ອິນເຕີ ມິລານ ຄວ້າ ມະຄີຕາຢານ ອະດີດນັກເຕະແມນຢູ ເຂົ້າທີມເປັນຄົນທີ 4

ອິນເຕີ ມິລານ ສະໂມສອນດັງຈາກ ເຊເຣຍ ອາ ອິຕາລີ ປະກາດຄວ້າ ເຮນຣິກ ມະຄິຕາຢານ ມາຮ່ວມທີມແບບບໍ່ມີຄ່າຕົວ ຫລັງຈາກທີ່ກອງກາງຄົນນີ້ຫາກໍຫມົດສັນຍາກັບ ໂຣມາ ທີມຮ່ວມລີກ ອິຕາລີ.

ໂດຍລາຍງານລະບຸວ່າ ນັກເຕະທີມຊາດອາເມເນຍ ອາຍຸ 33 ປີຄົນນີ້ ຍ້າຍມາເປັນສະມາຊິກຂອງຖິ່ນຊານຊີໂຣ ດ້ວຍສັນຍາ 2 ປີ ໂດຍເວັບໄຊຂອງ ອິນເຕີ ມິລານ ອອກມາກ່າວເຖິງນັກເຕະໃຫມ່ຄົນນີ້ວ່າ : ‘‘  ມະຄີຕາຢານ ໄດ້ມາເຖິງອີກຈຸດຫນຶ່ງໃນເສັ້ນ ທາງຂອງເຮົາ ດ້ວຍການເປັນສະມາຊິກໃຫມ່ຂອງເນຣັສຊູຣີ ດ້ວຍເຊື້ອສາຍອາເມເນຍ ຂອງລາວ ເຮັດໃຫ້ພວກເຮົາຄິດເຖິິງຕຳນານ ຂອງອິນເຕີ ມິລານ ເຊັ່ນ ຢູຣິ ຈໍເກຟ ’’.

ສຳລັບ ມະຄີຕາຢານ ຖືເປັນນັກເຕະລາຍທີ 4 ທີ່ອິນເຕີ ມິລານ ຄວ້າຕົວມາຮ່ວມທີມໃນລະດູການນີ້ ຕໍ່ຈາກ ໂຣເມຣູ ລູກາກູ ຈາກເຊລຊີ, ຄຣິສຕຽນ ອັສລານີ ຈາກເອັມໂປລີ ແລະ ອັງເດຣ ໂອນານາ ຈາກອາແຈັກ ອຳເຕີດຳ.