ອຸທິຍານແຫ່ງຊາດພູເຂົາຄວາຍ 1 ໃນ 6 ອຸທິຍານແຫ່ງຊາດ ໃນ ສປປ ລາວ

ປ່າສະຫງວນແຫ່ງຊາດພູເຂົາຄວາຍ ສ້າງຕັ້ງປີ 1993 ຕາມດໍາລັດສະບັບເລກທີ 164/ນຍ ເຊິ່ງແມ່ນ 1 ໃນ 18 ປ່າສະຫງວນແຫ່ງຊາດ ແລະ ເອີ້ນເຂດເຫຼົ່ານີ້ວ່າເປັນເຂດອະນຸຮັກຊີວະພາບແຫ່ງຊາດ ປ່າສະຫງວນແຫ່ງຊາດພູເຂົາຄວາຍ ມີລັກສະນະສະເພາະທີ່ໂດດເດັ່ນດ້ານພູມີສາດ ແລະ ຊີວະນານາພັນທີ່ແຕກຕ່າງກັນ ເຊິ່ງປະກອບດ້ວຍພື້ນທີ່ປ່າປົກຫຸ້ມ ປ່າດົງດິບຕຶບຫນາ ປ່າປະສົມ ກວມເອົາພື້ນທີ່ທິດຕາເວັນອອກ ແລະ ທິດຕາເວັນຕົກສ່ຽງໃຕ້ເປັນສ່ວນໃຫຍ່ ປ່າໄມ້ແປກ ແລະ ປ່າໄມ້ເກົ່າແກ່ ຊະນິດພັນພືດ ພັນສັດ ເຄື່ອງປ່າຂອງດົງ ແລະ ພືດເປັນຢາ ກວມເອົາ ພື້ນທີ່ທິດຕາເວັນຕົກເປັນສ່ວນໃຫຍ່ ມີທົ່ງຫຍ້າກວ້າງຂວາງຢູ່ຍອດຂອງພູພຽງ ເມື່ອບໍ່ດົນມານີ້ໄດ້ຄົ້ນພົບພືດລົ້ມລຸກຊະນິດໃຫມ່ຂອງໂລກ Gentiane laotica Critically Endangered (CR) (ເປັນຕະກຸນພືດທີ່ພົບເຫັນໃນທະວີບເອີຣົບ ອາເມຣິກາ ແລະ ອາຊີ) ພ້ອມນີ້ຍັງມີ ປະຊາກອນສັດປ່າທີ່ໃກ້ສູນພັນ ເຊັ່ນ: ທະນີແກ້ມຂາວ ເຊິ່ງບົ່ງບອກເຖິງຄວາມອຸດົມສົມບູນຂອງລະບົບນິເວດປ່າໄມ້ ແລະ ສັດປ່າ ມີເຂດອະນຸ ຮັກນົກຍຸງ ນອກນີ້ຍັງເປັນຈຸດກໍາເນີດຂອງປ່າຍອດນ້ໍາທີ່ສໍາຄັນຫຼາຍເຂດ ປະກອບດ້ວຍລໍາທານ ແຫຼ່ງນ້ໍາ ແລະ ສາຍຫ້ວຍນ້ອຍ-ໃຫຍ່ຫຼາຍ

ໃສ່ນ້ໍາງື່ມ ແລະ ນ້ໍາຂອງ ມີຄຸນຄ່າດ້ວຍປະຫວັດສາດ ແລະ ວັດທະນະທໍາ ມີວັດພະບາດແອວຂັ້ນ ວັດພະບາດພູເຂົາຄວາຍ ນາຍາງ ຮູບປັ້ນພະພຸດທະຮູບເກົ່າແກ່ຂອງຍຸກມອນ (1200 ປີ) ທີ່ສະແດງໃຫ້ເຫັນອະລິຍະທໍາຂອງມະນຸດດຶກດໍາບັນ ທີ່ພົວພັນກັບທໍາມະ ຊາດຢ່າງສະໜິດແໜ້ນ.

