ຫາກິນຂ້າມທະວີບ, ແກເຣັດ ເບລ ຕອບຕົກລົງຍ້າຍໄປ ລອສແອນເຈລິສ ເອັຟຊີ

ແກເຣັດ ເບລ ຕົກລົງຍ້າຍໄປຫລິ້ນໃຫ້ ລອສ ແອນເຈລິສ ເອຟຊີ ແຫ່ງການແຂ່ງຂັນເມເຈີລີກ ສະຫະລັດ ອາເມລິກາ ແບບບໍ່ ມີຄ່າຕົວ ຫລັງຫມົດສັນຍາ ແລະ ແຍກທາງກັບ ຣຽວ ມາດຣິດ.

ກ່ອນຫນ້ານີ້ ເບລ ຕົກເປັນຂ່າວໄດ້ຮັບຄວາມສົນໃຈຈາກຫລາຍສະໂມສອນ ລວມເຖິງອະດີດຕົ້ນສັງກັດ ທັອດແນມ ຮັອດສະເປີ ແຫ່ງພຣີເມຍລີກ ອັງກິດ ແລະ ສະໂມສອນໃນບ້ານເກີດຢ່າງ ຄາດິບ ຊິຕີ ແຕ່ຫລ້າສຸດລາວເຜີຍໃນທະວິດເຕີວ່າ : ‘‘ ແລ້ວພົບກັນ ໃນໄວໆນີ້ ລອສແອນເຈລິສ’’.

ເບລ ຍ້າຍຈາກສະເປີ ມາຢູ່ກັບ ຣຽວ ມາດຣິດ ເມື່ອປີ 2013 ຄ່າຕົວສູງເຖິງ 85 ລ້ານປອນ ເຊິ່ງແຕ່ກ່ອນລາວເຄີຍເປັນກຳລັງສຳຄັນ ຂອງ ຣຽວ ມາດຣິດ ແຕ່ໄລຍະຫລັງກາຍເປັນສ່ວນເກີນ ສະນັ້ນ ດາວເຕະອາຍຸ 32 ປີ ກໍມີສ່ວນນຳທີມຄວ້າແຊ໊ມ ລາ ລີກາ 3 ສະໄຫມ, ໂກປາ ເດລ ເຣ 1 ສະໄຫມ, ຢູຟາ ແຊ໊ມປຽນ ລີກ 5 ສະໄຫມ ແລະ ແຊ໊ມອື່ນອີກຫລາຍລາຍການ.

ຂະນະທີ່ ລອສ ແອນເຈລິສ ເອຟຊີ ກ່ອນຫນ້ານີ້ຄວ້າຕົວ ຈໍໂຈ ຄິເອລລີນີ ກອງຫລັງອະດີດທີມຊາດອິຕາລີ ໄປຮ່ວມທີມ ຮຽບຮ້ອຍແລ້ວ ໂດຍໃນທີມຍັງມີ ກາລອສ ເບລາ ກອງຫນ້າອະດີດທີມຊາດເມັກຊິໂກ ຢູ່ໃນສັງກັດນຳອີກ.