ລັດວິສາຫະກິດມີແຕ່ຫລຸບທຶນ ສ້າງພາລະໜີ້ສິນໃຫ້ລັດຖະບານ
ໂດຍ: ທິດກໍ່າ
ນັບແຕ່ປະເທດຊາດຂອງພວກເຮົາໄດ້ມີການປ່ຽນແປງໃໝ່ ໂດຍສະເພາະການປະຕິຮູບດ້ານເສດຖະກິດແຕ່ປີ 1986 ເປັນຕົ້ນມາ ການເປີດກວ້າງການລົງທຶນກໍນັບມື້ນັບຫລາຍຂຶ້ນໃນແຕ່ລະປີ, ໃນນີ້ກໍມີທັງພາຍໃນ ແລະ ຕ່າງປະເທດໄດ້ມີການລົງທຶນຢ່າງຫລວງຫລາຍ ອັນເປັນການສົ່ງເສີມ ແລະ ຊຸກຍູ້ເສດຖະກິດລາວໃຫ້ເຕີບໃຫຍ່ຂະຫຍາຍຕົວເປັນກ້າວໆມາ.
ຈາກປັດໄຈດັ່ງກ່າວ ໄດ້ມີຫລາຍພາກສ່ວນເສດຖະກິດປາກົດຕົວຂຶ້ນປານດອກເຫັດ. ບັນດາຫົວໜ່ວຍເສດຖະກິດທຸລະກິດຕ່າງໆທີ່ໄດ້ກຳເນີດເກີດຂຶ້ນນັ້ນ ກໍໄດ້ແກ່ເສດຖະກິດຂອງລັດ ຫລື ເອີ້ນວ່າ ລັດວິສາຫະກິດ, ວິສາຫະກິດລວມໝູ່ໃນຮູບແບບສະຫະກອນ, ເສດຖະກິດຂອງບຸກຄົນ ແລະ ນິຕິບຸກຄົນ. ບັນດາຫົວໜ່ວຍວິສາຫະກິດນີ້ໄດ້ມີການພົວພັນເຊື່ອມໂຍງເຊິ່ງກັນ ແລະ ກັນຢ່າງສະໜິດແໜ້ນກາຍເປັນຫ່ວງໂສ້ໃນລະບົບເສດຖະກິດຂອງປະເທດ. ໃນແຜນນະໂຍບາຍຂອງພັກ ແລະ ລັດຖະບານໃນການສ້າງສາພັດທະນາປະເທດຊາດນັ້ນ ແມ່ນຖືເອົາເສດຖະກິດຂອງລັດ ຫລືວ່າ ວິສາຫະກິດຂອງລັດເປັນຕົວແບບ ແລະ ນຳໜ້າພາທາງໃຫ້ພາກສ່ວນເສດຖະກິດອື່ນໆ ເພື່ອພ້ອມກັນກ້າວໄປສູ່ຈຸດໝາຍປາຍທາງສັງຄົມນິຍົມ.
ແຕ່ກົງກັນຂ້າມເມື່ອມາເບິ່ງໃນພຶດຕິກຳຕົວຈິງແລ້ວ, ວິສາຫະກິດຂອງລັດພັດບໍ່ໄດ້ເປັນຕົວແບບ ແລະ ນຳໜ້າພາທາງໃຫ້ພາກສ່ວນເສດຖະກິດອື່ນໆຢ່າງໜ້າເພິ່ງພໍໃຈ. ເວົ້າຢ່າງໜຶ່ງແມ່ນບໍ່ເປັນແວ່ນແຍງ ແລະ ບໍ່ເປັນທີ່ເພິ່ງໃຫ້ພາກສ່ວນເສດຖະກິດອື່ນໆຢ່າງເປັນຕົນເປັນໂຕ ເພາະຜ່ານການເຄື່ອນໄຫວທຸລະກິດແຕ່ລະໄລຍະມີແຕ່ຫລຸບທຶນກັບຫລຸບທຶນ. ນອກຈາກນັ້ນ ຍັງເປັນພາລະແບກຫາາບໃຫ້ແກ່ພັກ ແລະ ລັດຖະບານຢ່າງໜັກໜ່ວງໃນແຕ່ລະໄລຍະ.
