ຍອມຮັບຄວາມຈິງ ກ້າປ່ຽນແປງ ຄວາມບົກພ່ອງໝົດແທ້

ຍອມຮັບຄວາມຈິງ ກ້າປ່ຽນແປງ ເປັນສິ່ງປະເສີດທີ່ສຸດ ດີທີ່ສຸດ ໜ້າເຄົາລົບນັບຖືທີ່ສຸດ ເມື່ອຜູ້ໃດໜຶ່ງກ້າຫານຍອມຮັບຈຸດບົກພ່ອງຄ້າງຄາຂອງຕົນ ເຖິງວ່າ ການກ້າຫານນີ້ຫລາຍຄົນວ່າມັນຍາກຍ້ອນບໍ່ຢາກໃຫ້ຜູ້ອື່ນເຫັນພຶດຕິກຳບໍ່ດີບໍ່ງາມຂອງຕົນ. ຂະນະທີ່ຫລາຍຄົນເຫັນ ຫລາຍຄົນຕຳໜິ ພັດຍັງປົກປ້ອງຜົນກະທຳຂອງຕົນ.

ຄົນເຮົາ ເມື່ອກ້າຮັບແລ້ວນໍາໄປປັບ ປຸງ ແກ້ໄຂ ກໍຈະສາມາດເຮັດໃຫ້ຄວາມບົກພ່ອງຄ່ອຍຕົກໄປແ ແລະ ບໍ່ເຮັດຜິດຊໍ້າຊາກອີກ.

ການຕໍາໜິຕົນເອງ, ການຕິຊົມກັນຢ່າງສ້າງສັນແມ່ນການເຮັດວຽກ ເປັນໝູ່ຄະນະ ເພາະເຫັນໄດ້ ທັງອັນດີ ທີ່ຄວນເສີມຂະຫຍາຍ ແລະ ອັນບົກພ່ອງບໍ່ຄັກບໍ່ແນ່ໃນການປະຕິບັດວຽກງານບາງໄລຍະ ຊຶ່ງບໍ່ສາມາດ ປະຕິເສດໄດ້. ການຊອກເຫັນໄດ້ຂອດບົກພ່ອງແລ້ວກ້າຍອມຮັບ ເພື່ອນໍາມາປັບປຸງປ່ຽນແປງໃຫ້ດີຂຶ້ນແມ່ນ ສິ່ງປະເສີດ. ແນວວ່າຄົນເດບໍ່ແມ່ນເທວະດາຟ້າແຖນຄືນິຍາຍ ແລະ ຄວາມເຊື່ອ, ແນ່ນອນການກະທຳຂອງຄົນເຮົາມີທັງດີ ແລະ ບົກພ່ອງ, ແຕ່ຖ້າດີມີຫລາຍຕ້ອງຊົມເຊີຍ ແລະ ຕ້ອງຂະຫຍາຍໄປເລື້ອຍໆ ຢ່າຢຸດແມ່ນແຕ່ວິນາທີດຽວ.

ຫັນມາເບິ່ງການສະທ້ອນບັນຫາທີ່ກົງໄປກົງມາ ແລະ ສ້າງສັນຂອງສະມາຊິກສະ ພາແຫ່ງຊາດໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ຊຶ່ງແຕ່ລະທ່ານລ້ວນແຕ່ຢາກເຫັນການແກ້ໄຂຄວາມບົກພ່ອງຄ້າງຄາໃຫ້ເປັນຮູບປະທໍາ. ຂະນະທີ່ທັດສະນະສັງຄົມທີ່ສ້າງສັນຈໍາ ນວນຫລາຍເຫັນວ່າ ເມື່ອເຫັນບັນຫາບົກພ່ອງແລ້ວ ກໍຕ້ອງກ້າຮັບຄວາມເປັນຈິງ ຈາກນັ້ນກໍຕ້ອງກ້າປັບປຸງ ໃຫ້ດີ ແລະ ພະຍາຍາມສະກັດກັ້ນບໍ່ໃຫ້ເກີດຂຶ້ນອີກ ຖ້າແກ້ໄຂໄດ້ແລ້ວ.

ແນ່ນອນຖ້າຕັດສິນໃຈ ພ້ອມກັນແກ້ໄຂແທ້ ຄົງບໍ່ມີຫຍັງເໜືອບ່າກວ່າແຮງ ຊຶ່ງໃນສະພາບຫຍຸ້ງຍາກປັດຈຸບັນ ຍິ່ງຕ້ອງໄດ້ຕັດສິນໃຈປັບປຸງ ຖ້າບໍ່ເຮັດຫຍັງ ຫລື ມົວແຕ່ແກ້ຕົວ ຫລື ອ້າງວ່າບັນຫາແກ້ໄຂບໍ່ໄດ້ດອກຍິ່ງຈະຈ່ອງຈະຖ່ວງກາຍເປັນການສະສົມ ແລະ ບໍ່ສາມາດແກ້ໄຂບັນຫາໄດ້ເລີຍ ຊຶ່ງມັນຈະເປັນດັ່ງສຳນວນລາວທີ່ວ່າ ຫູໜວກກິນຟານ ນັ້ນເອງ.

ທຸກຄົນຊັ້ນຄົມທົ່ວສັງຄົມກໍຕ້ອງເຂົ້າໃຈບັນຫາ ບໍ່ຄວນຊໍ້າຕື່ມບັນຫາ, ບັນຫາມີໃຫ້ແກ້ ບໍ່ຄວນໜີບັນຫາດັ່ງ ຄໍາຄະຕິພົດ ກໍບອກແລ້ວວ່າ “ຄວາມພະຍາຍາມຢູ່ບ່ອນໃດ ຜົນສໍາເລັດຢູ່ບ່ອນນັ້ນ”.