ແຕ່ງຕັ້ງ ກົງສຸນກິຕິມະສັກ ແຫ່ງ ສປປ ລາວ ປະຈໍາ ເກາະມິນດານາວ, ສາທາລະນະລັດ ຟິລິບປິນ

ວັນທີ 14 ມິຖຸນາ 2022 ທີ່ຜ່ານມາ, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສາທາລະນະລັດ ຟິລິບປິນ, ທ່ານ ສົງການ ຫລວງມຸນິນທອນ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳ ສາທາລະນະລັດ ຟິລິບປິນ ໄດ້ຕາງໜ້າໃຫ້ລັດຖະບານແຫ່ງ ສປປ ລາວ ມອບສານແຕ່ງຕັ້ງຂອງ ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃຫ້ແກ່ ທ່ານ ໂຈເຊັບ ກູ ຊີ (Joseph Cue Sy) ເພື່ອດຳລົງຕຳແໜ່ງເປັນກົງສູນກິຕິມະສັກ ແຫ່ງ ສປປ ລາວ ປະຈຳ ເກາະມິນດານາວ, ສາທາລະນະລັດ ຟິລິບປິນ, ໂດຍມີຂອບເຂດການເຄື່ອນໄຫວກົງສູນກວມເອົາ ເມືອງ ດາເວົາ ເດອໍຣໍ, ດາເວົາ ເດວນໍເຕດາເວົາ ເດວາຊີ, ດາເວົາ ອໍຣຽນໂທ ແລະ ດາເວົາ ອ໋ອກຊີແດນໂທ, ຊຶ່ງຈະມີພິທີເປີດຫ້ອງການກົງສູນກິຕິມະສັກ ທີ່ເມືອງດາເວົາ, ເກາະມິນດານາວ ໃນໄວໆນີ້.

ໃນໂອກາດນີ້, ທ່ານເອກອັກຄະລັດຖະທູດ ສົງການ ຫລວງມຸນິນທອນ ໄດ້ສະແດງຄວາມຊົມເຊີຍ ແລະ ສະແດງຄວາມເຊື່ອໝັ້ນວ່າ ດ້ວຍຄຸນສົມບັດ, ຄວາມຮູ້ ແລະ ປະສົບການຂອງ ທ່ານ ໂຈເຊັບ ກູ ຊີ ຈະປະຕິບັດໜ້າທີ່ອັນສຳຄັນນີ້ໄດ້ເປັນຢ່າງດີ. ພ້ອມດຽວກັນນີ້, ທ່ານເອກອັກຄະລັດຖະທູດ ສົງການ ຫລວງມຸນິນທອນ ຍັງໄດ້ມອບສານຮັບຮອງການແຕ່ງຕັ້ງກົງສຸນກິຕິມະສັກ ຂອງ ທ່ານ ລອກຊິນ ເຕໂອໂດຣ ຈູເນຍ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ຟິລິບປິນ ໃຫ້ແກ່ ທ່ານ ໂຈເຊັບ ກູ ຊີ ນຳອີກ. ທ່ານ ໂຈເຊັບ ກູ ຊີ ເປັນນັກທຸລະກິດດ້ານອຸດສະຫະກຳບໍ່ແຮ່ ທີ່ປະສົບຜົນສຳເລັດໃນໜ້າທີ່ການງານ ແລະ ເປັນກົງສູນກິຕິມະສັກຂອງ ສປປ ລາວ ຄົນທຳອິດປະຈຳ ປະເທດ ຟິລິບປິນ ແລະ ມີວາລະການດຳລົງຕຳແໜ່ງ 3 ປີ ແລະ ຕໍ່ວາລະໄດ້.