ພາຍຫຼັງລັດຖະບານໄດ້ປະກາດປ່າສະຫງວນແຫ່ງຊາດພູເຂົາຄວາຍເປັນອຸທິຍານແຫ່ງຊາດພູເຂົາຄວາຍ ທ້າຍປີ 2021 ກະຊວງກະສິກໍາ ແລະ ປ່າໄມ້ ໂດຍສົມທົບກັບອົງການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງ ກໍໄດ້ຈັດວາງຊັບຊ້ອນບຸຄະລາກອນ ກະກຽມດ້ານການຈັດຕັ້ງ ແລະ ງົບປະມານ ເພື່ອຄຸ້ມຄອງ ອະນຸຮັກ ປົກປັກຮັກສາຊີວະນາໆພັນ ຄຽງຄູ່ກັບການປັບປຸງຊີວິດການເປັນຢູ່ຂອງປະຊາຊົນທີ່ອາໄສ ຢູ່ໃນ ແລະ ຢູ່ອ້ອມຂ້າງ ອຸທິຍານແຫ່ງຊາດພູເຂົາຄວາຍແມ່່ນ 1 ໃນ 5 ເຂດພູມີທັດຂອງ 8 ເຂດປ່າສະຫງວນ ແລະ ອຸທິຍານແຫ່ງຊາດ ທີ່ຈະ ໄດ້ຮັບການສະຫນັບສະຫນູນດ້ານງົບປະມານຈາກໂຄງການພູມີທັດ ແລະ ຊີວິດການເປັນຢູ່ໃນ ສປປ ລາວ ທີ່ມີເປົ້າຫມາຍປົກປັກຮັກສາຊີວະ ນາໆພັນ ຕິດພັນກັບການປັບປຸງຊີວິດການເປັນຢູ່ຂອງປະຊາຊົນ ໂດຍຖືເອົາການສົ່ງເສີມວຽກງານທ່ອງທໍາມະຊາດເປັນຫຼັກ.

ທ່ານ ປອ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ກ່າວໃນໂອກາດພິທີເປີດອຸທິຍານແຫ່ງຊາດພູເຂົາຄວາຍ ວັນທີ 24 ມິຖຸນາ 2012 ວ່າ: ປ່າໄມ້ ເປັນຊັບພະຍາກອນທໍາມະຊາດອັນລໍ້າຄ່າ ທີ່ຂະຫນານນາມວ່າເປັນບໍ່ “ຄໍາຂຽວ” ເຊິ່ງມີບົດບາດ ສໍາຄັນຕໍ່ການພັດທະນາເສດຖະກິດ-ສັງຄົມຂອງຊາດ ເປັນແຫຼ່ງທໍາມາຫາກິນທີ່ອຸດົມສົມບູນໃຫ້ປະຊາຊົນບັນດາເຜົ່າ ແລະ ປະກອບສ່ວນສໍາ ຄັນໃນການຫຼຸດຜ່ອນຄວາມທຸກຍາກ ນັບແຕ່ອະດີດເຖິງປັດຈຸບັນ ຄວາມອຸດົມສົມບູນຂອງປ່າໄມ້ ຍັງເປັນທ່າແຮງຕົ້ນຕໍ່ໃນການພັດທະນາ ເສດຖະກິດ-ສັງຄົມແບບຍືນຍົງ ເຊິ່ງໄດ້ກ່ຽວພັນກັບຫຼາຍຂະແຫນງການ ເປັນຕົ້ນ ດ້ານພະລັງງານໄຟຟ້າ ການທ່ອງທ່ຽວ ການກະສິກໍາ ແລະ ອື່ນໆ ນອກນີ້ ປ່າໄມ້ຍັງປະກອບສ່ວນໃນການດໍາລົງຊີວິດຂອງປະຊາຊົນບັນດາເຜົ່າ ດ້ວຍການສະຫນອງຜະລິດຕະພັນໄມ້ ແລະ ເຄື່ອງປ່າຂອງ ດົງ ເພື່ອຊົມໃຊ້ໃນຄົວເຮືອນ ສ້າງລາຍຮັບ ເປັນບ່ອນບໍລິການດ້ານນິເວດຫຼາຍດ້ານ ເປັນຕົ້ນການອະນຸຮັກຊີວະນາໆພັນ ປ້ອງກັນແຫຼ່ງນ້ໍາ ປັບປຸງຄຸນນະພາບສິ່ງແວດລ້ອມ ແລະ ການຕ້ານການປ່ຽນແປງຂອງສະພາບດິນຟ້າອາກາດ.

