ຝຶກອົບຮົມການປະກອບເອກະສານໃບສັ່ງຈ່າຍເງິນໃນລະບົບ RTIS ໃຫ້ພະນັກງານຄັງເງິນ ແລະ ຫົວໜ່ວຍງົບປະມານທີ່ນຳໃຊ້ທຶນຊ່ວຍເຫຼືອ
ໃນວັນທີ 22 ມີຖຸນາ 2022 ນີ້, ທີ່ຫ້ອງປະຊຸມໃຫຍ່ກົມສ່ວຍສາອາກອນ ກະຊວງການເງິນ, ຄັງເງິນແຫ່ງຊາດ ກະຊວງການເງິນ, ໄດ້ເປີດຊຸດຝຶກອົບຮົມຫົວຂໍ້: “ການປະກອບເອກະສານໃບສັ່ງຈ່າຍເງິນໃນລະບົບ RTIS ຂອງຫົວ ໜ່ວຍງົບປະມານທີ່ນຳໃຊ້ທຶນຊ່ວຍເຫຼືອທາງການເພື່ອການພັດທະນາ” ໃຫ້ພະນັກງານຄັງເງິນແຫ່ງຊາດ ແລະ ໃຫ້ 17 ຫົວໜ່ວຍງົບປະມານ ທີ່ມາຈາກບັນດາກະຊວງ ແລະ ອົງການທຽບເທົ່າ, ໂດຍການເປັນປະທານຂອງທ່ານ ນາງ ຄອນມະນີ ພິມມະສັກ ຮອງຫົວໜ້າຄັງເງິນແຫ່ງຊາດ ກະຊວງການເງິນ, ມີບັນບັນດານັກສຳມະນາກອນ, ຄະນະຮັບຜິດຊອບຝຶກອົບຮົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຊູດຝຶກອົບຮົມໃນຄັ້ງນີ້, ເພື່ອໃຫ້ບັນດາຫົວໜ່ວຍງົບປະມານທີ່ນໍາໃຊ້ທຶນຊ່ວຍເຫຼືອທາງການເພື່ອການພັດທະ ນາລິເລີ່ມເຂົ້າສູ່ລະບົບການຕີໃບສັ່ງຈ່າຍເງີນເຂົ້າໃນລະບົບ RTIS, ຊຶ່ງເປັນລະບົບທີ່ທັນສະໄໝໂດຍສະເພາະແມ່ນພະນັກງານຄັງເງິນຜູ້ທີ່ຊຳນານໃນວຽກງານດັ່ງກ່າວໃນການຈັດຕັ້ງປະຕິບັດການປະກອບເອກະສານໃບສັ່ງຈ່າຍເງິນ.
ໃນໄລຍະຜ່ານມາແມ່ນໄດ້ສ້າງໃນລະບົບ Excell ເຮັດໃຫ້ມີຄວາມຫຍຸ້ງຍາກ, ຊຶ່ງບໍ່ສາມາດກວດກາ ແລະ ຕິດຕາມໃນລະບົບໄດ້, ພາຍຫຼັງສຳເລັດການຝຶກອົບຮົມດັ່ງກ່າວເຮັດໃຫ້ບັນດາຫົວໜ່ວຍງົບປະມານ, ແຜນງານໂຄງການ, ສາມາດຕິດຕາມ, ກວດກາໃບສັ່ງຈ່າຍເງິນ ແລະ ລວມສູນໄວ້ໃນລະບົບ RTIS, ຄັງເງິນສາມາດສັງລວມ, ຕິດຕາມການບັນທຶກບັນຊີແບບອັດຕະໂນມັດ ແລະ ສາມາດຕິດຕາມບັນດາໂຄງການທີ່ຂຶ້ນກັບແຕ່ລະກະຊວງ.
ສໍາລັບເນື້ອໃນຝຶກອົບຮົມໃນຄັ້ງນີ້ປະກອບມີ: ການຄຸ້ມຄອງເງິນຊ່ວຍເຫຼືອທາງການເພື່ອການພັດທະນາ, ລົງທະບຽນ User ແລະ ອອກລະຫັດນໍາໃຊ້ລະບົບ, ແນະນໍາຂັ້ນຕອນພື້ນຖານທີ່ຈຳເປັນໃນການ Login, ການນໍາໃຊ້ Teamviewer, ແນະນໍາການສ້າງໃບສັ່ງຈ່າຍເງິນຊ່ວຍເຫຼືອທາງການເພື່ອການພັດທະນາ, ແນະນໍາການພິມແບບຟອມໃບສັ່ງຈ່າຍເງິນ, ແນະນໍາການສ້າງໃບສັ່ງຈ່າຍເງິນຊ່ວຍເຫຼືອທາງການເພື່ອການພັດທະນາ, ແນະນຳການສ້າງສະໂນດນຳສົ່ງເອກະສານມາຄັງເງິນ, ໂດຍໄດ້ແບ່ງອອກເປັນ 4 ຊຸດລວມຜູ້ເຂົ້າຮ່ວມທັງໝົດ 135 ຄົນທີ່ຈາກບັນດາຫົວໜ່ວຍງົບປະມານທີ່ນຳໃຊ້ທຶນຊ່ວຍເຫຼືອທາງການເພື່ອການພັດທະນາ.
ທັງນີ້, ກໍ່ເພື່ອເຮັດໃຫ້ການປະກອບເອກະສານໃບສັ່ງຈ່າຍເງິນຂອງຫົວໜ່ວຍງົບປະມານທີ່ນໍາໃຊ້ທຶນຊ່ວຍເຫຼືອທາງການເພື່ອການພັດທະນາໃຫ້ມີຄວາມສະດວກ, ວ່ອງໄວ ແລະ ສາມາດຕິດຕາມ, ກວດກາການນຳສົ່ງເອກະສານ, ການບັນທຶກບັນຊີໃນລະບົບ GFIS ໄດ້ຢ່າງເປັນລະບົບ ແລະ ເຮັດໃຫ້ພະນັກງານຄັງເງິນແຫ່ງຊາດ, ບັນດາໂຄງການສາມາດຮັບຮູ້, ເຂົ້າໃຈ ແລະ ຈັດຕັ້ງປະຕິບັດໃຫ້ມີຄວາມເປັນເອກະພາບ.
