7 ສັນຍານອັນຕະລາຍຂອງການນອນຫລາຍເກີນໄປ

1. ເພີ່ມຄວາມສ່ຽງທີ່ຈະເປັນຊຶມເສົ້າ

ຜູ້ທີ່ນອນຫລັບລະຫວ່າງ 7-9 ຊົ່ວໂມງ ມີໂອກາດສ່ຽງໃນການເປັນພະຍາດຊຶມເສົ້າ 27% ຂະນະທີ່ຜູ້ທີ່ນອນຫລັບ 9 ຊົ່ວໂມງ ຫຼື ຫຼາຍກວ່ານັ້ນຈະມີໂອກາດສ່ຽງຫຼາຍເຖິງ 49%

2. ທໍາລາຍສະໝອງ

ມີການສຶກສາໃນປີ 2012 ພົບວ່າຜູ້ຍິງສູງອາຍຸທີ່ນອນຫລັບຫຼາຍເກີນໄປ ຫຼື ໜ້ອຍເກີນໄປດົນຕິດຕໍ່ກັນຫຼາຍກວ່າ 6 ປີ ສະໝອງຈະເສື່ອມປະສິດທິພາບໃນການເຮັດວຽກງານ ເຊັ່ນດຽວກັບຜູ້ຍິງສູງອາຍຸຊຶ່ງນອນຫລັບຫຼາຍກວ່າ 9 ຊົ່ວໂມງ ຫຼື ໜ້ອຍກວ່າ 5 ຊົ່ວໂມງກໍຈະມີສະໝອງທີ່ແກ່ໄວກວ່າປົກກະຕິເຖິງ 2 ປີ

3. ມີລູກຍາກໃນປີ 2013 ທີມວິໄຈຂອງເກົາຫຼີໄດ້ວິເຄາະພຶດຕິກຳການນອນຫລັບຂອງຜູ້ຍິງທີ່ມີບັນຫາໃນການຕັ້ງມົດລູກຫຼາຍກວ່າ 650 ຄົນ ພົບວ່າອັດຕາການຕັ້ງມົດລູກຈະສູງທີ່ສຸດໃນກຸ່ມຂອງຜູ້ຍິງທີ່ນອນຫລັບລະຫວ່າງ 7-9 ຊົ່ວໂມງ ແລະ ຕ່ຳທີ່ສຸດໃນກຸ່ມຂອງຜູ້ຍິງທີ່ນອນຫລັບລະຫວ່າງ 9-11 ຊົ່ວໂມງ

ຢ່າງໃດກໍຕາມ ຍັງບໍ່ພົບສາເຫດທີ່ເຊື່ອມໂຢງກັນຢ່າງຊັດເຈນ. ເຖິງແມ່ນວ່າ ເຮົາຈະຮູ້ວ່າພຶດຕິກຳການນອນຫລັບສາມາດສົ່ງຜົນຕໍ່ລະບົບໂມງຊີວະພາບ, ການຫຼັ່ງຮໍໂມນ. ແຕ່ຍັງບໍ່ຊັດເຈນວ່າກ່ຽວຂ້ອງກັບພາວະມີລູກຍາກເນື່ອງຈາກມີປັດໄຈທີ່ຍາກເກີນການຄວບຄຸມຫຼາຍເກີນໄປ

4. ມີຄວາມສ່ຽງທີ່ຈະເກີດພະຍາດເບົາຫວານ

ນັກວິໄຈພົບວ່າຜູ້ທີ່ນອນຫລັບຫຼາຍກວ່າ 8 ຊົ່ວໂມງ ຈະມີໂອກາດສ່ຽງໃນການເປັນພະຍາດເບົາຫວານປະເພດ 2 ຫຼາຍກວ່າຜູ້ທີ່ນອນຫລັບລະຫວ່າງ 7-8 ຊົ່ວໂມງ ຫຼາຍເຖິງ 2 ເທົ່າ ເຖິງວ່າຈະມີການຄວບຄຸມການປ່ຽນແປງຂອງມວນຮ່າງກາຍແລ້ວກໍຕາມ

5. ນ້ຳໜັກຕົວເພີ່ມຂຶ້ນ

ຜູ້ທີ່ນອນຫລັບຫຼາຍ ຫຼື ໜ້ອຍເກີນໄປຈະມີນ້ຳໜັກຕົວຫຼາຍກວ່າຜູ້ທີ່ນອນຫລັບລະຫວ່າງ 7-8 ຊົ່ວໂມງ 25% ຂອງຜູ້ທີ່ນອນຫລັບລະຫວ່າງ 9-10 ຊົ່ວໂມງມີແນວໂນ້ມທີ່ຈະມີນ້ຳໜັກຕົວເພີ່ມຂຶ້ນ 5 ກິໂລກຣາມ ເຖິງວ່າຈະມີການຄວບຄຸມອາຫານ ແລະ ອອກກຳລັງກາຍແລ້ວກໍຕາມ

6. ມີຜົນຕໍ່ສຸຂະພາບຫົວໃຈ

ຜູ້ທີ່ນອນຫລັບຫຼາຍ 8 ຊົ່ວໂມງ ຫຼື ຫຼາຍກວ່ານັ້ນ ມີແນວໂນ້ມທີ່ຈະມີບັນຫາສຸຂະພາບຫົວໃຈເພີ່ມຫຼາຍຂຶ້ນ. ນອກຈາກນີ້ຍັງມີໂອກາດສ່ຽງໃນການເປັນພະຍາດຫຼອດເລືອດຫົວໃຈຕີບເພີ່ມຂຶ້ນ 2 ເທົ່າ ແລະພະຍາດຫຼອດເລືອດແດງ 1.1 ເທົ່າ

7. ເສຍຊີວິດກ່ອນໄວອັນຄວນ

ໃນປີ 2010 ນັກວິໄຈພົບວ່າຜູ້ທີ່ນອນຫລັບທັງຫຼາຍ ແລະ ໜ້ອຍເກີນໄປມີໂອກາດສ່ຽງໃນການເສຍຊີວິດກ່ອນໄວອັນຄວນ ໂດຍຜູ້ທີ່ນອນຫລັບຫຼາຍກວ່າ 8 ຊົ່ວໂມງ ຈະມີໂອກາດສ່ຽງໃນການເສຍຊີວິດຫຼາຍກວ່າຜູ້ເຂົ້າຮ່ວມການທົດລອງຈຳນວນ 1,382,999 ຄົນເຖິງ 1.3 ເທົ່າ