ຢູຟາ ກຽມສະເຫນີຈັດເສິກ 4 ເສົ້າ ແທນລາຍການເກົ່າ
ສື່ຊື່ດັງຂອງຝຣັ່ງລາຍງານວ່າ ສະຫະພັນບານເຕະຢູໂຣບ ສະເຫນີຄວາມຄິດທີ່ຈະຈັດການແຂ່ງຂັນລາຍການໃຫມ່ແທນ ການ ແຂ່ງຂັນ ຢູຟາ ຊຸບເປີຄັບ ໃນປັດຈຸບັນ ເຊິ່ງນຳເອົາທີມແຊ໊ມ ຢູຟາ ແຊ໊ມປຽນລີກ ມາພົບກັບ ແຊ໊ມຢູໂຣປາລີກ ໂດຍກຽມປັບຮູບ ແບບໃຫມ່ຕັ້ງແຕ່ປີ 2024 ໃຫ້ເປັນການແຂ່ງຂັນ 4 ເສົ້າໃນເດືອນສິງຫາ ແລະຈັດແຂ່ງຂັນທີ່ປະເທດສະຫະລັດ ອາເມລິກາ ເຊິ່ງຈະແຂ່ງຂັນຮອບຮອງຊະນະເລີດແບບນ໊ອກເອົາ 2 ຄູ່ ຫາຜູ້ຊະນະເຂົ້າໄປຕັດສິນແຊ໊ມກັນອີກ 1 ຄູ່.
ສື່ຍັງໄດ້ລະບຸອີກ ລາຍການໃຫມ່ຂອງ ຢູຟາ ດັ່ງກ່າວ ຈະຍັງມີທີມຢູຟາ ແຊ໊ມປຽນລີກ ລະດູການຫລ້າສຸດເປັນຕົວຢືນ 1 ທີມ ສ່ວນອີກ 3 ທີມຈະນຳເອົາສະໂມສອນລະດັບຫົວແຖວຂອງຢູໂຣບມາຮ່ວມແຂ່ງຂັນ ເພື່ອຊີງເງິນລາງວັນຈຳນວນຫລາຍ ເຊິ່ງແນວຄິດນີ້ໄດ້ຖືກສົ່ງໄປຍັງຜູ້ດຳເນີນການຖ່າຍທອດສົດຫລາຍລາຍທີ່ສົນໃຈການປະມູນລິຂະສິດ ຢູຟາ ແຊ໊ມປຽນລີກ ຕັ້ງແຕ່ປີ 2021-2027 ແລ້ວ.
ເລື່ອງນີ້ແຫລ່ງຂ່າວໄດ້ອ້າງອີງຂໍ້ມູນກ່ອນຫນ້ານີ້ວ່າ ອາເລັກຊານເດີ ເຊເຟຣິນ ປະທານຢູຟາ ມີຄວາມຄິດທີ່ຈະປັບຮູບແບບການ ແຂ່ງຂັນ ຢູຟາ ຊຸບເປີຄັບ ໃຫ້ເປັນທົວນາເມັນ 4 ເສົ້າ ແຕ່ຍັງບໍ່ກຳນົດວ່າອີກ 3 ທີມ ທີ່ຈະມາແຂ່ງຂັນກັບເຈົ້າຂອງແຊ໊ມຢູຟາ ແຊ໊ມປຽນລີກ ຈະມາຈາກໃສແດ່.
ແນວໃດກໍຕາມ ແນວຄິດນີ້ຖືກຕໍ່ຕ້ານໂດຍ ສະຫະພາບນັກເຕະບານອາຊີບໃນຝຣັ່ງ (UNFP) ເຊິ່ງກັງວົນເລື່ອງການຈັດຕາຕະ ລາງທີ່ຫນາແຫນ້ນເກີນໄປ ເພາະອາດສົ່ງຜົນກະທົບເຖິງນັກເຕະທີ່ຈະຕ້ອງເມື່ອຍເພີ່ມຂຶ້ນ ຂະນະທີ່ຕາຕະລາງໃນລະດັບສະໂມສອນ ແລະ ທີມຊາດກໍເກືອບຈະບໍ່ເຫລືອເວລາໃຫ້ນັກເຕະໄດ້ຢຸດພັກ ພ້ອມປະນາມ ຢູຟາ ວ່າເຫັນແກ່ເງິນ ແລະ ຜົນປະໂຫຍດຫລາຍກວ່າ ສຸຂະພາບຂອງນັກເຕະ ແລະ ພາບພົດຂອງວົງການບານເຕະ.
ສ່ວນ ຢູຟາ ຊຸບເປີ ຄັບ 2022 ລະຫວ່າງ ຣຽວ ມາດຣິດ ທີມແຊ໊ມ ຢູຟາ ແຊ໊ມປຽນລີກ ພົບກັບ ໄອທຣັກ ແຟຣັງເຟີດ ທີມແຊ໊ມ ຢູໂຣປາລີກ ຈະແຂ່ງຂັນກັນໃນວັນທີ 10 ສິງຫານີ້ ທີ່ນະຄອນຫລວງ ເຮລຊິງກີ ປະເທດຟິນແລນ.