ອຸທິຍານແຫ່ງຊາດພູເຂົາຄວາຍ ມີພື້ນທີ່ປ່າທີ່ກວ້າງໃຫຍ່ ແລະ ອຸດົມສົມບູນ ຢູ່ອ້ອມຮອບ ແລະ ໃກ້ນະຄອນຫຼວງຂອງປະເທດ ເປັນເຂດທີ່ ອຸດົມສົມບູນໄປດ້ວຍພັນສັດ ພັນພືດ ແລະ ເຄື່ອງປ່າຂອງດົງມາແຕ່ດຶກດໍາບັນ ມີຮ່ອງຮອຍປະຫວັດສາດ ແລະ ວັດທະນະທໍາ ທີ່ມີຄວາມສໍາ ຄັນດ້ານການທ່ອງທ່ຽວທໍາມະຊາດ ການສຶກສາຄົ້ນຄວ້າວິທະຍາສາດ ກະຊວງກະສິກໍາ ແລະ ປ່າໄມ້ ຈຶ່ງໄດ້ຮ່ວມກັບອົງການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງ ຄົ້ນຄວ້ານໍາສະເຫນີລັດຖະບານພິຈາລະນາອອກດໍາລັດວ່າດ້ວຍການສ້າງຕັ້ງອຸທິຍານແຫ່ງຊາດພູເຂົາຄວາຍໃນ ທ້າຍປີ 2021 ຕາມດໍາລັດ 733/ນຍ ມີເນື້ອທີ່ປະມານ 191.900 ເຮັກຕາ ກວມເອົາເນື້ອທີ່ສ່ວນຫນຶ່ງຂອງ 8 ເມືອງ 3 ແຂວງ ແລະ ນະຄອນຫຼວງວຽງຈັນ ຖືເປັນ 1 ໃນ 6 ອຸທິຍານແຫ່ງຊາດ ໃນ ສປປ ລາວ ທີ່ມີບົດບາດສໍາຄັນດ້ານລະບົບນິເວດວິທະຍາ ສິ່ງແວດລ້ອມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບຂອງບັນດາແຂວງ ໂດຍສະເພາະນະຄອນຫຼວງຂອງປະເທດ ລວມທັງຊາຍແດນລະຫວ່າງຊາດ ຈຶ່ງຮຽກຮ້ອງໃຫ້ທຸກພາກສ່ວນ ເພີ່ມທະວີ ແລະ ມີຄວາມເປັນເອກະພາບສູງໃນບັນດາແຂວງທີ່ມີເນື້ອທີ່ຕິດຈອດ ເອົາໃຈໃສ່ປະສານງານກັບ ທຸກພາກສ່ວນ ແຕ່ຂັ້ນສູນກາງ ແລະ ທ້ອງຖິ່ນ ເພື່ອປົກປັກຮັກສາປ່າໄມ້ ທີ່ດິນປ່າໄມ້ ແລະ ຊັບພະຍາກອນປ່າໄມ້ ປະ ກອບສ່ວນໃນການ ປັບປຸງຊິວິດການເປັນຢູ່ຂອງປະຊາຊົນ ແລະ ພັດທະນາເສດຖະກິດ-ສັງຄົມ ຕາມທິດສີຂຽວ ແລະ ຍືນຍົງ.