ຮ່າງສັນຍາເຊົ່າສຳປະທານທີ່ຕິດພັນກັບວົງຄະນາຍາດແຫ່ງຊາດຄວນໄດ້ເຂົ້າຜ່ານສະພາ

ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ຊີ້ແຈງກົດໝາຍວ່າດ້ວຍການຄຸ້ມຄອງຊັບສິນຂອງລັດຕໍ່ຄຳຊັກຖາມຂອງສະມາຊິກສະພາແຫ່ງຊາດໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 23 ມິຖຸນາໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດວ່າ: ສຳລັບກົດໝາຍວ່າດ້ວຍການຄຸ້ມຄອງຊັບສິນຂອງລັດ ໄດ້ພະຍາຍາມປັບປຸງ ຜ່ານການຖອດຖອນບົດຮຽນ ຊຶ່ງມີທັງດ້ານຕັ້ງໜ້າ ແລະ ຫຍໍ້ທໍ້ ໂດຍສະເພາະຊ່ອງວ່າງຂອງກົດໝາຍວ່າດ້ວຍການຄຸ້ມຄອງຊັບສິນຂອງລັດ ຜ່ານມາມີຫຼາຍອັນເຮັດໃຫ້ລັດເສຍຜົນປະໂຫຍດຈຳນວນຫຼາຍໂດຍສະ ເພາະພົວພັນເຖິງການເຊົ່າ, ການສຳປະທານ. ຫຼາຍປະເທດເຂົາເຈົ້າຖືເອົາຮ່າງສັນຍາກ່ຽວກັບການຂຸດຄົ້ນຊັບພະຍາກອນທີ່ເປັນວົງຄະນາຍາດແຫ່ງຊາດເຂົ້າຜ່ານສະພາເຊັ່ນ: ໂຄງການຂຸດຄົ້ນຄຳ, ທອງ, ຂຸດຄົ້ນແຮ່ທາດຕ່າງໆທີ່ເປັນຜົນປະໂຫຍດຕ້ອງໄດ້ເອົາມາຜ່ານສະພາ; ຜ່ານມາມີສັນຍາຈຳນວນໜຶ່ງທີ່ເປັນຊ່ອງວ່າງເຊັ່ນ ໂຄງການພູເບ້ຍມາຍນິງ, ໂຄງການຫົງສາລິກໄນເຫັນວ່າລັດອັບປະໂຫຍດມັນເກາະກ່າຍກັນໝົດເວລາເຮັດສັນຍາ ສຸດທ້າຍເຂົາຖືສັນຍາດັ່ງກ່າວໃຫຍ່ກວ່າກົດໝາຍ, ເມື່ອກົດໝາຍປັບປຸງພາຍຫຼັງມີສັນຍາ ກໍ່ໃຫ້ເກີດຂໍ້ຂັດແຍ່ງກັນໃນຕົວ ເຮັດໃຫ້ການເຈລະຈາກັນໄປມາບໍ່ສິ້ນສຸດຄືປັດຈຸບັນ. ດັ່ງນັ້ນ, ໃຫ້ເບິ່ງຄືນສັນຍາການເຊົ່າສຳປະທານ ຄວນໄດ້ກຳນົດໃສ່ໃນກົດໝາຍຢ່າງຈະແຈ້ງ. ກະຊວງການເງິນເຫັນດີຄວນຈະເອົາມາຄົ້ນຄວ້າຄືນວ່າຈະປັບປຸງມາດຕາໃດທີ່ເປັນສັນຍາທີ່ມີລັກສະນະຍຸດທະສາດທີ່ພົວພັນເຖິງຫຼາຍຂະແໜງການຄວນເອົາເຂົ້າໃນກົດໝາຍວ່າດ້ວຍການຮ່າງ ແລະ ການຖອນຄືນ.

