ທູດລາວ ຍື່ນສານຕາຕັ້ງຕໍ່ເຈົ້າຊີວິດໄທ

ວັນທີ 17 ມິຖຸນາ 2022 ຜ່ານມານີ້, ທ່ານ ຄໍາພັນ ອັ່ນລາວັນ ໄດ້ເຂົ້າຍື່ນສານຕາຕັ້ງຕໍ່ສົມເດັດພະເຈົ້າຢູ່ຫົວ ມະຫາວະຊິຣາລົງກອນ ບໍດິນທະຣະເທບພະຍະວະຣາງກູນ, ພະມະຫາກະສັດ ແຫ່ງ ຣາຊະອານາຈັກໄທ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຣາຊະອານາຈັກໄທ ໂດຍມີສຳ ນັກງານຕັ້ງຢູ່ ນະຄອນຫລວງບາງກອກ.

ໃນໂອກາດດັ່ງກ່າວ, ທ່ານ ຄໍາພັນ ອັ່ນລາວັນ ໄດ້ສະແດງຄວາມຂອບໃຈ ແລະ ຖືເປັນກຽດຢ່າງສູງທີ່ໄດ້ເຂົ້າຍື່ນສານຕາຕັ້ງໃນຄັ້ງນີ້. ພ້ອມທັງ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ພັນລະຍາ ສົ່ງເຖິງ ສົມເດັດພະເຈົ້າຢູ່ຫົວ ມະຫາວະຊິຣາລົງກອນບໍດິນ ທະຣະເທບພະຍະວະຣາງກູນ ແລະ ສົມເດັດພະບໍຣົມຣາຊີນີ ພ້ອມດ້ວຍພະບໍຣົມວົງສານຸວົງທຸກພະອົງ ຈົ່ງມີສຸຂະພາບແຂງແຮງ ແລະ ມີພະລານາໄມສົມບູນ.

ທ່ານ ຄໍາພັນ ອັ່ນລາວັນ ຍັງໄດ້ສະແດງຄວາມຮູ້ສຶກພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ຮັບການແຕ່ງຕັ້ງເປັນ ເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຣາຊະອານາຈັກໄທ ເນື່ອງຈາກຣາຊະອານາຈັກໄທ ເປັນປະເທດເພື່ອນມິດບ້ານໃກ້ເຮືອນຄຽງ ຂອງ ສປປ ລາວ ມາແຕ່ດົນນານ ໂດຍຜ່ານມາທັງສອງປະເທດມີສາຍພົວພັນອັນດີ, ມີຮີດຄອງປະເພນີ, ວັດທະນະທຳ ແລະ ພາສາປາກເວົ້າທີ່ຄ້າຍຄືກັນ, ມີການຢ້ຽມຢາມກັນເປັນປົກກະຕິ ໃນທຸກລະດັບນັບແຕ່ການນຳຂັ້ນສູງສຸດ ຮອດປະຊາຊົນ. ຣາຊະອານາຈັກໄທ ເປັນປະເທດຄູ່ຄ້າດ້ານເສດຖະກິດອັນດັບໜຶ່ງຂອງ ສປປ ລາວ ມາຕະຫລອດ, ເປັນປະເທດທີ່ມີການລົງທຶນຢູ່ ສປປ ລາວ ໃນລະດັບຕົ້ນໆໃນຫລາຍປີຜ່ານມາ ແລະ ມີການຊ່ວຍເຫລືອກັນເປັນຢ່າງດີ ຕາມກົນໄກການພົວພັນຮ່ວມມືສອງຝ່າຍໃນດ້ານຕ່າງໆເປັນປົກກະຕິ.

ທ່ານ ຄໍາພັນ ອັ່ນລາວັນ ຍັງໄດ້ຢືນຢັນວ່າ: ຈະທຸ່ມເທທຸກຄວາມສາມາດເຫື່ອແຮງ ເພື່ອເສີມສ້າງ ແລະ ສືບຕໍ່ຮັດແໜ້ນການພົວພັນຮ່ວມມືອັນດີງາມ ແລະ ການຮ່ວມມືອັນມີໝາກຜົນ ເປັນຕົ້ນການຈັດຕັ້ງຜັນຂະຫຍາຍແຜນປະຕິບັດງານການ ເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກໄທ ໃຫ້ເປັນຮູບປະທໍາ, ນຳຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດ ລາວ ແລະ ໄທ ຍິ່ງໆຂຶ້ນ.