6 ເນື້ອໃນທີ່ຮອງປະທານສະພາແຫ່ງຊາດ ເນັ້ນຕໍ່ວຽກງານສຶກສາທິການ ແລະ ກິລາ

ວັນທີ 20 ມິຖຸນາ 2022 ນີ້ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ ໄດ້ຖະແຫຼງຂ່າວກ່ຽວກັບຜົນສຳເລັດຂອງສະມາຊິກສະພາແຫ່ງຊາດ (ສສຊ) ໂດຍໄດ້ເນັ້ນ ຕໍ່ວຽກງານສຶກສາທິການ ແລະ ກິລາ 6 ເນື້ອໃນດັ່ງນີ້:

1). ການຈັດຕັ້ງປະຕິບັດບັນດາຄາດໝາຍຂະແໜງສຶກສາທິການ ແລະ ກິລາ, ສສຊ ໄດ້ສະເໜີໃຫ້ລັດຖະບານ ກໍຄື ຂະແໜງກ່ຽວຂ້ອງເອົາໃຈໃສ່ຈັດຕັ້ງປະຕິບັດ 8 ຄາດໝາຍທີ່ບໍ່ທັນບັນລຸ, ເປັນຕົ້ນແມ່ນອັດຕາປະລະການຮຽນຂອງນັກຮຽນ ທີ່ເຫັນວ່າຍັງມີໂຕເລກທີ່ສູງ;

2). ເອົາໃຈໃສ່ການປັບປຸງຄຸນນະພາບການຮຽນ-ການສອນ ໂດຍສະເພາະແມ່ນ ກໍ່ສ້າງ, ຝຶກອົບຮົມ, ຍົກລະດັບຄູສອນ, ຜູ້ອໍານວຍການ, ຜູ້ບໍລິຫານ ໃຫ້ໄດ້ມາດຕະຖານ ແລະ ເປັນມືອາຊີບ; ການແກ້ໄຂ ບັນຫາຄູເຫຼືອບໍ່ພໍ, ການບັນຈຸລັດຖະກອນຄູ ແລະ ບໍລິຫານ, ການແກ້ໄຂບັນຫາຄູອາສາສະໝັກ ໂດຍສະເພາະຢູ່ເຂດຊົນນະບົດຫ່າງໄກສອກຫຼີກ, ໃຫ້ຖືກຕ້ອງສອດຄ່ອງຕາມນິຕິກໍາທີ່ວາງໄວ້;

3). ສະເໜີ ລັດຖະບານພິຈາລະນາ, ຊອກຫາວິທີການເພື່ອພັດທະນາ, ປັບປຸງພື້ນຖານໂຄງລ່າງ ສະຖານສຶກສາ, ສິ່ງອໍານວຍຄວາມສະດວກ, ການສະໜອງວັດຖຸອຸປະກອນການຮຽນ-ການສອນ ໃຫ້ມີຄວາມພຽງພໍ, ທົ່ວເຖິງ; ລວມທັງປັບປຸງສະພາບແວດລ້ອມຂອງສະຖານການສຶກສາ ໃຫ້ໄດ້ມາດຕະຖານ;

4). ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ຄູສອນ, ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ-ຈັນຍາທໍາ; ແຕ່ລະພາກສ່ວນໃນຂະແໜງສຶກສາຕ້ອງມີການປະເມີນຜົນການປະຕິ ບັດໜ້າທີ່ຂອງພະນັກງານ-ລັດຖະກອນ, ຄູ-ອາຈານ ແລະ ຜູບໍລິຫານໃຫ້ເປັນປົກກະຕິຕໍ່ເນື່ອງ ຕາມມາດຕະຖານຂອງວຽກງານປະກັນຄຸນນະພາບການສຶກສາ;

5). ທົບທວນ, ປັບປຸງຫຼັກສູດ ໃຫ້ມີຄວາມແທດເໝາະກັບສະພາບຄວາມເປັນຈິງຂອງປະເທດ, ສອດຄອງກັບແຕ່ລະກຸ່ມເປົ້າໝາຍຜູ້ຮຽນ, ຄົ້ນຄວ້າຮູບແບບ ແລະ ວິທີການສອນໃຫ້ມີຄວາມຫຼາກຫຼາຍ ເຊັ່ນ: ການຮຽນແບບກັບທີ່ໃນຫ້ອງຮຽນ, ການຮຽນນອກສະຖານທີ່, ການຮຽນທາງໄກ ແລະ ອື່ນໆ, ພ້ອມທັງຜະລິດສື່ການຮຽນ-ການສອນ ໃຫ້ເໝາະສົມກັບແຕ່ລະຮູບແບບ ເພື່ອສ້າງເງື່ອນໄຂໃຫ້ພົນລະເມືອງລາວ ໄດ້ເຂົ້າເຖິງການສຶກສາຢ່າງເທົ່າທຽມ ແລະ ທົ່ວເຖິງ, ກ້າວໄປສູ່ຫັນການສຶກສາເປັນດີຈີຕອນ; ລວມທັງສ້າງຄວາມເຂັ້ມແຂງໃຫ້ສະຖານການສຶກສາ ມີຄວາມສາມາດໃນການຮັບມືກັບໄພສຸກເສີນ ແລະ ການແຜ່ລະບາດຂອງພະຍາດຕ່າງໆ;

6). ປັບປຸງກົນໄກການຈັດຕັ້ງປະຕິບັດວຽກງານຕິດຕາມ, ປະເມີນຜົນ ແລະ ປະກັນຄຸນນະພາບການສຶກສາທຸກຊັ້ນ ທຸກສາຍ ທັງພາກລັດ ແລະ ເອກະຊົນ ໃຫ້ເປັນລະບົບ ແລະ ສ້າງຖານຂໍ້ມູນເປັນທັນສະໄໝ ທີ່ສາມາດເຊື່ອມຕໍ່ໃນຂອບເຂດທົ່ວປະເທດ.