ສຳລັບການເຂົ້າຮຸ້ນ ຖ້າເປັນສັນຍາສຳປະທານທີ່ຕິດພັນກັບວົງຄະນາຍາດແຫ່ງຊາດທີ່ພົວພັນເຖິງຊັບພະຍາກອນເຖິງມູນມໍລະດົກຂອງຊາດຄວນໄດ້ເອົາມາຜ່ານກອງປະຊຸມສະພາ. ເມື່ອຜ່ານແລ້ວຖ້າລັດຖະບານຈະເຂົ້າ ຫຼື ບໍ່ເຂົ້າຖືຮຸ້ນຢູ່ໃນນັ້ນ ຖ້າເຂົ້າຖືຮຸ້ນແບບໃດພວກເຮົາຈະຕ້ອງໄດ້ຄົ້ນຄວ້າ ສັນຍາໃດທີ່ພົວພັນເຖິງວົງຄະນາຍາດແຫ່ງຊາດຄວນໄດ້ເຂົ້າຜ່ານສະພາ ຄວນໄດ້ກຳນົດໃຫ້ຈະແຈ້ງວ່າລັດຖະບານຄວນຖືຮຸ້ນ ຫຼື ບໍ່ ລວມທັງຈະຂາຍອອກ ຊຶ່ງກະຊວງການເງິນຈະເບິ່ງຕື່ມຈະກຳນົດເຂົ້າໃຫ້ແຈ້ງຕື່ມ.

ສຳລັບການຂາຍຮຸ້ນ ການຖອນຮຸ້ນຄວນໄດ້ແຍກ ອັນໃດເປັນຂອງລັດຖະບານ, ອັນໃດເປັນຂອງວົງຄະນາຍາດແຫ່ງຊາດຕ້ອງໄດ້ຜ່ານສະພາ, ອັນໃດເປັນເສດຖະກິດມະຫາພາກ ຊຶ່ງລັດຖະບານມີສິດຕັດສິນເພື່ອຄວາມໝັ້ນຄົງເພື່ອການເຕີບໂຕໂດຍສະເພາະ ກິດຈະການທີ່ພົວພັນເຖິງເສດຖະກິດມະຫາພາກນີ້ແມ່ນສິດຂອງລັດຖະບານຄວນກຳນົດໃຫ້ແຈ້ງ, ເຊັ່ນມາດ ຕາ 14 ຂອງກົດໝາຍວ່າດ້ວຍຊັບສິນໃນປັດຈຸບັນບໍ່ແຈ້ງເຮັດການດຳເນີນການໂອນຮຸ້ນ, ການຂາຍຮຸ້ນຍັງ ມີການຖົກຖຽງກັນ, ຕັ້ງຄຳຖາມກັນຢູ່ ເຫັນດີຄວນກຳນົດເຂົ້າໃຫ້ແຈ້ງໃນມາດຕາ 14 ທີ່ພວມຈະປັບປຸງໃນປັດຈຸບັນ.

ທ່ານ ບຸນໂຈມ ກ່າວຕື່ມວ່າ: ການແບ່ງຄວາມຮັບຜິດຊອບຄວນໃຫ້ແຈ້ງຢູ່ໃນນັ້ນ, ເຫັນດີປັບປຸງມາດຕາ 14 ແລະ ມາດຕາອື່ນໆຂອງກົດໝາຍວ່າດ້ວຍຊັບສິນຂອງລັດທີ່ພົວພັນເຖິງການໂອນຮຸ້ນ, ການເຂົ້າຮຸ້ນ, ຄວນໄດ້ແຈ້ງ. ສຳລັບການບິນຜ່ານ, ກະຊວງການເງິນ, ກະຊວງໂຍທາທິການ ແລະ ຂົນສົ່ງ ແລະ ທະ ນາຄານແຫ່ງ ສປປລາວ ຜ່ານມາໄດ້ພັດທະນາລະບົບຄຸ້ມຄອງຮ່ວມກັນໂດຍສະເພາະລະບົບຕິດຕາມການ ບິນຜ່ານຂອງເຮືອບິນຕ່າງໆ ຂະໜາດຂອງເຮືອບິນ, ຊະນິດຂອງເຮືອບິນພວກເຮົາໄດ້ມີລະບົບແລ້ວ ກ່ອນບໍ່ທັນມີໂຄວິດລະບາດພວກເຮົາສາມາດສ້າງລາຍຮັບເຂົ້າງົບປະມານ 90 ລ້ານໂດລາ/ປີສະເພາະບິນຜ່ານ, ແຕ່ມາຮອດປັດຈຸບັນຍ້ອນການລະບາດຂອງພະຍາດໂຄວິດເຮັດໃຫ້ລາຍຮັບຫຼຸດລົງຫຼາຍ, ບັນຫາຜ່ານມາພວກເຮົາຍັງຄົງຄ້າງແທ້ໆແມ່ນບັນດາໜີ້ຈາກການບິນຜ່ານ ຊຶ່ງຍັງເລັ່ງທວງ ແລະຈະຕ້ອງໄດ້ສືບຕໍ່ປັບປຸງຕໍ່ໄປ.