ຢາກໃຫ້ເສດຖະກິດຂັບເຄື່ອນໄວ ຕ້ອງເອົາບຸກຄະລາກອນເປັນປັດໄຈຕົວຊີ້ວັດ

ໂດຍ: ທິດກໍ່າ

ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໜຶ່ງໃນບັນຫາທີ່ຍົກຂຶ້ນມາເປັນປະເດັນນັ້ນ ກໍແມ່ນບຸກຄະລາກອນ. ອັນສາເຫດກໍຍ້ອນວ່າ ບຸກຄະລາກອນເປັນປັດໄຈອັນສຳຄັນຕົ້ນຕໍໃນການຂັບເຄື່ອນເສດຖະກິດ ກໍຄືການສ້າງສາພັດທະນາປະເທດຊາດ, ປະເທດຊາດຈະກ້າວໜ້າ ທັນສະໄໝກໍແມ່ນບຸກຄະລາກອນ ຫລືວ່າ ຄົນ ເປັນຂອດຕັດສິນຊີ້ຂາດ. ເໝືອນດັ່ງປັດຊະຍາວັດຖຸນິຍົມປະຫວັດສາດໄດ້ກ່າວໄວ້ວ່າ: “ຄົນເປັນຜູ້ສ້າງປະຫວັດສາດ”.

ເພາະສະນັ້ນ, ການປະຕິບັດໜ້າທີ່ການເມືອງ ກໍຄືພາລະໜ້າທີ່ຄວາມຮັບຜິດຊອບຕໍ່ພາລະກິດຂອງພັກ ແລະ ລັດຖະບານ ກໍຄືພາລະກິດຂອງຊາດ ແລະ ປະຊາຊົນໄດ້ມອບໝາຍໃຫ້ນັ້ນ ແມ່ນໜ້າທີ່ອັນໜັກໜ່ວງຈຳເປັນຢ່າງພາວະວິໄສຂອງບຸກຄະລາກອນທີ່ໄດ້ຖືກມອບໝາຍ. ຕົວຢ່າງການປະປ່ອຍໃຫ້ເງິນເຟີ້ຖີບຕົວສູງຂຶ້ນໃນແຕ່ລະວັນຢ່າງຜິດປົກກະຕິ. ບັນຫາການຄຸ້ມຄອງເງິນບໍ່ເປັນໄປຕາມຕົວບົດກົດໝາຍ ທັງປະປ່ອຍໃຫ້ຮ້ານແລກປ່ຽນເອກະຊົນດຳເນີນທຸລະກິດ ແລະ ທຸລະກຳເງິນແປປ່ຽນ, ປັ່ນປ່ວນໃນສັງຄົມແຕ່ລະວັນແບບລອຍນວນຕາມໃຈຂອງພວກຫາຜົນປະໂຫຍດມາໃຫ້ກຸ່ມກ້ອນ ແລະ ພັກພວກ. ນອກຈາກນັ້ນກໍອະນຸມັດ, ຈັດຕັ້ງໃຫ້ຮ້ານແລກປ່ຽນເງິນຕາທີ່ບໍ່ແມ່ນທະນາຄານເກີດຂຶ້ນປານດອກເຫັດ.

ສ່ວນບັນຫາການຄຸ້ມຄອງລາຄາສິນຄ້າບໍ່ໄດ້, ລາຄາສິນຄ້າຖີບຕົວສູງຂຶ້ນໃນແຕ່ລະວັນຈົນຫູດັບຕັບໄໝ້. ສະຫລຸບແລ້ວມີແຕ່ມະຕິຄຳສັ່ງ ແລະ ຂໍ້ກຳນົດອອກມາໃນແຕ່ລະໄລຍະແຕ່ບໍ່ສາມາດປະຕິບັດໄດ້ຢ່າງເດັດຂາດ ແລະ ເປັນຮູບປະທຳດີຂຶ້ນ. ອັນສຳຄັນໂດດເດັ່ນທີ່ສຸດແມ່ນເລື່ອງນ້ຳມັນຂາດປ້ຳ ກາຍເປັນບັນຫາວິກິດຮ້າຍແຮງຕໍ່ສັງຄົມລາວຢ່າງໃຫຍ່ຫລວງ. ສະແດງໃຫ້ເຫັນວ່າບຸກຄະລາກອນບໍ່ສາມາດເປັນທີ່ເພິ່ງຂອງປະຊາຊົນ ແລະ ບໍ່ຈົງຮັກພັກດີຕໍ່ພັກ, ຕໍ່ລັດຖະບານ, ຕໍ່ຊາດ ແລະ ຕໍ່ປະຊາຊົນ ເພາະພາກສ່ວນກ່ຽວຂ້ອງກັບເງິນຕາ ແລະ ລາຄາສິນຄ້າຄືກະດູກສັນຫລັງ ທັງເປັນຂໍກຸນແຈເຮັດໃຫ້ເສດຖະກິດມະຫາພາກ ແລະ ລະບົບເສດຖະກິດຂອງຊາດກ້າວໜ້າ ແລະ ຮັ່ງມີດີຂຶ້ນຕາມແຜນພັດທະນາເສດຖະກິດ-ສັງຄົມຂອງປະເທດ.

