່າງນັ້ນແດ່ ຄິດເຖິງຄວາມຈະເລີນທາງຈິດໃຈຂອງໂຕເອງພ້ອມ.
ເມື່ອມາເບິ່ງພາກລວມແລ້ວ ເຫັນວ່າບໍ່ສົມຄວນຢ່າງຍິ່ງໃນການຈອດລົດເທິງທາງຍ່າງ ສະນັ້ນ, ເຮົາທຸກຄົນຕ້ອງບໍ່ເຫັນແກ່ຕົວ ແລະ ພາກສ່ວນກ່ຽວຂ້ອງ ໂດຍສະເພາະເຈົ້າໜ້າທີ່ກໍຕ້ອງເຂັ້ມງວດກວດກາ ໃຊ້ມາດຕະການຢ່າງເດັດຂາດໃນການແກ້ບັນຫາດັ່ງກ່າວນີ້ໃຫ້ໝົດໄປ ເພື່ອຄວາມເປັນເອກະພາບ ແລະ ຄວາມຖືກຕ້ອງທາງສັງຄົມ.
ຖ້າເຮັດໄດ້ແທ້ບັນຫານີ້ກໍຈະໝົດໄປ ສ້າງຄວາມສະບາຍໃຈ, ຄວາມເປັນລະບຽບຮຽບຮ້ອຍໃຫ້ກັບເສັ້ນທາງການຈະລາຈອນທີ່ໂລ່ງລ່ຽນ, ສະດວກສະບາຍ ແລະ ເປັນໜ້າເປັນຕາໃຫ້ກັບແຂກໄປໄທມາອີກດ້ວຍ ນອກຈາກເສຍວ່າບັນຫານີ້ບໍ່ຢາກແກ້.
