ການນຳກະຊວງກະສິກຳ ແລະ ປ່າໄມ້ ລົງຊຸກຍູ້ການຜະລິດຢູ່ແຂວງອັດຕະປື

ເມື່ອທ້າຍອາທິດທີ່ຜ່ານມານີ້, ທ່ານ ພວງປາຣີສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກຳ ແລະ ປ່າໄມ້ພ້ອມຄະນະ ໄດ້ລົງຊຸກຍູ້ວຽກງານການຜະລິດເປັນສິນຄ້າຢູ່ແຂວງອັດຕະປື ແລະ ໃນໂອກາດນີ້ໄດ້ພົບປະກັບທ່ານ ນາມ ວິຍາເກດ ເຈົ້າແຂວງອັດຕະປື ເພື່ອປຶກສາຫາລືບັນຫາພົ້ນເດັ່ນຂອງຂະແໜງກະສິກໍາ ແລະ ປ່າໄມ້, ຈາກນັ້ນໄດ້ລົງຕິດຕາມເບິ່ງສະພາບການຜະລິດເປັນສິນຄ້າ ແລະ ຄໍ້າປະກັນດ້ານສະບຽງອາຫານຢູ່ເຂດຫີນລາດ-ແທເມືອງສະໜາມໄຊ, ຊຶ່ງມີຄອບຄົວພັດທະນາຈໍານວນ 939 ຄອບຄົວ, ຄອບຄົວພົ້ນທຸກ 696 ຄອບຄົວ ແລະ  ຄອບຄົວທີ່ຍັງທຸກຍາກມີປະມານ 112 ຄອບຄົວ, ໃນນີ້ເນື້ອທີ່ການຜະລິດທັງໝົດມີ 2.030 ເຮັກຕາ, ສາມາດປູກພືດເປັນສິນຄ້າໄດ້ຫລາຍກວ່າ 210 ໂຕນ ແລະ ມີຊົນລະປະທານ 2 ແຫ່ງຄື: ຊົນລະປະທານເຊປຽນ ແລະ ຫວ້ຍສະໝອງ 1 ແລະ 2 ມີເນື້ອທີ່ 1.200 ເຮັກຕາ, ປັດຈຸບັນຊົນລະປະທານບາງສ່ວນແມ່ນໄດ້ມີສະພາບເປ່ເພຍ້ອນໄດ້ຮັບຜົນກະທົບ ຈາກໄພທໍາມະຊາດເມື່ອເດືອນກໍລະກົດຜ່ານມາ ແລະ ກໍາລັງລໍຖ້າການສ້ອມແປງ, ພ້ອມນັ້ນຍັງໄດ້ລົງກວດກາຕົວຈິງໃນເຂດຈຸດສຸມບ້ານແທ ເມືອງສະໜາມໄຊ ແລະ ຊົນລະປະທານຫວ້ຍສະໜອງ ແລະ ໂອກາດນີ້ ມີປະຊາຊົນ ກໍຄືຊາວກະສິກອນໄດ້ສະເໜີຂໍການຊວ່ຍດ້ານງົບປະມານເພື່ອມາສ້ອມແປງຊົນລະປະທານເປ່ເພ ແລະ ຂໍການຊ່ວຍເຫລືອດ້ານແນວພັນເຂົ້າ ແລະ ແນວພັນພືດອື່ນໆ, ພ້ອມທັງສະເໜີຂໍພະນັກງານວິຊາການກະສິກໍາລົງມາຊ່ວຍໃນການກໍາຈັດ ແລະ ປ້ອງກັນພະຍາດພືດ, ພະຍາດສັດ ເປັນຕົ້ນ: ສະພາບການລະບາດຂອງຫ້ອຍກິນເຂົ້າ ແລະ ພະຍາດສັດລ້ຽງທີ່ເກີດຕາມລະດູການເພື່ອຫລີກລຽ້ງສັດຕາຍ ແລະ ຜົນເສຍຫາຍທີ່ຈະຕາມມາ.

+ອັດຕະປືພວມສຸມໃສ່ແກ້ໄຂຜົນເສຍຫາຍຈາກໄພນ້ຳຖ້ວມ