60 ປີ ບໍລິສັດ ຕຣີເພັດ ອີຊູຊຸ ເຊວສ໌ ຈຳກັດເຕີບໃຫຍ່ເຂັ້ມແຂງ

ໃນລະຫວ່າງວັນທີ 23-26 ມີນານີ້, ຄະນະສື່ມວນຊົນລາວຊຶ່ງປະກອບມີ:

ໂທລະພາບ, ວິທະຍຸ, ໜັງສືພິມ ແລະ ວາລະສານຕ່າງໆຫລາຍກວ່າ 25 ພາກສ່ວນ, ໄດ້ເດີນທາງໄປຢ້ຽມຊົມການດຳເນີນທຸລະກິດຂອງບໍລິສັດ ຕຣີເພັດ ອີຊູຊຸເຊວສ໌ ຈຳກັດ ທີ່ບາງກອກປະເທດໄທ, ເພື່ອເປັນການຢ້ຳເຖິງການດຳເນີນທຸລະກິດ ແລະ ການເຕີບໃຫຍ່ຂະຫຍາຍຕົວຂອງບໍລິສັດດັ່ງກ່າວຕະຫລອດ 60 ປີຜ່ານມາ, ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກທ່ານ ໂທຊິອາກິ ມາເອຄາວະ ປະທານບໍລິສັດພ້ອມດ້ວຍພະນັກງານ ແລະ ໃນໂອກາດດັ່ງກ່າວ, ທ່ານປະທານບໍລິສັດໄດ້ລາຍງານໃຫ້ຮູ້ເຖິງຜົນສຳເລັດຂອງການດຳເນີນທຸລະກິດຂອງບໍລິສັດຕົນຕະຫລອດໄລຍະ 60 ປີຜ່ານມາວ່າ: ບໍລິສັດ ຕຣີເພັດ ອີຊູຊຸເຊວສ໌ຈຳກັດ ສ້າງຕັ້ງຂື້ນໃນວັນທີ 22 ພະຈິກ 1974 ເປັນບໍລິສັດຮ່ວມທຶນລະຫວ່າງບໍລິສັດ ມິດຊູບິຊິ ຄໍຣ໌ປໍເຣຊັນ ແລະ ບໍລິສັດ ອີຊູຊຸ ມໍເຕີ ປະເທດຍີ່ປຸ່ນ, ເພື່ອດຳເນີນທຸລະກິດຈຳໜ່າຍລົດກະບະ, ລົດເກງ, ລົດບັນທຸກຂະໜາດກາງ ແລະ ຂະໜາດໃຫຍ່ຍີ່ຫໍ້ ອີຊູຊຸ ແຕ່ພຽງຜູ້ດຽວໃນປະເທດໄທ, ຈາກການດຳເນີນທຸລະກິດຕະຫລອດ 60 ປີມານີ້, ບໍລິສັດ ຕຣີເພັດ ອີຊູຊຸເຊວສ໌ ຈຳກັດ ມີສູນຈຳໜ່າຍ ແລະ ສູນບໍລິການ ອີຊູຊຸ ຫລາຍກວ່າ 300 ແຫ່ງໃນປະເທດໄທ ແລະ ອີກຫລາຍໆສາຂາໃນທົ່ວໂລກ, ລວມທັງ ສປປ ລາວ. ສຳລັບລົດອີຊູຊຸທີ່ຈຳໜ່າຍໃນເຄືອຂອງຕຣີເພັດ ແມ່ນຜະລິດຈາກບໍລິສັດ ອີຊູຊຸ ມໍເຕີ ປະເທດໄທຈຳ ກັດ, ຊຶ່ງມີໂຮງງານຜະລິດ 2 ແຫ່ງຕັ້ງຢູ່ປະເທດໄທຄື: ໂຮງງານ ອີຊູຊຸ ແຂວງສະມຸດປາການ ແລະ ແຂວງຊະເຊີງເຊົາ, ເຮັດໜ້າທີ່ຜະລິດ ແລະ ປະກອບລົດອີຊູຊຸ ທຸກລຸ່ນ, ທຸກຂະໜາດສະໜອງໃຫ້ຕະຫລາດໃນປະເທດໄທ ແລະ ຕະຫລາດໃນທົ່ວໂລກນັບທັງ ສປປ ລາວ.