ຫາກຕັ້ງໂຈດກັນວ່າດ້ວຍສາເຫດໃດວິສາຫະກິດຂອງລັດຈຶ່ງມີການຫລຸບທຶນຢູ່ຕະຫລອດ ຄຳຕອບໂຈດກໍຄືມີຫລາຍປັດໄຈ ແລະ ຫລາຍສາເຫດ ເປັນຕົ້ນອັນທີໜຶ່ງ ຄວາມຮັບຜິດຊອບບໍ່ຕໍ່ພັກ, ຕໍ່ລັດ ແລະ ຕໍ່ວຽກງານບໍ່ສູງ, ມີແນວເອື່ອຍອີງວ່າທຸກສິ່ງທຸກຢ່າງເປັນຂອງລັດຂອງຫລວງ, ຖ້າເກີດຫຍັງຂຶ້ນມາ ລັດຍັງມີພາລະແບກຫາບ ແລະ ອູ້ມຊູຍູ້ໜູນ. ອັນສອງມາແມ່ນມີການຊິ້ນເປືອງຫລາຍ, ໃຊ້ຄົນເຮັດວຽກບໍລິຫານຫລາຍ, ມີເສັ້ນມີສາຍ, ມີຄົນເຈົ້າຄົນຂ້ອຍ, ເປັນກຸ້ມກ້ອນ, ສໍ້ລາດບັງຫລວງ ແລະ ຫາທຸກວິທີເພື່ອຍັກຍອກສໍ້ໂກງເອົາຊັບສິນຂອງລັດເປັນຊັບສິນຂອງຕົນເອງ ແລະ ກຸ້ມກ້ອນ ດັ່ງຄຳເຫັນຂອງທ່ານ ນາຍົກລັດຖະມົນຕີ ພັນຄຳ ວິພາວັນ ເວົ້າວ່າ: ໃນການບໍລິຫານພາຍໃນບໍລິສັດ, ລັດວິສາຫະກິດ ມີແຕ່ເອົາລູກຫລານ, ຍາດຕິພີ່ນ້ອງເຂົ້າມາເຮັດວຽກ ເຫລືອນັ້ນຈັ່ງແມ່ນຄົນອື່ນ. ເວົ້າບໍ່ເຊື່ອໃຫ້ໄປກວດເບິ່ງ ວ່າຊັ້ນ ! ສ່ວນອັນທີສາມນັ້ນເວລາສະຫລຸບບັນຊີແມ່ນຫາວິທີເຮັດໃຫ້ລາຍຮັບໜ້ອຍລາຍຈ່າຍຫລາຍ ເພື່ອຕົວະການຈັດຕັ້ງ, ຕົວະພັກ, ຕົວະລັດ ເອີ້ນຢ່າງໜຶ່ງວ່າຫາວິທີໂອມເອົາເງິນສ່ວນລວມ ຫລືວ່າ ເງິນພັກ, ເງິນລັດ ແລະ ເງິນງົບຂອງຊາດ.
ຈາກສາມສາເຫດທີ່ກ່າວມານີ້, ເປັນຕົ້ນເຫດໃຫ້ວິສາຫະກິດຂອງລັດມີແຕ່ຫລຸບທຶນກັບຫລຸບທຶນ ແລະ ບໍ່ສາມາດເພິ່ງຕົນເອງກຸ້ມຕົນເອງທາງດ້ານເສດຖະກິດ, ຊ້ຳບໍ່ໜຳກາຍເປັນພາລະແບກຫາບໃຫ້ພັກ ແລະ ລັດຖະບານຢ່າງຫລີກລ່ຽງບໍ່ໄດ້. ສ່ວນວິທີແກ້ໄຂນັ້ນ ມັນກໍບໍ່ພໍມີທາງອອກ ຕົວຢ່າງຖ້າບໍລິສັດໃດຫລຸບທຶນກໍປົດຕຳແໜ່ງຜູ້ອຳນວຍການ ພ້ອມດ້ວຍພັກພວກ, ການແກ້ໄຂຕ້ອງດຳເນີນໄປຕາມກົດໝາຍຢ່າງເຄັ່ງຂັດ, ຜູ້ໃດຜິດລະບຽບຕ້ອງປັບໄໝໃສ່ໂທດ, ຜິດໜ້ອຍປັບໄໝໜ້ອຍ, ຜິດໜັກຕ້ອງຈຳຄຸກ ພ້ອມຢຶດຊັບ, ຖ້າຜິດຢ່າງມະຫັນກໍຕ້ອງຂ້າຖິ້ມ ທັງຢຶດຊັບສິນມາເປັນຂອງລັດຈຶ່ງຈະເຂັດຫລາບ.
