ຜູ້ນຳອິນໂດເນເຊຍເຜີຍ ບັນຫາສົງຄາມຢູເຄຣນ ເຮັດໃຫ້ລາຄາອາຫານແພງຂຶ້ນ ສ້າງຄວາມສ່ຽງໃຫ້ປະເທດກຳລັງພັດທະນາ
ທ່ານ ໂຈໂກ ວີໂດໂດ ປະທານາທິບໍດີອິນໂດເນເຊຍ ເປີດເຜີຍວ່າ: ສົງຄາມລະຫວ່າງຣັດເຊຍ ແລະ ຢູເຄຣນ ໄດ້ສົ່ງຜົນໃຫ້ລາຄາອາຫານ ແລະ ພະລັງງາເພີ່ມສູງຂຶ້ນ ເຊິ່ງເຮັດໃຫ້ປະເທດກຳລັງພັດທະນາ ຄືອິນໂດເນເຊຍຕົກຢູ່ໃນຄວາມສ່ຽງ.
ທ່ານ ວີໂດໂດ ໃຫ້ສຳພາດພິເສດຕໍ່ສຳນັກຂ່າວ CNBC ວ່າ: “ສິ່ງທີ່ຂ້າພະເຈົ້າກັງວົນຫລາຍທີ່ສຸດຄືລາຄາອາຫານ. ສະນັ້ນ ເຮົາຕ້ອງການໃຫ້ສົງຄາມໃນຢູເຄຣນຢຸດເຊົາ ໂດຍໃຊ້ການເຈລະຈາກັນ ຫລັງຈາກນັ້ນເຮົາຈຶ່ງຈະສາມາດຕັ້ງເປົ້າໃສ່ການພັດທະນາເສດຖະກິດໄດ້”.
ຄຳກ່າວຂອງທ່ານ ວີໂດໂດ ມີຂຶ້ນຫລັງການຢຸດສະງັກຂອງຕ້ອງໂສ້ອຸປະທານ ເນື່ອງມາຈາກສົງຄາມເຮັດໃຫ້ລາຄາອາຫານທົ່ວໂລກເພີ່ມສູງຂຶ້ນ ໂດຍໂຄງການອາຫານໂລກຂອງອົງການສະຫະປະຊາຊາດ (UN) ເຕືອນວ່າ: ຜູ້ທີ່ຜະເຊີນຄວາມບໍ່ໝັ້ນຄົງດ້ານອາຫານຢ່າງຮຸນແຮງທົ່ວໂລກອາດເພີ່ມຂຶ້ນເປັນ 323 ລ້ານຄົນໃນປີນີ້ ຫລື ເພີ່ມຂຶ້ນຈາກລະດັບ 276 ລ້ານຄົນໃນປັດຈຸບັນ ເປັນຜົນມາຈາກສົງຄາມລະຫວ່າງຣັດເຊຍ ແລະ ຢູເຄຣນ.
ຜູ້ນຳອິນໂດເນເຊຍຈະເຂົ້າປະຊຸມຮ່ວມກັບຜູ້ນຳກຸ່ມ G7 ຕາມຄຳເຊີນຂອງເຈົ້າພາບ ຄືເຢຍລະມັນ ໃນລະຫວ່າງວັນທີ 26-28 ມິຖຸນານີ້ ໂດຍສື່ຕ່າງປະເທດລາຍງານວ່າ: ທ່ານ ວີໂດໂດ ຈະເຂົ້າພົບປະທານາທິບໍດີ ວະລາດິເມຍ ປູຕິນ ຜູ້ນຳຣັດເຊຍ ໃນວັນທີ 30 ມິຖຸນາ.
ທັງນີ້, ທ່ານ ວີໂດໂດ ຕັ້ງເປົ້າຈະເດີນທາງຢ້ຽມຢາມປະເທດຕ່າງໆ ທີ່ມີສ່ວນກ່ຽວຂ້ອງກັບວິກິດອາຫານ ພາຍຫລັງກອງປະຊຸມສິ້ນສຸດລົງ, ແຕ່ຍັງບໍ່ໄດ້ຢືນຢັນວ່າທ່ານຈະເດີນທາງຢ້ຽມຢາມຣັດເຊຍ ຫລື ຢູເຄຣນນຳ ຫລື ບໍ່ ໂດຍທັງສອງປະເທດຖືເປັນໜຶ່ງໃນຜູ້ຜະລິດ ແລະ ຜູ້ສົ່ງອອກເຂົ້າສາລີລາຍໃຫຍ່ທີ່ສຸດຂອງໂລກ ຫລື ຄິດເປັນອັດຕາປະມານ 29% ຂອງຕະຫລາດສົ່ງອອກເຂົ້າສາລີທົ່ວໂລກ.
ນັບແຕ່ໄລຍະສົງຄາມເລີ່ມຂຶ້ນ ລາຄາເຂົ້າສາລີກໍໄດ້ເພີ່ມຂຶ້ນຫລາຍ ເນື່ອງຈາກຢູເຄຣນບໍ່ສາມາດປູກຝັງ ຫລື ສົ່ງອອກໄປປະເທດອື່ນໆໄດ້ຕາມປົກກະຕິ ເຊິ່ງປັດຈຸບັນລາຄາເຂົ້າສາລີເພີ່ມຂຶ້ນຫລາຍກວ່າ 50% ເມື່ອທຽບໃສ່ປີຜ່ານມາ.
ໃນຖານະປະທານກອງປະຊຸມກຸ່ມ G20 ອິນໂດເນເຊຍຈະເປັນເຈົ້າພາບຈັດກອງປະຊຸມສຸດຍອດ Heads of State and Government Summit ໃນບາຫລີເດືອນພະຈິກນີ້ ແລະ ເຖິງວ່າຈະມີສຽງຮຽກຮ້ອງໃຫ້ຖອດຣັດເຊຍອອກຈາກກອງປະຊຸມ, ແຕ່ອິນໂດເນເຊຍຍັງຢືນຢັນຈະເຊີນທ່ານ ປູຕິນ ເຂົ້າຮ່ວມກອງປະຊຸມຜູ້ນຳນຳ. ອີກທັງຍັງໄດ້ສົ່ງຄຳເຊີນໄປຫາທ່ານ ໂວໂລດິເມຍ ເຊເລນສກີ ປະທານາທິບໍດີຢູເຄຣນ ເຖິງວ່າຈະບໍ່ໄດ້ເປັນສະມາຊິກກຸ່ມ G20 ກໍຕາມ ໂດຍຫວັງຈະໃຊ້ເວທີນີ້ໃນການແກ້ໄຂບັນຫາສົງຄາມທີ່ຍືດເຍື້ອມາແຕ່ເດືອນກຸມພາ.
ອ້າງອີງ:
