ລາຄາອາຫານໃນອາຊີ 6 ເດືອນທ້າຍປີ ກຽມເພີ່ມຂຶ້ນແຮງກວ່າເກົ່າ ສິງກະໂປກະທົບໜັກສຸດ
ວັນທີ 20 ມິຖຸນາ 2022, Nomura Holdings ເປີດເຜີຍລາຍງານລະບຸວ່າ: ລາຄາອາຫານໃນອາຊີມີທ່າອ່ຽງເພີ່ມຂຶ້ນອີກ ໂດຍສິງກະໂປ, ສ.ເກົາຫລີ ແລະ ຟີລິບປິນ ຈະເປັນປະເທດທີ່ລາຄາອາຫານປັບຂຶ້ນຮຸນແຮງສຸດ.
Nomura ຄາດການວ່າ: ລາຄາອາຫານຈະປັບຂຶ້ນອີກໃນໄລຍະເຄິ່ງຫລັງຂອງປີນີ້ ເຊິ່ງເປັນຜົນມາຈາກບັນຫາຕ່າງໆ ທີ່ເກີດຂຶ້ນໃນອາຊີເຊັ່ນ: ການທີ່ຈີນລັອກດາວສະກັດໂຄວິດ, ການແພ່ລະບາດຂອງໄຂ້ຫວັດໝູໃນໄທ ແລະ ຄື້ນຄວາມຮ້ອນຮຸນແຮງໃນອິນເດຍ ໂດຍຖ້າບໍ່ນັບລວມຍີ່ປຸ່ນແລ້ວ ລາຄາອາຫານໃນອາຊີປັບຂຶ້ນເຖິງ 5,9% ເມື່ອທຽບໃສ່ແຕ່ລະປີໃນເດືອນພຶດສະພາ.
ເງິນເຟີ້ທີ່ສູງຂຶ້ນເລີ່ມສົ່ງຜົນກະທົບຕໍ່ການດຳລົງຊີວິດປະຈຳວັນຂອງຜູ້ບໍລິໂພກໃນແຕ່ລະປະເທດ ເນື່ອງຈາກລາຄາສິນຄ້າອຸປະໂພກບໍລິໂພກທີ່ຈຳເປັນຕ້ອງຊື້ເລື້ອຍໆ ເຊັ່ນອາຫານ, ນ້ຳມັນປຸງແຕ່ງອາຫານ ຫລື ຊີ້ນສັດ ໄດ້ເພີ່ມສູງຂຶ້ນຫລາຍ ເຊິ່ງປັດຈຸບັນອິນໂດເນເຊຍ ແລະ ຟີລິບປິນ ໄດ້ປະກາດຂຶ້ນຄ່າແຮງງານຂັ້ນຕໍ່າເພື່ອຮອງຮັບຄ່າຄອງຊີບທີ່ສູງຂຶ້ນແລ້ວ.
ນອກຈາກນີ້, Nomura ຍັງລະບຸອີກວ່າ: ລາຄາເຂົ້າອາດປັບສູງຂຶ້ນນຳ ເນື່ອງຈາກຫລາຍປະເທດອາດຫັນມານຳເຂົ້າເຂົ້າຊະນິດອື່ນໆທົດແທນເຂົ້າສາລີທີ່ມີລາຄາແພງຂຶ້ນຈາກວິກິດຢູເຄຣນ ແລະ ຣັດເຊຍ.
ສະຖານະການດັ່ງກ່າວໄດ້ສ້າງຄວາມສ່ຽງໃຫ້ສິງກະໂປ ເຊິ່ງເປັນຜູ້ນຳເຂົ້າອາຫານລາຍໃຫຍ່ ໂດຍຄາດວ່າສະພາບລາຄາອາຫານເຟີ້ຈະປັບຂຶ້ນເຖິງ 2 ເທົ່າ ມາຢູ່ລະດັບ 8,2% ໃນໄລຍະເຄິ່ງປີຫລັງ, ສ່ວນອິນເດຍມີທ່າອ່ຽງຜະເຊີນລາຄາອາຫານທີ່ສູງເຖິງ 9,1% ເນື່ອງຈາກຕົ້ນທຶນວັດຖຸດິບທີ່ສູງຂຶ້ນ ໂດຍສະເພາະລາຄາຜັກ ເນື່ອງຈາກຄື້ນຄວາມຮ້ອນເຮັດໃຫ້ອາຫານບູດເໜົ່າໄວ.
ອ້າງອີງ:
- https://www.bloomberg.com/news/articles/2022-06-20/worst-is-yet-to-come-for-food-inflation-in-asia-nomura-warns?srnd=premium-asia#xj4y7vzkg
- https://economictimes.indiatimes.com/news/economy/indicators/indias-food-inflation-likely-to-top-9-per-cent-according-to-nomura/articleshow/92338644.cms
