ເພີ່ມທະວີການຮ່ວມມືວຽກງານຊ່ວຍເຫຼືອກູ້ຊີບ, ກູ້ໄພທໍາມະຊາດ
ໃນວັນທີ 23 ມິຖຸນາ ນີ້, ແຂວງອັດຕະປື ແຫ່ງ ສປປ ລາວ ແລະ ແຂວງກອນຕູມ ແຫ່ງ ສສ ຫວຽດນາມ ໄດ້ຮ່ວມກັນລົງນາມເຊັນບົດບັນທຶກຊ່ວຍຈໍາການຮ່ວມມືຊ່ວຍເຫຼືອວຽກງານກູ້ຊີບ, ກູ້ໄພທາງທໍາມະຊາດ ຢ່າງເປັນທາງການຂຶ້ນທີ່ຫໍປະຊຸມໃຫຍ່ຂອງແຂວງ, ຕາງໜ້າໃຫ້ແຂວງອັດຕະປື ຮ່ວມລົງນາມເຊັນບົດບັນທຶກໂດຍ ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື, ຝ່າຍແຂວງກອນຕູມລົງນາມເຊັນບົດບັນທຶກໂດຍ ທ່ານ ຫງວຽນ ຫືວ ຖາບ ຮອງປະທານຄະນະກໍາມະການປະຊາຊົນ ແຂວງກອນຕູມໂດຍມີຄະນະນໍາທັງສອງແຂວງເຂົ້າຮ່ວມເປັນສັກຂີພິຍານ.
ສໍາລັບເນື້ອໃນບົດບັນທຶກຊ່ວຍຈໍາການຮ່ວມມືຊ່ວຍເຫຼືອວຽກງານກູ້ຊີບ, ກູ້ໄພທາງທໍາມະຊາດ ທີ່ສອງແຂວງອັດຕະປື ແລະ ແຂວງກອນຕູມ ໄດ້ເຊັນກັນຄັ້ງນີ້ ແມ່ນເພື່ອເປັນການເສີມຂະຫຍາຍບັນດາໝາກຜົນທີ່ຍາດມາໄດ້ໃນການປັບປຸງຟື້ນຟູບັນດາຂໍ້ຫຍຸ້ງຍາກ ແລະ ຂໍ້ຈໍາກັດ, ບົນພື້ນຖານ, ທ່າແຮງບົ່ມຊ້ອນ, ຄວາມສາມາດຂອງແຕ່ລະແຂວງ, ສອງຝ່າຍ ໄດ້ເອກະພາບເນື້ອໃນການຮ່ວມມື ເພື່ອຜັນຂະຫຍາຍອະນຸສັນຍາ ວ່າດ້ວຍການຊ່ວຍເຫຼືອກູ້ຊີບຊ່ວຍເຫຼືອໃຫ້ພົ້ນໄພອັນຕະລາຍ ຈາກໄພທຳມະຊາດໃຫ້ມີປະສິດທິຜົນລະຫວ່າງກະຊວງປ້ອງກັນປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ກັບ ກະຊວງປ້ອງກັນປະເທດແຫ່ງສາທາລະນະລັດ ສັງຄົມນິຍົມ ຫວຽດນາມ ໄດ້ລົງນາມຮ່ວມກັນໃນຄັ້ງວັນທີ 12 ທັນວາ 2021 ທີ່ ແຂວງກວາງຈີ້ ສສ ຫວຽດນາມ ຊຶ່ງທັງສອງແຂວງໄດ້ຮ່ວມກັນຄົ້ນຄວ້າປຶກສາຫາລື, ກໍານົດກົນໄກການຈັດຕັ້ງປະຕິບັດງານ, ກໍານົດວັນເວລາ, ສະຖານທີ່, ບຸກຄະລາກອນ, ພາ ຫານະຮັບໃຊ້ ແລະ ອື່ນໆ ເຂົ້າໃນວຽກງານການຝຶກຊ້ອມການຊ່ວຍເຫຼືອກູ້ຊີບ, ຊ່ວຍເຫຼືອໃຫ້ພົ້ນໄພອັນຕະລາຍ ຈາກໄພທຳມະຊາດໃຫ້ປະກົດຜົນເປັນຈິງ ເເລະ ມີປະສິດທິຜົນສູງ.
ທັງນີ້ ກໍເພື່ອເປັນການກະ ກຽມສະເຫຼີມສະຫຼອງ ປີສາມັກຄີ ພິເສດລາວ – ຫວຽດນາມ ກໍຄືວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ, ທັງເປັນການເສີມຂະຫຍາຍມູນເຊື້ອຄວາມສາມັກຄີພິເສດ ແລະ ການພົວພັນຮ່ວມມື ຮອບດ້ານອັນດີງາມລະຫວ່າງສອງພັກ -ສອງລັດ ເວົ້າລວມ, ເວົ້າສະເພາະ ກໍຄືສອງແຂວງອັດຕະປື-ແຂວງກອນຕູມ ໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ.