ຫາກຕັ້ງໂຈດກັນວ່າ, ຕົ້ນເຫດຂອງບັນຫາມັນເກີດມາຈາກໃສ. ຄຳຕອບກໍຄື ມັນມາຈາກບຸກຄະລາກອນທີ່ຮັບຜິດຊອບດ້ານນີ້ ນັບແຕ່ຂັ້ນລັດຖະມົນຕີລົງໄປຮອດຫົວໜ້າກົມ ຕະຫລອດຮອດບຸກຄະລາກອນຊ່ວຍວຽກ ເຊິ່ງບໍ່ມີຄວາມຮັບຜິດຊອບຕໍ່ໜ້າທີ່ການເມືອງທີ່ພັກ-ລັດຖະບານ ກໍຄືປະຊາຊົນໄດ້ມອບໝາຍໃຫ້.

ເພາະສະນັ້ນ, ການປັບປ່ຽນບຸກຄະລາກອນບາງຂະແໜງການມັນເປັນການເໝາະສົມ ເປັນການຕັດສິນໃຈທີ່ຖືກຕ້ອງສອດຄ່ອງຂອງພັກ ແລະ ລັດຖະບານໃນເງື່ອນໄຂປະເທດຊາດຂອງພວກເຮົາພວມຕົກຢູ່ໃນເງື່ອນໄຂເສດຖະກິດບອບບາງ ແລະ ອາດກ້າວໄປສູ່ຂັ້ນວິກິດທີ່ຮ້າຍແຮງ ຖ້າບໍ່ມີວິທີແກ້ໄຂໂດຍໄວ. ນອກຈາກນັ້ນ ກໍເພື່ອເປັນການປົກປ້ອງກົດໝາຍໃຫ້ມີຜົນສັກສິດ ເຮັດໃຫ້ ສປປ ລາວ ກາຍເປັນລັດແຫ່ງກົດໝາຍຢ່າງແທ້ຈິງ.

ດ້ວຍເຫດຜົນທີ່ໄດ້ກ່າວມາຂ້າງເທິງນັ້ນ, ເຮົາຈຶ່ງຮັບຮູ້ ແລະ ເຫັນວ່າບຸກຄະລາກອນທີ່ຈະຄັດເອົາມາບໍລິຫານບ້ານເມືອງເພື່ອຂັບເຄື່ອນເສດຖະກິດຂອງຊາດນັ້ນມັນມີຄວາມສຳຄັນຍິ່ງ, ມັນພົວພັນເຖິງຄຸນສົມບັດ, ຄວາມສັດຊື່ບໍລິສຸດຕໍ່ຊາດ, ຮັບໃຊ້ປະຊາຊົນ, ຈົງຮັກພັກດີຕໍ່ພັກ, ຕໍ່ລັດ, ບໍ່ເຫັນແກ່ຜົນປະໂຫຍດສ່ວນຕົວຈົນເກີນເຫດ. ດັ່ງຄຳສຸພາສິດລາວເຄີຍເວົ້າວ່າ: “ຢ່າເຫັນແກ່ເງິນແສນໄຖ່ ຕ້ອງເຫັນແກ່ໄພ່ແສນເມືອງ” ເຊິ່ງມັນຕົກຢູ່ໃນເຄືອຂ່າຍສໍ້ລາດບັງຫລວງ ແລະ ສໍ້ຫລວງບັງລາດ.

ເພາະສະນັ້ນ ຈຶ່ງເວົ້າໄດ້ວ່າບຸກຄະລາກອນເປັນປັດໄຈ ແລະ ຕົວການທີ່ສຳຄັນໃນການຂັບເຄື່ອນເສດຖະກິດຂອງຊາດ ໂດຍສະເພາະແມ່ນບັນດາກະຊວງທີ່ນອນຢູ່ໃນກຸ່ມເສດຖະກິດ ເປັນຕົ້ນກະຊວງອຸດສາຫະກຳ ແລະ ການຄ້າ, ກະຊວງການເງິນ, ທະນາຄານ ຍິ່ງມີຄວາມສຳຄັນຕໍ່ການບໍລິຫານຈັດການໃນເລື່ອງເສດຖະກິດການເງິນຂອງປະເທດ. ກົງກັນຂ້າມຖ້າສ່ວນນີ້ບໍ່ເປັນທີ່ເພິ່ງຂອງປະຊາຊົນແລ້ວອາດພາໃຫ້ເສດຖະກິດຂອງປະເທດຊາດຈິບຫາຍວາຍວອດ.