ຈຳປາສັກສັ່ງ ຫ້າມບໍ່ໃຫ້ມີການບໍລິການຂາຍເຊີເກມການພະນັນ (ກາຊີໂນອອນລາຍ) ແລະ ຂາຍສິ່ງຂອງຜິດກົດໝາຍທຸກປະເພດ

ວັນທີ 24 ມິຖຸນາ 2022 ຜ່ານມານີ້ ທ່ານ ແກ້ວວິມົນ ສຸລິຍະວົງ ຫົວໜ້າຂະແໜງເຕັກໂນໂລຊີ ແລະ ນະວັດຕະກຳ ພະແນກຕັກໂນໂລຊີ ແລະ ການສື່ສານ ແຂວງຈຳປາສັກ ພ້ອມຄະນະ ແລະ ນັກວິຊາການ ໄດ້ລົງກວດກາຮ້ານເກມໃນເຂດເທສະບານນະຄອນປາກເຊ ແຂວງຈຳປາສັກ.

ໃນການລົງກວດກາຄັ້ງນີ້ໄດ້ແຈ້ງ ແລະ ເຮັດບົດບັນທຶກ ກັບຜູ້ດຳເນີນກິດຈະການ ເພື່ອເປັນຫຼັກຖານ ແລະ ເພື່ອສະດວກໃນການຕິດຕາມກວດກາ, ຮັບປະກັນໃຫ້ມີຄວາມເປັນລະບຽບຮຽບຮ້ອຍ,ແນໃສ່ການຫຼຸດຜ່ອນບັນຫາປະກົດການຫຍໍ້ທໍ້ໃນສັງຄົມ ທີ່ສຳຄັນແມ່ນເພື່ອເປັນການປະຕິບັດຕາມແຈ້ງການຂອງປະທານຄະນະກຳມະການຄຸ້ມຄອງ ແລະສົ່ງເສີມການລົງທຶນ ແຂວງຈຳປາສັກສະບັບເລກທີ 034/ຄລທ.ຂ.ຈສ.ລົງ ວັນທີ 16 ມິຖຸນາ 2022 ເລື່ອງການແຈ້ງທິດຊີ້ນຳຂອງທ່ານເຈົ້າແຂວງຈຳປາສັກກ່ຽວກັບການແກ້ໄຂ, ການອະນຸຍາດເປີດຮ້ານເກມອອນລາຍ ແລະ ອີງຕາມບົດບັນທຶກກອງປະຊຸມຄະນະກຳມະການສົ່ງເສີມ ແລະຄຸ້ມຄອງການລົງທຶນຂັ້ນແຂວງ ເລກທີ 027/ຄລທ.ຂ.ຈສ ລົງວັນທີ31ພຶດສະພາ 2022, ພະແນກແຜນການການລົງທຶນ, ຮອງປະທານ(ຜູ້ປະຈຳການ) ແຄະນະກຳມະການຄຸ້ມຄອງ ແລະ ສົ່ງເສີມການລົງທຶນຂັ້ນແຂວງແຈ້ງໃຫ້ເອົາໃຈໃສ່ຮີບຮ້ອນແກ້ໄຂບັນຫາຮ້ານເກມອອນລາຍ, ຮ້ານພະນັນອອນລາຍໃຫ້ມີຄວາມເດັດຂາດ ແລະ ເຂັ້ມງວດຕາມລະບຽບກົດໝາຍກຳນົດ, ພ້ອມນີ້ ໂດຍອີງຕາມແຈ້ງການຂອງພະແນກເຕັກໂນໂລຊີແລະການສື່ສານ ແມ່ນໃຫ້ຜູ້ທີ່ມີໃບອະນຸຍາດ ໃຫ້ປັບປຸງຮ້ານຂອງຕົນໃຫ້ຖືກຕ້ອງຕາມມາດຕະຖານທີ່ກຳນົດໄວ້ໃນຂໍ້ຕົກລົງສະບັບເລກທີ 828/ປທສ,ລົງວັນທີ 11 ມີນາ 2015 ຢ່າງເຄັ່ງຄັດ, ຫ້າມບໍ່ໃຫ້ມີການບໍລິການຂາຍເຊີເກມການພະນັນ (ກາຊີໂນອອນລາຍ) ແລະ ຂາຍສິ່ງຂອງຜິດກົດໝາຍທຸກປະເພດ ແລະ ສຳລັບຜູ້ທີ່ບໍ່ມີໃບອະນຸຍາດ ຫຼື ໃບອະນຸຍາດໝົດອາຍຸໃຫ້ຢຸດເຊົາກິດຈະການທັນທີ ຖ້າຫາກກວດກາພົບເຫັນຈະຖືກປັບໃໝສອງລ້ານ ເຖິງ ຫ້າລ້ານກີບ ພ້ອມທັງຖືກມາດຕະການທາງກົດໝາຍຕາມແຕ່ກໍລະນີ.

ພາຍຫຼັງລົງກວດກາຮ້ານເກມໃນເຂດເທສະບານນະຄອນປາກເຊແລ້ວ ຂະແໜງເຕັກໂນໂລຊີ ແລະ ນະວັດຕະກຳ ພະແນກຕັກໂນໂລຊີ ແລະ ການສື່ສານແຂວງຈຳປາສັກຈະສົມທັບກັບເຈົ້າໜ້າທີ່ ແລະ ພາກສ່ວນກ່ຽວຂ້ອງ ສືບຕໍ່ລົງກວດກາຮ້ານເກມຢູ່ 9 ເມືອງຕື່ມອີກ.