ສສຊ ຍັງເປັນຫ່ວງບັນຫາການຄຸ້ມຄອງເງິນຕາຕ່າງປະເທດ
ພາຍຫຼັງທ່ານ ບຸນເຫຼືຶອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຂຶ້ນສະເໜີກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ ຕໍ່ກອງປະຊຸມສະໄໝສາມັນເທື່ອທີ 3 ຂອງ ສະພາແຫ່ງຊາດ ຊຸດທີ IX ໃນວັນທີ 28 ມິຖຸນານີ້ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະ ທານສະພາແຫ່ງຊາດ, ບັນດາສະມາຊິກສະພາແຫ່ງຊາດ ໄດ້ພ້ອມກັນປະກອບຄຳຄິດຄຳເຫັນຢ່າງກົງໄປກົງມາເພື່ອໃຫ້ມີເນື້ອໃນຮັດກຸມ, ຖືກຕ້ອງ ແລະ ການຈັດຈັດຕັ້ງປະບັດໃຫ້ສອດຄ່ອງກັບສະພາບປັດຈຸບັນ.
ພົນຈັດຕະວາ ມາລາ ວໍລະຈິດ ສະມາຊິກສະມາແຫ່ງຊາດເຂດເລືອກຕັ້ງທີ 13 ແຂວງສະຫວັນນະເຂດ ກ່າວຫລັງຄົ້ນຄວ້າເນື້ອໃນແຕ່ລະພາກ, ແຕ່ລະໝວດ, ແຕ່ລະມາດຕາໂດຍສົມທຽບກັັບສະພາບຄວາມເປັນຈິງພຶດຕິກຳຄຸ້ມຄອງເງິນຕາຕ່າງປະເທດຢູ່ປະເທດເຮົາວ່າ: ຫຼັກການ ແລະ ລະບຽບການການນໍາໃຊ້ເງິນຕາຕ່າງປະເທດຕ້ອງໜັກແໜ້ນ ແລະ ຮັດກຸມຂຶ້ນຕື່ມ ໂດຍສະເພາະມາດຕາ 8 ແລະ 9 ຊຶ່ງສອງມາດຕານີ້ໄດ້ຕອບໂຈດຕໍ່ສັງຄົມທີ່ເປັນຫ່ວງຕໍ່ການຄຸ້ມຄອງເງິນຕ່າງປະເທດຢູ່ປະເທດເຮົາ. ແນວໃດກໍດີເຫັນວ່າເປັນເນື້ອໃນທີ່ສຳຄັນ ແລະ ຈະແຈ້ງ ສະແດງເຖິງຄວາມເຂັ້ມແຂງໃນການຄຸ້ມຄອງຂອງລັດໃນຂົງເຂດເງິນຕາຕ່າງປະເທດ, ແຕ່ຍັງເປັນຫ່ວງໃນການຈັດຕັ້ງປະຕິບັດຕົວຈິງ ໂດຍສະເພາະຢູ່ມາດຕາ 8 ໄດ້ກຳນົດເຖິງການຄຸ້ມຄອງເງິນຕາຕ່າງປະເທດ ທີ່ບົ່ງບອກວ່າການຖືຄອງເງິນສົດ ຫຼື ບັນຊີເງິນຝາກ, ແຕ່ໃນດ້ານການຄຸ້ມຄອງເງິນສົດນີ້ມີຢູ່ໃນນິຕິກຳໃຕ້ກົດໝາຍແລ້ວ ແຕ່ຂໍໃຫ້ລະບຸວ່າ ຄຸ້ມຄອງແບບໃດ ເພາະຜ່ານມາເຫັນວ່າ ໄດ້ນຳເງິນຕາຕ່າງປະເທດອອກໄປ ຊຶ່ງຍັງເປັນບັນຫາທ້າທາຍ.
ທ່ານ ຄຳໄຕ ແກ້ວດວງດີ ສະມາຊິກສະພາແຫ່ງຊາດເຂດເລືອກຕັ້ງທີ 15 ແຂວງຈຳປາສັກ ກ່າວເຖິງນິ ຍາມມາດຕາ 3 ຂໍ້ 9 ຜູ້ໃຫ້ບໍລິການຊຳລະ ໝາຍເຖິງ ທະນາຄານທຸລະກິດ ຫຼື ນິຕິບຸກຄົນອື່ນ ຊຶ່ງຄຳວ່ານິຕິບຸກຄົນອື່ນນີ້ໄດ້ສ້າງບັນຫາໃຫ້ສັງຄົມເຮົາມີສະພາບບໍ່ປົກກະຕິໃນປັດຈຸບັນ ດັ່ງກ່າວຂໍໃຫ້ຕັດຄຳວ່ານິຕິ ບຸກຄົນອື່ນອອກ ໂດຍໃຫ້ໄປຜັນຂະຫຍາຍຢູ່ນິຕິກຳໃຕ້ກົດໝາຍເພາະຜ່ານມາ ທະນາຄານ ໄດ້ສະເໜີຕໍ່ສະພາວ່າ: ຈະບໍ່ໃຫ້ມີຮ້ານແລກປ່ຽນ ຫຼື ຫາກມີໃຫ້ມີໜ້ອຍທີ່ສຸດ, ແຕ່ມາຮອດປັດຈຸບັນເພີ່ມຂຶ້ນຫຼາຍເທົ່າ ຫຼື ຖ້າຈະຮັກສາໄວ້ຜູ້ໃຫ້ບໍລິການຕ້ອງໃຊ້ມາດຕະຖານດຽວກັບທະນາຄານແຫ່ງ ສປປ ລາວ ທີ່ໄດ້ກຳນົດໃຫ້ທະນາຄານທຸລະກິດ ປະກາດໃຊ້ຕາມອັດຕາແລກປ່ຽນ.
ສ່ວນມາດຕາ 16 ວັກ 2 ໄດ້ກຳນົດໃຫ້ຜູ້ອອກ ແຮງງານລາວທີ່ໄປເຮັດວຽກຢູ່ຕ່າງປະເທດຕ້ອງໂອນເງິນລາຍຮັບທີ່ເປັນຄ່າແຮງ ແລະ ອື່ນໆເຂົ້າ ສປປ ລາວ ຜ່ານຜູ້ບໍລິການຊຳລະ ໂດຍຈຸດນີ້ທະນາຄານຕ້ອງໄດ້ເປີດໃຈໃຫ້ກວ້າງ ເພື່ຶອເຮັດແນວໃດໃຫ້ລູກຫຼານເຮົາທີ່ໄປເຮັດວຽກຢູ່ຕ່າງປະເທດໄດ້ໂອນເງິນເຂົ້າມາລາວເຮົາໃຫ້ສອດຄ່ອງຖືກຕ້ອງຕາມລະບົບ ແລະ ລະ ບຽບກົດໝາຍ.