ປະທານບໍສັດດັ່ງກ່າວ ໃຫ້ຮູ້ວ່າ: 60 ປີຜ່ານມາ, ບໍລິສັດໄດ້ພັດທະນາ ແລະ ສ້າງຄວາມເຂັ້ມແຂງໃຫ້ກັບຍີ່ຫໍ້ອີຊູຊຸ ຈົນກາຍເປັນໜຶ່ງໃນຍີ່ຫໍ້ລົດຍົນຊັ້ນນຳຂອງປະເທດໄທ ກໍຄືທົ່ວໂລກ ແລະ ໄດ້ຮັບຄວາມເຊື່ອໝັ້ນສູງຈາກຜູ້ຊົມໃຊ້ ແລະ ຍັງເປັນຜູ້ນຳດ້ານນະວັດຕະກຳສ້າງຄວາມແປກໃໝ່ໃຫ້ກັບຕະຫລາດລົດຍົນທັງພາຍໃນ ແລະ ຕ່າງປະເທດ, ເຊິ່ງສາມາດເວົ້າໄດ້ວ່າບໍລິສັດ ຕຣີເພັດ ອີຊູຊຸເຊວສ໌ ຈຳກັດ ເປັນຜູ້ສ້າງຄວາມສຳເລັດໃຫ້ກັບລົດອີຊູຊຸທຸກລຸ້ນ, ມັນສະແດງອອກໃນປີ 2002 ອີຊູຊຸ ໄດ້ເປີດໂຕລົດ ອີຊູຊຸ ດີແມັກ ແລະ ພຽງ 10 ມື້ທຳອິດຂອງການເປີດໂຕລົດລຸ້ນດັ່ງກ່າວກໍມີຍອດຈຳໜ່າຍເຖິງ 10 ພັນຄັນ ແລະ ມີຍອດຂາຍຫລາຍກວ່າ 1 ລ້ານຄັນໃນໄລຍະເວລາພຽງ 7 ປີ (2002-2010)  ແລະ ບໍ່ສະເພາະແຕ່ເທົ່ານັ້ນ, ລົດທຸກລຸ້ນທີ່ ອີຊູຊຸ ຜະລິດອອກຈຳໜ່າຍລ້ວນແລ້ວແຕ່ໄດ້ຮັບຄວາມນິຍົມຈາກຜູ້ຊົມໃຊ້ເປັນຢ່າງດີ, ໂດຍສະເພາະໃນປະເທດໄທລົດ ຊີຊູຊຸ ມີຍອດຈຳໜ່າຍສູງເປັນອັນດັບຕົ້ນໆຂອງລົດກະບະທຸກຍີ່ຫໍ້ ແລະ ດ້ວຍຜົນງານອັນດີເດັ່ນດັ່ງກ່າວ, ມາຮອດປີ 2016 ບໍລິສັດ ອີຊູຊຸ ມໍເຕີ ປະເທດຍີ່ປຸ່ນໄດ້ມອບໝາຍໃຫ້ບໍລິສັດ ຕຣີເພັດ ອີຊູຊຸເຊວສ໌ ຈຳກັດ ໄດ້ສິດໃນການສ້າງຕະຫລາດສຳລັບລົດກະບະຂອງ ອີຊູຊຸ ລວມທັງການຂະຫຍາຍຕະຫລາດຂອງ ອີຊູຊຸ ໄປຍັງປະເທດກຳປູເຈຍ ແລະ ລາວ, ພ້ອມໄດ້ນຳສະເໜີຜະລິດຕະພັນອັນສຸດຍອດຂອງ ອີຊູຊຸ ໃຫ້ກັບຊາວລາວນັ້ນຄື: ລົດກະບະລຸ້ນໃໝ່ ອີຊູຊຸ ດີແມັກ ບລູພາວເວີ ແລະ ລົດອະເນກປະສົງ ອີຊູຊຸມິວ-ເອັກ ບລູພາວເວີ, ຊຶ່ງເປັນລົດທີ່ຜະລິດດ້ວຍນະວັດຕະກຳໃໝ່ ແລະ ເຕັມປ່ຽມໄປດ້ວຍຄວາມຄຸ້ມຄ່າ ແລະ ມາດຕະຖານທີ່ດີເລີດຂອງເຄື່ອງຈັກທີ່ໃຫ້ຄວາມແຮງສູງ, ປະຢັດນ້ຳມັນ ແລະ ຕອບໂຈດໃຫ້ກັບຜູ້ໃຊ້ລົດໄດ້ດີເລີດ ແລະ ໃນຕໍ່ໜ້າບໍລິສັດ ຕຣີເພັດ ອີຊູຊຸເຊວສ໌ ຍັງຈະສືບຕໍ່ພັດທະນານະວັດຕະກຳໃໝ່ຂອງລົດ ອີຊູຊຸອອກມາຮັບໃຊ້ສັງຄົມລາວ ກໍຄືສັງຄົມໄທ, ຕາມວິໄສທັດຂອງບໍລິສັດທີ່ວາງໄວ້ “ຜູ້ໃຊ້ມີຄວາມສຸກ, ເພີ່ມພູນລາຍຮັບ ແລະ ຊ່ວຍສັງຄົມພັດທະນາ” ໂອກາດນີ້ຄະນະສື່ມວນຊົນລາວຍັງໄດ້ໄປຢ້ຽມຊົມໂຮງງານຜະລິດລົດ ອີຊູຊຸ ທີ່ແຂວງ ສະມຸດປາການ ແລະ ສະໜາມທົດສອບຂອງ ອີຊູຊຸ ທີ່ແຂວງພັດທະຍາອີກດ້ວຍ.