ຈີນຫ້າມນຳເຂົ້າແຮ່ທາດ-ອາຫານທະເລ ຈາກ ສປປ ເກົາຫລີ
ລັດຖະບານປັກກິ່ງປະກາດຢຸດການນຳເຂົ້າເຫລັກ, ແຮ່ເຫລັກ ແລະ ອາຫານທະຫານຈາກ ສປປ ເກົາຫລີ ນັບແຕ່ວັນທີ 15 ສິງຫານີ້ເປັນຕົ້ນໄປ ເພື່ອໃຫ້ເປັນໄປຕາມມະຕິຂວ້ຳບາດຂອງສະຫະປະຊາຊາດ.
+ ສະພາຄວາມໝັ້ນຄົງ ສປຊ ລົງມະຕິເປັນເອກະພາບ ຂວ້ຳບາດ ສປປ ເກົາຫລີ ໜັກຂຶ້ນ
+ ສປປ ເກົາຫລີ ຂູ່ຍິງລູກສອນໄຟຖະຫລົ່ມ ພື້ນທີ່ໃກ້ເກາະກວມຂອງອາເມລິກາ
+ ຍີ່ປຸ່ນ ແລະ ສ.ເກົາຫລີ ພ້ອມສະກັດ ຈະຫລວດ ສປປ ເກົາຫລີ ກ່ອນເຖິງເກາະກວມ
ສຳນັກຂ່າວຕ່າງປະເທດລາຍງານຈາກນະຄອນຫລວງປັກກິ່ງ ປະເທດຈີນ ໃນວັນທີ 14 ສິງຫານີ້ວ່າ: ກະຊວງການຄ້າຂອງຈີນອອກຖະແຫລງການໃນວັນທີ 14 ສິງຫານີ້ ຢຸດການນຳເຂົ້າເຫລັກ, ແຮ່ເຫລັກ ແລະ ອາຫານທະເລຈາກ ສປປ ເກົາຫລີ ແບບບໍ່ມີກຳນົດ ໂດຍເລີ່ມແຕ່ວັນທີ 15 ສິງຫານີ້ເປັນຕົ້ນໄປ ເພື່ອໃຫ້ເປັນໄປຕາມມະຕິຂວ້ຳບາດຄັ້ງຫລ້າສຸດຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ທີ່ປະກາດໃນຕົ້ນເດືອນນີ້ ຫ້າມການນຳເຂົ້າສິນຄ້າດັ່ງກ່າວ ລວມທັງຖ່ານຫີນ, ຊືນ ແລະ ແຮ່ຊືນ ຈາກ ສປປ ເກົາຫລີ, ແຕ່ລັດຖະບານປັກກິ່ງຢຸດນຳເຂົ້າຖ່ານຫີນຈາກ ສປປ ເກົາຫລີ ນັບແຕ່ເດືອນກຸມພາຜ່ານມາແລ້ວ.
ການເຄື່ອນໄຫວດັ່ງກ່າວຂອງລັດຖະບານປັກກິ່ງມີຂຶ້ນທ່າມກາງບັນຍາກາດເຄັ່ງຕຶງຮອບຫລ້າສຸດຢູ່ແຫລມເກົາຫລີ ທີ່ອາເມລິກາ ແລະ ສປປ ເກົາຫລີ ຖົກຖຽງກັນ ເຖິງຂັ້ນລັດຖະບານພຽງຢາງຂົ່ມຂູ່ຈະຍິງລູກສອນໄຟໂຈມຕີເກາະກວມຂອງອາເມລິກາ ໂດຍແຜນການຈະພ້ອມພາຍໃນກາງເດືອນສິງຫານີ້ ແລະ ປະທານາທິບໍດີ ໂດນັນ ທຣຳ ຕອບໂຕ້ວ່າ ສປປ ເກົາຫລີ ຕ້ອງພົບກັບມະຫັນຕະໄພໃນແບບທີ່ໂລກບໍ່ເຄີຍພົບມາກ່ອນ.
