ຈັບຜູ້ຖືກຫາລັກຊັບ ແລະ ກຸ່ມແກ້ງໄດ້ 7 ຄົນ ກໍ່ເຫດມາແລ້ວນັບໄດ້ 21 ຄັ້ງ
ພັທ ບຸນເພັງ ວໍລະລາດ ຮອງຫົວໜ້າ ໃຫ້ສຳພາດວ່າ ເວລາ 7: 48 ໂມງ ວັນທີ 11 ມິຖຸນາ 2022 ປກສ ເມືອງສີໂຄດຕະບອງ ນະຄອນຫຼວງວຽງຈັນໄດ້ຮັບແຈ້ງມີເຫດການລັກຊັບພົນລະເມືອງ (ລົດຈັກ) ຢູ່ໂຮງແຮມດາວຄໍາ ຈິ່ງໄດ້ສົມທົບກັບ ປກສ ກຸ່ມໜອງດ້ວງ ລົງເກັບກຳຂໍ້ມູນ ແລະ ມີຫຼັກຖານ ສາມາດກຳນົດໄດ້ເປົ້າໝາຍກໍ່ການກະທຳຜິດ; ຕົກມາຮອດເວລາ 9:00 ໂມງວັນດຽວກັນ ຈິ່ງໄດ້ເຂົ້າກວດຄົ້ນຫ້ອງແຖວ ເຂດບ້ານໜອງດ້ວງເໜືອ ເມືອງສີໂຄດຕະບອງ ແລະ ໄດ້ຈັບຕົວທ້າວ ກົບນ້ອຍ ອາຍຸ 32 ປີ ອາຊີບແປພາສາ ບ້ານພູໝອກ ເມືອງ ແລະ ແຂວງຫຼວງພະບາງ ກວດຄົ້ນພົບເຫັນລົດຈັກ ຊູມເມີເອັກ ໝາຍເລກທະບຽນ ຕກ 5264 ກໍາແພງນະຄອນ ທີ່ຜູ້ກ່ຽວລັກມາຈາກໂຮງແຮມດາວຄຳ, ປືນສັ້ນ 9 mm 1 ກະບອກ, ປືນຫັນລີ 1 ກະບອກ, ປືນ GLOCK 19 ສີດໍາ 1 ກະບອກ, ລູກປືນ 8 ລູກ ແລະ 1 ກັບ, ຜົງສີຂາວ 1 ຖົງນ້ອຍ, ໂທລະສັບ 4 ໜ່ວຍ, ເງິນ 750.000 ກີບ ມາດຳເນີນຄະດີ.
ເເລະ ຢູ່ໃນເດືອນດຽວກັນ ເຈົ້າໜ້າທີ່ເມືອງດັ່ງກ່າວ ໄດ້ສືບຕໍ່ແກ້ໄຂຈັບກຸ່ມແກ້ງຊີງຊັບໄດ້ 8 ຄົນ ຄື:
– ທ້າວ ອາເຫຼັກ ຫວ່າງງານ ຢູ່ບ້ານຮ່ອງສຸພາບ ເມືອງໄຊເສດຖາ ນວ
– ທ້າວ ສົມສະຫວາດ ຫຼື ເດຍ ຫວ່າງງານ ຢູ່ບ້ານສີບຸນເຮືອງທ່າ ເມືອງສີໂຄດຕະບອງ
– ທ້າວ ພົມມະລາ ຫຼື ກູດ ຫວ່າງງານ ຢູ່ບ້ານທົ່ງຂັນຄຳ ເມືອງຈັນທະບູລີ
– ທ້າວ ມ້ອນ ຫວ່າງງານ ບ້ານໂຊກໃຫ່ຍ ເມືອງໄຊເສດຖາ
– ທ້າວ ເສືອ ຫວ່າງງານ ບ້ານໂຊກນ້ອຍ, ທ້າວ ຊະນະໄຊ ຫຼື ດຳ ຫວ່າງງານ ບ້ານໜອງສະໂນຄຳ ເມືອງສີໂຄດຕະບອງ
– ທ້າວ ພອນປະເສີດ ຫຼື ຕິກ ຫວ່າງງານ ບ້ານປາກທ້າງ
– ທ້າວ ອາລິສາ ຫຼື ໂນ່ງ ຫວ່າງງານ ບ້ານຮ່ອງແຊງ ມາດຳເນີນຄະດີ ຖານຊີງຊັບພົນລະເມືອງ.
ຜ່ານການສືບສວນ ພວກກ່ຽວໃຫ້ການຮັບສາລະພາບວ່າ: ໄລຍະຜ່ານມາໄດ້ຮ່ວມກັນຍາດຊິງຊັບ ຢູ່ຫຼາຍຈຸດໃນພື້ນທີ່ນະຄອນຫຼວງວຽງຈັນ ມາແລ້ວ 21 ຄັ້ງ, ສ້າງຄວາມເສຍຫາຍ ເງິນ 61 ລ້ານກວ່າ ກີບ, 33.000 ບາດ, 3.850 ຢວນ, ປືນສັ້ນ 1 ກະບອກ, ໂທລະສັບ 16 ໜ່ວຍ ແລະ ເອກະສານອີກຈຳນວນໜຶ່ງ, ມີຜູ້ເຄາະຮ້າຍໄດ້ຮັບບາດເຈັບສົມຄວນຈາກການຍາດຊີງ 5 ຄົນ, ຍິງ 3 ຄົນ ພາຍຫຼັງໄດ້ເງິນມາແລ້ວ ເອົາມາແບ່ງກັນໃຊ້ຈ່າຍ ຫຼິ້ນກິນຈົນໝົດ.
ປັດຈຸບັນ ເຈົ້າໜ້າທີ່ພວມເລັ່ງຕິດຕາມ ເພື່ອນຳຈັບກຸ່ມແກ້ງຮ່ວມຂະບວນການ ມາດຳເນີນຄະດີຕາມຂັ້ນຕອນຂອງກົດໝາຍ.
