ອີງໃສ່ທ່າແຮງປະເທດຊາດ ພັດທະນາເສດຖະກິດໃຫ້ເຂັ້ມແຂງ

ໂດຍ: ລູກເມືອງພວນ

ລາວເປັນປະເທດນ້ອຍດ້ອຍພັດທະນາ ແຕ່ມີເນື້ອທີ່ດິນທີ່ກວ້າງໃຫຍ່ໄພສານ ແລະ ອຸດົມສົມບູນໄປດ້ວຍຊັບໃນດິນສິນໃນນໍ້າ ອັນເປັນເງື່ອນໄຂທີ່ເອື້ອອຳນວຍໃຫ້ແກ່ການສ້າງສາພັດທະນາປະເທດຊາດໄດ້ເປັນຢ່າງດີ ເມື່ອທຽບໃສ່ພົນລະເມືອງ.

2/3 ເນື້ອທີ່ຂອງປະເທດ ເປັນພູຜາປ່າດົງຢູ່ທາງພາກເໜືອຂອງລາວ ທີ່ເຕັມໄປດ້ວຍສັດສາວາສິ່ງນານາຊະນິດ, ມີຮາກໄມ້ໃບຫຍ້າທີ່ເປັນຢາປົວພະຍາດຊັ້ນຍອດ ຕະຫຼອດຮອດແມ່ນໍ້າລຳເຊກໍຫຼາກຫຼາຍ ຊຶ່ງເປັນແຫຼ່ງສ້າງພະລັງງານໄຟຟ້ານໍ້າຕົກທີ່ມະຫາສານ, ຢູ່ພື້ນດິນກໍເຕັມໄປດ້ວຍແຮ່ທາດຕ່າງໆ ເຊັ່ນ: ບໍ່ຄຳ, ບໍ່ຊືນ, ກົ່ວ, ເຫລັກ…. 1/3 ເປັນພູພຽງ ແລະ ທົ່ງພຽງ ຢູ່ທາງພາກກາງ ແລະ ພາກໃຕ້ຂອງລາວ, ຊຶ່ງເປັນເງື່ອນໄຂອຳນວຍຄວາມສະດວກໃຫ້ແກ່ການປູກຝັງ, ລ້ຽງສັດ, ປູກພືດຜັກ ແລະ ເຂົ້າໃຫ້ກາຍເປັນສິນຄ້າສົ່ງອອກທີ່ມະຫາສານ.

ດ້ວຍທີ່ຕັ້ງພູມມີປະເທດ ແລະ ຄວາມອຸດົມ ຮັ່ງມີດັ່ງກ່າວ ລາວສາມາດສ້າງເຂື່ອນໄຟຟ້ານໍ້າຕົກ, ປູກຝັງ-ລ້ຽງສັດຂະໜາດໃຫ່ຍໃຫ້ກາຍເປັນອຸດສາຫະກຳທີ່ທັນສະໄໝ, ຂຸດຄົ້ນ, ປຸງແຕ່ງແຮ່ທາດ ແລະ ຜະລິດຕະພັນໄມ້ຢ່າງມີແຜນການເພື່ອສົ່ງອອກ. ນອກຈາກນັ້ນຍັງມີທິວທັດທຳມະຊາດທີ່ສວຍສົດງົດງາມຫຼາຍແຫ່ງຢູ່ທົ່ວທຸກພາກຂອງລາວທີ່ຈະສ້າງໃຫ້ກາຍເປັນແຫຼ່ງທ່ອງທ່ຽວມີຄ່ານິຍົມສູງ

