WHO ເຕືອນເອີຣົບເລັ່ງສະກັດ “ໝາກສຸກລີງ” ຫລັງຈຳນວນຜູ້ຕິດເຊື້ອເພີ່ມຂຶ້ນ 3 ເທົ່າ ໃນເວລາພຽງສອງອາທິດ
ອົງການອະນາໄມໂລກ (WHO) ຮຽກຮ້ອງໃຫ້ປະເທດໃນເອີຣົບເລັ່ງດຳເນີນການຢ່າງຮີບດ່ວນເພື່ອສະກັດການລະບາດຂອງ “ພະຍາດໝາກສຸກລີງ” (Monkeypok) ຫລັງພົບຜູ້ຕິດເຊື້ອເພີ່ມຂຶ້ນເຖິງ 3 ເທົ່າໃນໄລຍະສອງອາທິດຜ່ານມາ.
ທ່ານ ຮານ ຄລູເກີ ຜູ້ອຳນວຍການອົງການອະນາໄມໂລກປະຈຳພາກພື້ນເອີຣົບ ເປີດເຜີຍວ່າ: ຜູ້ຕິດເຊື້ອພະຍາດໝາກສຸກລີງທົ່ວໂລກໃນປັດຈຸບັນ 90% ຢູ່ໃນພາກພື້ນເອີຣົບ ເຊິ່ງພົບຜູ້ຕິດເຊື້ອແລ້ວໃນ 31 ປະເທດ ແລະ ກຳລັງເພີ່ມຂຶ້ນຕໍ່ເນື່ອງ.
ທັງນີ້, ຈາກການເປີດເຜີຍຂອງສູນຄວບຄຸມ ແລະ ປ້ອງກັນພະຍາດອາເມລິກາ (CDC) ທົ່ວໂລກພົບຜູ້ຕິດເຊື້ອພະຍາດໝາກສຸກລີງແລ້ວ 5.000 ກວ່າຄົນໃນ 51 ປະເທດ ໂດຍມີຜູ້ຕິດເຊື້ອປະມານ 10% ຕ້ອງເຂົ້າຮັບການປິ່ນປົວໃນໂຮງໝໍ, ແຕ່ຍັງບໍ່ມີລາຍງານຜູ້ເສຍຊີວິດ ນັບແຕ່ພົບການລະບາດນອກທະວີບອາຟຣິກາຄັ້ງທຳອິດໃນເດືອນພຶດສະພາ.
ທ່ານ ຄລູເກີ ລະບຸວ່າ: ຜູ້ຕິດເຊື້ອພະຍາດໝາກສຸກລີງສ່ວນຫລາຍ 99% ເປັນເພດຊາຍທີ່ມີປະຫວັດມີເພດສຳພັນເພດດຽວກັນ. ຂະນະທີ່ການຕິດຕໍ່ໃນກຸ່ມສະມາຊິກຄອບຄົວດຽວກັນ ແລະ ຜູ້ຕິດເຊື້ອເດັກມີຈຳນວນໜ້ອຍ ໂດຍອາການທີ່ພົບຄື ເປັນໄຂ້, ຜື່ນຂຶ້ນຕາມຕົວ, ເມື່ອຍ, ປວດກ້າມຊີ້ນ, ຮາກ ແລະ ໜາວສັ່ນ.
ເຖິງຢ່າງໃດກໍຕາມ, ອົງການອະນາໄມໂລກລະບຸໃນວັນທີ 25 ມິຖຸນາວ່າ: ການແພ່ລະບາດຂອງພະຍາດໝາກສຸກລີງຍັງບໍ່ຈັດເປັນພາວະສຸກເສີນດ້ານສາທາລະນະສຸກສາກົນ ເຊິ່ງເປັນການເຝົ້າລະວັງລະດັບສູງສຸດຂອງອົງການອະນາໄມໂລກ, ແຕ່ແນະນຳໃຫ້ເຝົ້າລະວັງການລະບາດຂອງພະຍາດຢ່າງໃກ້ຊິດ.
ອ້າງອີງ:
https://www.washingtonpost.com/…/8230cff6-f944-11ec…
https://www.aljazeera.com/…/who-calls-for-urgent-action…
