ເຕືອນໄພ ! ລະວັງຕົກເປັນເຫຍື່ອກຸ່ມຄົນຫລອກລວງທາງອອນລາຍ
ປັດຈຸບັນນີ້ເກີດມີການສໍ້ໂກງຊັບກັນທາງອອນລາຍມີຫລາຍຮູບແບບ ຈະຍົກຕົວຢ່າງໃຫ້ເຫັນ 3 ຮູບແບບຄື:
1. ການຕັ້ງເພຈຂາຍເຄື່ອງຕ່າງໆໂດຍການໂພສຮູບສິນຄ້າຕ່າງໆ ທັງໆທີ່ຜູ້ກ່ຽວບໍ່ມີເຄື່ອງຢູ່ຈິງ ເປັນການຕົວະໃຫ້ຄົນຫລົງເຊື່ອແລ້ວໂອນເງິນເພື່ອສັ່ງຊື້ສິນຄ້າ ແຕ່ສຸດທ້າຍບໍ່ໄດ້ສິນຄ້າຈາກແມ່ຄ້າ ຊ້ຳບໍ່ໜ້ຳຖືກແມ່ຄ້າບັອກຊ່ອງທາງການຕິດຕໍ່ທຸກທາງທີ່ເຄີຍຕິດຕໍ່ກັບແມ່ຄ້າ ສຸດທ້າຍບໍ່ໄດ້ເງິນທີ່ໂອນໄປນັ້ນຄືນ.
2. ການສ້າງເພຈເປັນສະຖາບັນການເງິນປ່ອຍສິນເຊືອໂດຍດອກເບ້ຍຕ່ຳສ້າງຄວາມຈູງໃຈໃຫ້ຜູ້ທີ່ເດືອດຮ້ອນມີຄວາມຈຳເປັນຕ້ອງໃຊ້ເງິນເພື່ອແກ້ໄຂຄວາມຫຍຸ້ງຍາກຂອງຊີວິດ ຊ້ຳພັດມາຕົກຫລຸມກົນໂກງຂອງຄົນບໍ່ດີ ຈາກທີ່ຈົນຢູ່ແລ້ວພັດມາຈົນເພີ່ມ ຍ້ອນຫລົງເຊື່ອກົນອຸບາຍທີ່ພວກເຂົາອຸປະໂຫລກຂຶ້ນມາ. ວິທີການຂອງຄົນກຸ່ມນີ້ແມ່ນຕົວະໃຫ້ຜູ້ທີ່ສົນໃຈຈະກູ້ເງິນຕ້ອງປະກອບເອກະສານເພື່ອຂໍກູ້ເງິນແລ້ວສົ່ງໄປໃຫ້ສະຖານບັນທີ່ເຂົາສ້າງຂຶ້ນມາ (ບໍ່ມີຕົວຕົນຢູ່ຈິງ) ແລ້ວແນະນຳວິທີການຄື: ທ່ານສາມາດກູ້ໄດ້ສູງສຸດ 20 ລ້ານກີບ ດອກ 0.5% ຕໍ່ເດືອນ ສາມາດຜ່ອນຍາວເຖິງ 24 ເດືອນ ຫາກມີຄົນຕິດກັບດັກກໍຈະຂໍຂໍ້ມູນສ່ວນຕົວທີ່ສຳຄັນເຊັ່ນ ຊື່, ທີ່ຢູ່, ບັດປະຈຳຕົວ ແລະ ບັນຊີ ຫລັງຈາກນັ້ນກໍຖ້າກວດສອບພາຍໃນ 15 ນາທີ ເມື່ອກວດສຳເລັດກໍຈະໄດ້ເສຍເງິນຄ່າທຳນຽມອະນຸມັດການປ່ອຍກູ້ເລີ່ມຕົ້ນແຕ່ 3 ແສນ ຫາ 1 ລ້ານກີບ. ການສໍ້ໂກງນີ້ແມ່ນໃຊ້ຮູບການຕົວະເອົາເງິນຄ່າອະນຸມັດໃນການປ່ອຍກູ້ ເມື່ອຜູ້ກູ້ຫລົງເຊື່ອແລ້ວໂອນເງິນຄ່າອະນຸມັດເອກະສານແລ້ວຫລັງຈາກນັ້ນກໍຈະມິດຈ້ອຍໄປເລີຍ.
3 ການປະກາດຊື້ບັນຊີ “ວີແຊັດ” ສ່ວນໂຕໂດຍໃຫ້ລາຄາສູງ ທັງໆຜູ້ທີ່ປະກາດຮັບຊື້ ແລະ ຜູ້ຂາຍໃຫ້ຍັງບໍ່ສາມາດຮູ້ເລີຍວ່າວີແຊັດດັ່ງກ່າວນັ້ນຜູ້ທີ່ຮັບຊື້ໄປນັ້ນຊື້ໄປເພື່ອຈຸດປະສົງຫຍັງ ຮູ້ແຕ່ວ່າໂຕເອງໄດ້ເງິນລະເຮັດ ລະຂາຍ ສ່ວນຜູ້ປະກາດຊື້ເຫັນວ່າມີກຳໄລຈາກການສະແຫວ່ງຫາກໍເຮັດໄປ ເພື່ອນຳໄປຂາຍຕໍ່ໃຫ້ກຸ່ມຄົນໜຶ່ງອີກ ແລະ ອາດບໍ່ໄດ້ຄິດເຖິງຜົນກະທົບທີ່ຈະຕາມມາໃນພາຍຫລັງ ຍ້ອນວີແຊັດທີ່ຕົນຂາຍໄປນັ້ນ ຜູ້ຊື້ໄດ້ນຳໄປສ້າງຄວາມເສຍຫາຍຮ້າຍແຮງທາງດ້ານການເງິນ ຫລື ທາງດ້ານອື່ນໆທີ່ຜິດກົດໝາຍ.
ນອກຈາກ3ຮູບການໂກງທີ່ກ່າວມານັ້ນຍັງມີອີກຫລາຍຮູບການທີ່ຄົນບໍ່ດີຈຳນວນໜຶ່ງໄດ້ຕັ້ງກຸ່ມຂຶ້ນມາເພື່ອສໍ້ໂກງສ້າງຜົນປະໂຫຍດໃຫ້ຕົວເອງ ແລະ ສ້າງຄວາມທຸກຄວາມເດືອນຮ້ອນໃຫ້ຄົນອື່ນ ແລະ ສ້າງຄວາມວຸ່ນວາຍໃຫ້ສັງຄົມ.
ດັ່ງນັ້ນ, ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີເຫລົ່ານັ້ນ ຜູ້ໃຊ້ສື່ສັງຄົມອອນລາຍຕ້ອງມີສະຕິລະມັດລະວັງຕົວສູງ ໂດຍການບໍ່ຫລົງເຊື່ອສິ່ງທີ່ລໍ້ລວງໄດ້ງ່າຍເຊັ່ນ ການສະເໜີໃຫ້ເງິນຈຳນວນຫລາຍ, ດອກເບຍເງິນຝາກສູງ, ດອກເບ້ຍເງິນກູ້ຕໍ່າ, ການໂພສຂາຍສິນຄ້າລາຄາຖືກ ແລະ ອື່ນໆ ທີ່ເຫັນວ່າບໍ່ສອດຄ່ອງກັບຄວາມເປັນຈິງ.
