ການແກ້ໄຂບັນຫາຢາເສບຕິດ ປີທຳອິດ ສົ່ງສຳນວນສັ່ງຟ້ອງໃຫ້ສານ 2.005 ເລື່ອງ
ແຕ່ປີ 2021 ມາຮອດປັດຈຸບັນ, ອົງການໄອຍະການປະຊາຊົນໄດ້ຮັບສໍານວນຄະດີຢາເສບຕິດ 2.582 ເລື່ອງ, ພິຈາລະນາແກ້ໄຂແລ້ວ 2.212 ເລື່ອງກວມກວ່າ 85%, ໃນນັ້ນໄດ້ສັ່ງຟ້ອງສົ່ງສານແລ້ວ 2.005 ເລື່ອງ.
ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ລາຍງານການຈັດຕັ້ງຜັນຂະ ຫຍາຍວາລະແຫ່ງຊາດ ແລະ ການຕິດຕາມກວດກາການນໍາໃຊ້ 7 ມາດຕະການສະກັດກັ້ນຂອງອົງການສືບສວນ-ສອບສວນຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ພາຍໃຕ້ການເປັນປະທານຂອງທ່ານ ສຸວອນ ເລື່ອງບຸນມີ ຮອງປະທານສະພາແຫ່ງຊາດໃນວັນທີ 21 ມິຖຸນາວ່າ:ນອກ ຈາກສຳເລັດການໂຄສະນາເຜີຍແຜ່ມະຕິຄໍາສັ່ງຂອງຂັ້ນເທິງຢ່າງທົ່ວເຖິງບັນດາອົງການໄອຍະການປະຊາ ຊົນແຂວງທົ່ວປະເທດແລ້ວຍັງໄດ້ສ້າງນິຕິກໍາໃຕ້ກົດໝາຍຮັບໃຊ້ໃຫ້ແກ່ການແກ້ໄຂຄະດີຢາເສບຕິດຫລາຍສະບັບ, ອົງການສືບສວນ-ສອບສວນ ແລະ ອົງການໄອຍະການປະຊາຊົນເຂັ້ມງວດຕິດຕາມກວດກາການ ດໍາເນີນຄະດີຢາເສບຕິດຫລາຍຂຶ້ນກວ່າເກົ່າ ໂດຍຈັດຕັ້ງປະຕິບັດ 5 ໂຄງການ ແລະ 18 ກິດຈະກໍາ.
ຂະນະດຽວກັນກໍໄດ້ຕົກລົງເປັນເອກະພາບກັບກະຊວງປ້ອງກັນຄວາມສະຫງົບໂດຍໃຫ້ພະນັກງານໄອຍະການປະຊາຊົນ ຕິດຕາມກວດກາຄະດີຢາເສບຕິດລາຍໃຫຍ່ຮ່ວມກັບເຈົ້າໜ້າທີ່ຕໍາຫລວດແຕ່ຫົວທີເພື່ອເຮັດໃຫ້ ການດໍາເນີນຄະດີຄົບຖ້ວນ, ຮອບດ້ານ ແລະ ພາວະວິໄສ. ຈາກການເລີ່ມຈັດຕັ້ງປະບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດແຕ່ເດືອນກັນຍາ ປີ 2021 ຫາ ປັດຈຸບັນ, ໄດ້ຮັບສໍານວນຄະດີຢາເສບຕິດ 2.582 ເລື່ອງ, ໄດ້ພິຈາລະນາແກ້ໄຂແລ້ວ 2.212 ເລື່ອງກວມກວ່າ 85%, ໃນນີ້ໄດ້ສັ່ງຟ້ອງສົ່ງສານແລ້ວ 2.005 ເລື່ອງ, ຊັດມ້ຽນຄະດີ 11 ເລື່ອງ, ໂຈະການດໍາເນີນຄະດີ 3 ເລື່ອງ,ສົ່ງຄືນໃຫ້ເຈົ້າໜ້າທີ່ສືບສວນ-ສອບສວນຄືນໃໝ່ 193 ເລື່ອງ, ພວມຄົ້ນຄວ້າ 370 ເລື່ອງ.
ອົງການໄອຍະການປະຊາຊົນໄດ້ສຸມໃສ່ຕິດຕາມກວດກາການດໍາເນີນ ຄະດີຢາເສບຕິດດ້ວຍຄວາມຮັບຜິດຊອບຫລາຍຂຶ້ນກວ່າເກົ່າ ໂດຍສະເພາະການຕິດຕາມກວດກາການນໍາໃຊ້ມາດຕະການສະກັດກັ້ນຂອງອົງການສືບສວນ-ສອບສວນຕາມມາດຕາ 136 ກົດໝາຍວ່າດ້ວຍການດໍາເນີນຄະດີອາຍາ ເຊັ່ນການກັກຕົວ, ການຈັບຕົວ, ການກັກຂັງພາງ ແລະ ການປ່ອຍຕົວພາງຜູ້ຖືກຫາຄະດີຢາເສບຕິດ ໃຫ້ເຂັ້ມງວດຂຶ້ນກວ່າເກົ່າ ໂດຍອີງໃສ່ສະຖິຕິແຕ່ປີ 2021 ມາຮອດປັດຈຸບັນ ໄດ້ຕິດຕາມກວດ ກາການຈັດຕັ້ງປະຕິບັດມາດຕະການສະກັດກັ້ນຕາມມາດຕາ 136 ຂອງກົດໝາຍວ່າດ້ວຍການດໍາເນີນຄະ ດີອາຍາ ຄື ອອກຄໍາສັ່ງຈັບຕົວ 3.279 ສະບັບ, ກວດກາຄໍາສັ່ງກັກຕົວ ແລະ ອອກຄໍາສັ່ງກັກຂັງພາງ 14.714 ສະບັບ, ອອກຄໍາສັ່ງຕໍ່ກໍານົດເວລາກັກຂັງພາງ 12.770 ສະບັບ, ໃນນີ້ໄດ້ກັກຂັງຜູ້ຖືກຫາຄະດີຢາເສບຕິດທັງໝົດ 6.628 ຄົນກວມກວ່າ 45% ຂອງຜູ້ຖືກຫາທັງໝົດ 14.714 ຄົນ, ໃນນີ້ອົງການໄອຍະການປະຊາຊົນໄດ້ອອກຄໍາສັ່ງປ່ອຍຕົວພາງຜູ້ຖືກຫາຄະດີອາຍາທົ່ວໄປ 916 ຄົນ, ແຕ່ສໍາລັບຜູ້ຖືກຫາຄະດີຢາເສບຕິດ ບໍ່ໄດ້ປ່ອຍຕົວພາງ.