ພວກເຮົາຢ່າລືມວ່າ ຈຸດເລີ່ມຂອງປະເທດເຮົາແມ່ນກະສິກຳ. ຖ້າພວກເຮົາຫາກຮູ້ຈັກນຳໃຊ້ທ່າແຮງບົ່ມຊ້ອນຕ່າງໆເຫຼົ່ານັ້ນຢ່າງຈິງຈັງ ເພື່ອເປັນແປ້ນຢັນໃຫ້ແກ່ການພັດທະນາອຸດສາຫະກຳແລ້ວ ເສດຖະກິດຂອງລາວຄົງຈະເລີນກ້າວໜ້າໄວພໍສົມຄວນ. ລາຍໄດ້ແຫ່ງຊາດຂອງລາວເຮົາຕົ້ນຕໍແມ່ນໄດ້ມາຈາກກະສິກຳເປັນຫຼັກ, ກວມ 70-80% ຂອງ ຈີດີພີ ນັ້ນເອງ.

ແຕ່ໄລຍະຜ່ານມາພວກເຮົາໄດ້ຂຸດຄົ້ນຊັບໃນດິນສິນໃນນໍ້າຈຳນວນມະຫາສານ ແຕ່ຜົນຕອບຮັບຍັງບໍ່ທັນສູງເທົ່າທີ່ຄວນ ເຊິ່ງມີຫຼາຍສາເຫດ ເປັນຕົ້ນແມ່ນການເກັບພາສີຈາກການຂຸດຄົ້ນບໍ່ໄດ້ເຕັມເມັດເຕັມໜ່ວຍ, ມີການສໍ້ໂກງໃນບັນຫາໂຄງການຕ່າງໆ ແລະ ບາງໂຄງການແມ່ນຢູ່ນອກລະບົບ ທັງໝົດນີ້ບໍແມ່ນຕັ້ງເວົ້າເອົາເອງ ແຕ່ລະັດຖະເພິ່ນກໍເວົ້າຈະແຈ້ງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ທີ່ພວມດຳເນີນຢູ່ນີ້ເອງ ເຮັດໃຫ້ທ່າແຮງທີ່ເຮົາມີເສຍເປົ່າໄປຈຳນວນຫຼາຍ.

ດັ່ງນັ້ນ, ໃນອະນາຄົດຂ້າງໜ້າ ຫຼື ໃນປັດຈຸບັນນີ້ພາກລັດເຮົາໄດ້ເພີ່ມມາດຕະການເຂັ້າງວດ, ມີລະບຽບກົດໝາຍຮັບຮອງຕໍ່ໂຄງການຕ່າງໆ ເພື່ອຄວາມໂປ່ງໃສ ພ້ອມນີ້ກໍຮຍກຮ້ອງເຖິງບໍລິສັດ, ຜູ້ຮັບເໝົາ, ຜູ້ຮັບຜິດຊອບຕໍ່ໂຄງການຕ່າງໆທີ່ພົວພັນກັບການຂຸດຄົ້ນຊັບພະຍາກອນທຳມະຊດອັນເປັນຂອງສ່ວນລວມ ໃຫ້ມີຄວາມໂປ່ງໃສ, ມີຄວາມຍຸດຕິທຳ, ຮັບໃຊ້ຕໍ່ການພັດທະນາປະເທດຊາດຢ່າງແທ້ຈິງ ຖ້າບໍ່ເຮັດແທ້ທຳຈິງ ບໍ່ມີຄວາມຊື່ສັດຕໍ່ປະເທດແລ້ວ ຜີບັນພະບຸລຸດ ແລະ ລູກຫຼານຂອງພວກເຮົາທີ່ເກີດໃໝ່ລຸນຫຼັງກໍຈະສາບແຊ່ງ ເຊິ່ງຜົນກຳທີ່ນຳມາກໍຄືລູກຫລານ ຍ້ອນບໍ່ມີແນວເອກອ້າງທະນົງໃຈ, ບໍ່ມີແນວອວດຕໍ່ສາຍຕາຊາວໂລກ ເມື່ອນັ້ນປະເທດຊາດອາດຈະຫຼົ້ມຈົມດ້ວຍນໍ້າມືຂອງກຸ່ມຄົນທີ່ບໍ່ຊື່ສັດຕໍ່ປະເທດຊາດກໍເປັນໄດ້.