ຊະລາຕັນ ອິບຣາຮີໂມວິດ ກຽມຕໍ່ສັນຍາ ມິລານ ອີກ 1 ປີ ພ້ອມຍອມຫລຸດຄ່າເມື່ອຍລົງ

ຊະລາຕັນ ອິບຣາຮີໂມວິດ ກອງຫນ້າປະສົບການຫລາຍຂອງ ເອຊີ ມິລານ ຕັດສິນໃຈທີ່ຈະຂະຫຍາຍສັນຍາກັບ ເອຊີ ມິລານ ອອກໄປອີກ 1 ປີ ພ້ອມຍອມຫລຸດຄ່າເມື່ອຍລົງ.

ສຳລັບ ອິບຣາຮີໂມວິດ ຫມົດສັນຍາກັບ ມິລານ ໄປຕັ້ງແຕ່ວັນທີ 30 ມິຖຸນາ ເຮັດໃຫ້ໃນປັດຈຸບັນລາວກາຍເປັນນັກເຕະບໍ່ມີສັງກັດ ນອກຈາກນັ້ນຍັງຢູ່ໃນໄລຍະທີ່ປິ່ນປົວຕົນເອງຈາກອາການບາດເຈັບເຂົ່າ.

ແນວໃດກໍຕາມກ່ອນຫນ້ານີ້ມີລາຍງານວ່າ ເອຊີ ມິລານ ຕ້ອງການຂະຫຍາຍສັນຍາກັບນັກເຕະອາຍຸ 40 ປີ ຄົນນີ້ອອກໄປ ເຊັ່ນດຽວ ກັບນັກເຕະ ແລະ ພວມຢູ່ໃນຂັ້ນຕອນການເຈລະຈາ.

ຈົນຫລ້າສຸດ ສະກາຍ ສະປອດ ໄດ້ເປີດເຜີຍວ່າ ດາວຍິງທີມຊາດສະວີເດັນ ກຽມຕໍ່ສັນຍາກັບ ມິລານ ອີກ 1 ປີ ພ້ອມຍອມຫລຸດຄ່າ ເມື່ອຍລົງຈາກເກ່ົາ ເຫລືອປີລະ 1-1,5 ລ້ານຢູໂຣ ເນື່ອງຈາກລາວຈະກັບມາລົງສະຫນາມໄດ້ອີກເທື່ອຫນຶ່ງໃນໄລຍະທ້າຍປີນີ້.

ສຳລັບ ອິບຣາຮີໂມວິດ ຍ້າຍກັບມາຫລິ້ນຢູ່ກັບ ເອຊີ ມິລານ ຮອບທີສອງເມື່ອປີ 2020 ເຊິ່ງລາວກໍສະແດງຜົນງານໄດ້ຫນ້າພໍໃຈ ຫລັງຍິງໄດ້ລວມ 25 ປະຕູ ຈາກ 2 ລະດູການຜ່ານມາ.