ອີຢິບເຜີຍ “ເມືອງຫລວງໃໝ່” ໄລຍະທຳອິດ ສຳເລັດກວ່າ 70% ແລ້ວ
ວັນທີ 26 ມິຖຸນາຜ່ານມາ, ຄະນະລັດຖະບານອີຢິບປະກາດວ່າ: ວຽກໂຄງສ້າງໄລຍະທີ 1 ຂອງການກໍ່ສ້າງເມືອງຫລວງບໍລິຫານແຫ່ງໃໝ່ (NAC) ຂອງປະເທດ ສຳເລັດຫລາຍກວ່າ 70% ແລ້ວ.
ນິວ ແອດມິນິສເທຣທີບ ແຄປິຕັລ ຄອມປານີ (New Administrative Capital Company) ບໍລິສັດຂອງລັດທີ່ເບິ່ງແຍງການກໍ່ສ້າງດັ່ງກ່າວ ລະບຸວ່າ: ວຽກໂຄງສ້າງໄລຍະທີ 1 ໃນເນື້ອທີ່ 101.000 ໄລ່ ສຳເລັດສົມບູນຫລາຍກວ່າ 70%.
ຖະແຫລງການຈາກສູນສື່ມວນຊົນປະຈຳຄະນະລັດຖະບານອີຢິບ ເຜີຍວ່າ: ການກໍ່ສ້າງເຂດທີ່ຢູ່ອາໄສ 10 ແຫ່ງສຳເລັດປະມານ 70-90%. ຂະນະທີ່ໂຄງການຂະໜາດໃຫຍ່ຈຳນວນໜຶ່ງໃກ້ສຳເລັດແລ້ວເຊັ່ນກັນເຊັ່ນ: ເຂດເຮັດວຽກຂອງລັດຖະບານ, ເຂດການເງິນ ແລະ ທຸລະກິດ ລວມທັງເຂດສູນກາງທຸລະກິດການຄ້າ (CBD).
ສຳລັບເຂດສູນກາງທຸລະກິດການຄ້າຖືກສ້າງຂຶ້ນຫ່າງຈາກນະຄອນຫລວງໄຄໂຣໄປທາງຕາເວັນອອກປະມານ 50 ກິໂລແມັດ ໂດຍມີຕຶກສູງໂດດເດັ່ນທີ່ສຸດໃນເຂດນີ້ຄືຫໍຄອຍໄອຄໍນິກ (Iconic Tower) ເຊິ່ງກໍ່ສ້າງໂດຍບໍລິສັດວິສະວະກຳການກໍ່ສ້າງແຫ່ງລັດຂອງຈີນ (CSCEC). ເມືອງຫລວງບໍລິຫານແຫ່ງໃໝ່ຂອງອີຢິບຈະເປັນທີ່ຕັ້ງຂອງສະຖາບັນສຳຄັນຕ່າງໆຂອງລັດຖະບານ ເຊິ່ງຍ້າຍມາຈາກນະຄອນຫລວງໄຄໂຣທີ່ມີຄວາມແອອັດ ແລະ ມີປະຊາກອນໜາແໜ້ນ ໂດຍຈຳນວນປະຊາກອນໃນໄຄໂຣມີອັດຕາເຖິງ 1 ໃນ 5 ຂອງຈຳນວນປະຊາກອນລວມ 100 ລ້ານຄົນທົ່ວປະເທດ.
ທັງນີ້, ລັດຖະບານອີຢິບຄາດວ່າເມືອງຫລວງໃໝ່ນີ້ຈະສ້າງຕຳແໜ່ງວຽກໃຫ້ປະຊາຊົນປະມານ 2 ລ້ານຕຳແໜ່ງ.
ອ້າງອີງ:
