ປກສ ກຸ່ມວັດຈັນ ສົ່ງຕົວຄົນເລ່ລ່ອນ ແລະ ບ້າໃບ້ເສຍຈິດ 12 ຄົນ ເຂົ້າສູນສົງເຄາະ
ວັນທີ 23 ມິຖຸນາ 2022 ປກສ ກຸ່ມວັດຈັນ ເມືອງຈັນທະບູລີ ສົມທົບກັບອໍານາດອົງການປົກຄອງບ້ານ, ຫ້ອງການແຮງງານເມືອງ ແລະ ພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ລົງກວດກາແກ້ໄຂຄົນເລ່ລ່ອນ ແລະ ຄົນບ້າໃບ້ເສຍຈິດທີ່ຢູ່ໃນພື້ນທີ່ກຸ່ມວັດຈັນ 12 ຄົນ, ຍິງ 1 ຄົນ.
ເຈົ້າໜ້າທີ່ ປກສ ກຸ່ມວັດຈັນ ໃຫ້ຮູ້ວ່າ: ໂດຍປະຕິບັດຕາມທິດຊີ້ນໍາ ຂອງຫົວໜ້າກອງບັນຊາການ ປກສ ເມືອງ ກໍຄືທິດຊີ້ນໍາ ຂອງທ່ານເຈົ້າເມືອງຈັນທະບູລີ, ປກສ ກຸ່ມວັດຈັນ ໄດ້ສົມທົບກັບພາກສ່ວນທີ່ກ່ຽວຂ້ອງ ກວດກາແກ້ໄຂຄົນເລາລ່ອນ ແລະ ຄົນບ້າໃບ້ເສຍຈິດໄດ້ຈໍານວນ 12 ຄົນ, ຍິງ 1 ຄົນ ຢູ່ 4 ຈຸດ ຄື: ຈຸດວັດອິນແປງ, ວັດມີໄຊ, ຂ້າງສະຖານທູດລາວ-ອາເມຣິກາ (ເກົ່າ) ຢູ່ບ້ານຊຽງຢືນ ແລະ ສະໜາມກິລາເດີນເຈົ້າອານຸວົງທີ່ມີການເຄື່ອນໄຫວເລາະຂໍເງິນ ແລະ ວັດຖຸທີ່ຂອງຕາມຫ້າງຮ້ານຕ່າງໆ ບ່ອນມີນັກທ່ອງທ່ຽວເລາະໄປມາ.
ເພື່ອເປັນການຄຸ້ມຄອງ ແລະ ສ້າງບັນຍາກາດສັງຄົມ ປກສ ກຸ່ມວັດຈັນຈຶ່ງສົມທົບກັບພະແນກແຮງງານສະຫວັດດີການສັງຄົມ ນວ ແລະ ເມືອງຈຶ່ງສົມທົບກັບລົງແກ້ນຳຕົວເອົາກຸ່ມຄົນດັ່ງກ່າວສົ່ງເຂົ້າສູນສົງເຄາະນະຄອນຫຼວງວຽງຈັນເພື່ອສືບຕໍ່ຄຸ້ມຄອງ ແລະ ຄວບຄຸມການປະພຶດຕໍ່ໄປ.
