ເຈົ້າໜ້າທີ່ກັກຕົວຜູ້ກໍ່ເຫດລັກລົດຈັກ ເຄີຍລັກມາແລ້ວ 5 ຄັ້ງ

ປກສ ນະຄອນຫລວງວຽງຈັນ ລາຍງານວັນທີ 18 ມິຖຸນາ 2022 ນີ້ວ່າ: ໄດ້ຈັບຄົນຮ້າຍລັກລົດຈັກຊື່ ທ້າວ ກໍລະກົດ ອາຍຸ 30 ປີ, ປະຊາຊົນ ຢູ່ບ້ານ ໂພນປ່າເປົ້າ ເມືອງສີສັດຕະນາກ ນະຄອນຫຼວງວຽງຈັນ ເຄື່ອນໄຫວຊັບພົນລະເມືອງ (ປະເພດລົດຈັກ) ມາແລ້ວ 5 ຄັ້ງ, ຄັ້ງຫ້າາສຸດແມ່ນວັນທີ 19 ພຶດສະພາ 2022, ຜູ້ກ່ຽວໄດ້ຂັບຂີ່ລົດຈັກໄປບ້ານ ໂຄກສະອາດ ເມືອງໄຊທານີ ເພື່ອຊອກລັກລົດຈັກ ແຕ່ບໍ່ທັນໄດ້ລັກ ຖືກເຈົ້າໜ້າທີ່ ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ຈັບຕົວແລ້ວນໍາຕົວມາດໍາເນີນຄະດີ.

ຜ່ານການສອບສວນ ທ້າວ ກໍລະກົດ ໃຫ້ການຮັບສາລະພາບວ່າ: ຜ່ານມາເຄີຍເຄື່ອນໄຫວລັກລົດຈັກ ມາແລ້ວ 5 ຄັ້ງ, ຄັ້ງທີ 1 ແລະ 2 ລັກລົດຈັກເວບ 100 ຈໍານວນ 2 ຄັນ ຢູ່ບ້ານໂພນທັນ ເມືອງໄຊເສດຖາ, ບ້ານສະພານທອງ ເມືອງສີສັດຕະນາກ ໃນເດືອນ ເມສາ 2022, ແລະ ຄັ້ງທີ 3, 4 ແລະ 5 ລັກລົດຈັກເວບ 100 ຕື່ມອີກ 3 ຄັນ ໃນເດືອນ ພຶດສະພາ 2022 ຢູ່ບ້ານແສງສະຫວ່າງ ເມືອງໄຊເສດຖາ, ບ້ານທາດຫຼວງກາງ ເມືອງໄຊເສດຖາ ແລະ ບ້ານວັດໄຕນ້ອຍ ເມືອງສີໂຄດຕະບອງ, ພາຍຫຼັງລັກມາໄດ້ແລ້ວ ທ້າວ ກໍລະກົດ ສົ່ງຂາຍອອກຕ່າງແຂວງ ເງິນໄດ້ມາຈາກການຂາຍລົດ ກໍ່ໃຊ້ຈ່າຍກິນຟູມເຟືອຍ ນອກຈາກເຄີຍເຄື່ອນໄຫວລັກຊັບ ຍັງມີການພົວພັນເສບຢາບ້າ ວັນລະ 2-3 ເມັດ ແຕ່ປີ 2009 ເປັນຕົ້ນມາ.

ຕໍ່ກັບຄະດີດັ່ງກ່າວ ປັດຈຸບັນ ເຈົ້າໜ້າທີ່ກຳລັງເປີດກວ້າງຂະຜົນ ຊອກກຸ່ມແກ້ງມາດໍາເນີນຄະດີ ຕາມຂັ້ນຕອນຂອງກົດໝາຍ.