ອາເຈນຕີນາ ຂຶ້ນທີ 3 ຂອງໂລກ ໃນຮອບ 5 ປີ, ຫວຽດນາມອັນດັບ 1 ອາຊຽນ

ສະຫະພັນບານເຕະນາໆຊາດ ຫລື FIFA ປະກາດຜົນການຈັດອັນດັບໂລກ ທີມບານເຕະຊາຍຫລ້າສຸດເມື່ອວັນທີ 23 ມິຖຸນາ ເຊິ່ງປາກົດວ່າ ອາເຈນຕີນາ ທີມດັງໃນເຂດອາເມລິກາໃຕ້ ກັບມາຢູ່ເກາະກຸ່ມ 3 ອັນດັບທຳອິດໃນຮອບເກືອບ 5 ປີ.

ຄັ້ງນີ້ອາເຈນຕີນາ ຂຶ້ນມາຢູ່ອັນດັບ 3 ຫລັງສ້າງຜົນງານໄດ້ດີຢ່າງຕໍ່ເນື່ອງ ເຊິ່ງເປັນການກັບມາສູ່ຈຸດນີ້ອີກເທື່ອຫນຶ່ງ ນັບຕັ້ງແຕ່ຄັ້ງຫລ້າສຸດເມື່ອເດືອນ 3 ສິງຫາ 2017 ໂດຍແຊງ ຝຣັ່ງ ຈາກເຂດຢູໂຣບ ທີ່ຕົກໄປອັນດັບ 4.

ສ່ວນທີມອັນດັບ 5 ບໍ່ມີການປ່ຽນແປງ, ອັນດັບ 1 ຍັງເປັນ ບຣາຊິລ (ອາເມລິກາໃຕ້), ອັນດັບ 2 ເບລຢ້ຽມ (ຢູໂຣບ) ແລະ ອັນດັບ 5 ອັງກິດ (ຢູໂຣບ).

ສ່ວນທາງດ້ານໂຊນ ເອເຊຍ 3 ອັນດັບທຳອິດປະກອບໄປດ້ວຍ ອັນດັບ 1 ອີຣ່ານ (ອັນດັບ 23 ຂອງໂລກ), ອັນດັບ 2 ຍີ່ປຸ່ນ (ອັນດັບ 24 ຂອງໂລກ) ແລະ ອັນດັບ 3 ສ.ເກົາຫລີ (ອັນດັບ 28 ຂອງໂລກ).

ຂະນະທີ່ອັນດັບ 1 ຂອງອາຊຽນໄດ້ແກ່ ຫວຽດນາມ (ອັນດັບ 97 ຂອງໂລກ), ອັນດັບ 2 ໄທ ( ອັນດັບ 111 ຂອງໂລກ).