ຊາດີໂອ ມາເນ ບັນລຸຂໍ້ຕົກລົງສ່ວນຕົວຮ່ວມທີມ ບາເຢິນ ມິວນິກ

ຟາບຣີຊີໂອ ໂຣມາໂນ ນັກຂ່າວຄົນດັງລາຍງານວ່າ ຊາດີໂອ ມາເນ ກອງຫນ້າຂອງ ລີເວີພູລ ບັນລຸຂໍ້ຕົກລົງສ່ວນຕົວໃນ ການຍ້າຍໄປຢູ່ກັບ ບາເຢິນ ມິວນິກ ດ້ວຍສັນຍາ 3 ປີ ຂະນະທີ່ການເຈລະຈາລະຫວ່າງ 2 ສະໂມສອນຢູ່ໃນຂັ້ນຕອນສຸດທ້າຍ.

ສຳລັບ ມາເນ ຕົກເປັນຂ່າວຢ່າງຫນັກວ່າຕ້ອງການທີ່ຈະອຳລາ ລີເວີພູລ ໃນຕະຫລາດນັກເຕະລະດູການນີ້ ໂດຍທີມທີ່ຄາດ ວ່າຈະຄວ້າຕົວໄປຮ່ວມທີມນັ້ນກໍຄື ບາເຢິນ ມິວນິກ.

ທີ່ຜ່ານມາມີລາຍງານວ່າ ບາເຢິນ ມິວນິກ ໄດ້ຍື່ນຂໍ້ສະເຫນີໄປຫາ ລີເວີພູລ ໃນການຄວ້າຕົວດາວຍິງອາຍຸ 30 ປີ ມາເສີມທີມແລ້ວ 2 ຄັ້ງ ແຕ່ຖືກປະຕິເສດໄປທັງຫມົດ ເນື່ອງຈາກຄ່າຕົວທີ່ຫນ້ອຍເກີນໄປ.

ຈົນຫລ້າສຸດ ໂຣມາໂນ ນັກຂ່າວຄົນດັງຊາວອິຕາລີ ເປີດເຜີຍວ່າ ມາເນ ບັນລຸຂໍ້ຕົກລົງສ່ວນຕົວທາງວາຈາກັບ ບາເຢິນ ມິວນິກ ແລ້ວ ດ້ວຍສັນຍາ 3 ປີ ຂະນະທີ່ການເຈລະຈາຂອງ ບາເຢິນ ກັບ ລີເວີພູລ ນັ້ນພວມເຂົ້າສູ່ຂັ້ນສຸດທ້າຍ ແລະ ບາເຢິນ ກຽມຍື່ນ ຂໍ້ສະເຫນີຄັ້ງໃຫມ່.

ລາຍງານເພີ່ມຕື່ມວ່າ ລີເວີພູລ ຮູ້ດີເຖິງການຕັດສິນໃຈຂອງ ມາເນ ທີ່ຕ້ອງການຍ້າຍໄປຢູ່ກັບ ບາເຢິນ ມິວນິກ ແລະ ຕອນນີ້ ກໍເຂົ້າໃກ້ຄວາມເປັນຈິງແລ້ວ.