ລັດຖະບານ ຈະເລັ່ງແກ້ໄຂອາສາສະໝັກທີ່ລໍຖ້າບັນຈຸເປັນລັດຖະກອນ ທັງຢູ່ສູນກາງ ແລະ ທ້ອງຖິ່ນ

ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ຊີ້ແຈງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 16 ມິຖຸນາ 2022 ວ່າ: ປີ 2022, ລັດຖະບານໄດ້ອະນຸມັດຕົວເລກລັດຖະກອນໃໝ່ 1.300 ຄົນ, ໃນນີ້ແບ່ງໃຫ້ລັດຖະກອນຄູ 340 ຄົນ ແລະ ແພດ 320 ຄົນ. ປັດຈຸບັນ, ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນພວມຈັດຕັ້ງການສອບເສັງຄັດເລືອກລັດຖະກອນໃໝ່ ເພື່ອບັນຈຸໃຫ້ທັນຕາມກຳນົດເວລາ. ຂະນະດຽວກັນກໍພວມສັງລວມສະຖິຕິພະນັກງານ-ລັດຖະກອນທົ່ວປະ ເທດປີ 2022 ເພື່ອລາຍງານລັດຖະບານໃນເດືອນສິງຫາທີ່ຈະມາເຖິງນີ້.

ທ່ານ ທອງຈັນ ໃຫ້ຮູ້ອີກວ່າ: ເພື່ອແກ້ໄຂບັນຫາພະນັກງານອາສາສະໝັກທີ່ຍັງລໍຖ້າບັນຈຸເປັນລັດຖະກອນ ຢູ່ບັນດາແຂວງໃນຂທົ່ວປະເທດ, ລັດຖະບານ ຈະສືບຕໍ່ຄົ້ນຄວ້າການຫັນຫົວໜ່ວຍວິຊາການທີ່ມີລາຍຮັບໄປກຸ້ມຕົນເອງດ້ານງົບປະມານເທື່ອລະກ້າວໂດຍຫັນເອົາພະນັກງານລັດຖະກອນ, ອາສາສະໝັກ ແລະພະນັກ ງານຕາມສັນຍາເປັນພະລາກອນຕາມຕຳແໜ່ງງານ ເຊິ່ງພະລາກອນ ແມ່ນພະນັກງານລັດ ທີ່ປະຕິບັດໜ້າທີ່ຢູ່ຫົວໜ່ວຍວິຊາການຂອງລັດ ເປັນຕົ້ນບັນດາສະຖາບັນການສຶກສາວິຊາຊີບຂຶ້ນໄປ, ໂຮງໝໍ ແລະບັນດາ ສູນທີ່ສາມາດສ້າງລາຍຮັບກຸ້ມຕົນເອງດ້ານງົບປະມານ.

ປັດຈຸບັນ, ລັດຖະບານໄດ້ທົດລອງຢູ່ 5 ພາກສ່ວນຄືໂຮງໝໍມະໂຫສົດ, ໂຮງໝໍເຊດຖາທິຣາດ, ໂຮງໝໍມິດຕະພາບ, ມະຫາວິທະຍາໄລແຫ່ງຊາດ ແລະ ວິ ທະຍາໄລເຕັກນິກປາກປ່າສັກ. ຖ້າພວກເຮົາສາມາດຫັນໄດ້ສຳເລັດຕາມຄາດໝາຍ ກໍຈະສາມາດຈັດສັນໂກຕ້າລັດຖະກອນຄູ, ແພດ ແລະ ລັດຖະກອນອື່ນໆຂອງບັນດາຫົວໜ່ວຍວິຊາການໄປໃຫ້ເຂດຫ່າງໄກສອກ ຫລີກ, ເຂດທຸລະກັນດານ ແລະ ຂະແໜງການອື່ນໆທີ່ຍັງຂາດເຂີນ.

ພ້ອມນີ້, ຂໍໃຫ້ກະຊວງຄົ້ນຄວ້າສັບຊ້ອນ ລັດຖະກອນຄູຢູ່ໃນຕົວເມືອງ ທີ່ເຫລືອລົງໄປປະຈຳຢູ່ເຂດຊົນນະບົດ, ສືບຕໍ່ຕິດຕາມ, ກວດກາ ແລະ ຄວບຄຸມການຍົກຍ້າຍຂອງລັດຖະກອນຄູຢູ່ເຂດຫ່າງໄກສອກຫລີກເຂົ້າສູ່ຕົວເມືອງ ແລະ ຍົກຍ້າຍມາເປັນລັດຖະກອນບໍລິຫານ, ໃຫ້ສືບຕໍ່ເກັບກຳຂໍ້ມູນລັດຖະກອນຄູສາຍວິຊາສະເພາະທີ່ຍັງຂາດເຂີນເພື່ອວາງແຜນສ້າງບຸກຄະລາກອນສາຍວິຊາສະເພາະທີ່ຍັງຂາດເຂີນພ້ອມທັງສືບຕໍ່ເກັບກຳຂໍ້ມູນພະນັກງານອາສາສະໝັກ, ພະນັກງານຕາມສັນຍາໃຫ້ຈະແຈ້ງ.