ສສຊ ສະເໜີລັດຖະບານເລັ່ງແກ້ໄຂບັນຫາເງິນເຟີ້ ແລະ ລາຄານໍ້າມັນແພງ

ປັດຈຸບັນ, ປະຊາຊົນໃນຂອບເຂດທົ່ວປະເທດ ພົບຄວາມເດືອດຮ້ອນ ຫລັງປະສົບບັນຫາຄ່າຄອງຊີບຖີບໂຕສູງຂຶ້ນ. ຂະນະທີ່ບັນດາສະມາຊິກສະພາແຫ່ງຊາດ ໄດ້ສະເໜີລັດຖະບານເລັ່ງແກ້ໄຂບັນຫາທີ່ສົ່ງຜົນກະທົບຕໍ່ເສດຖະກິດ ເປັນຕົ້ນ: ໄພເງິນເຟີ້ ແລະ ລາຄານໍ້າມັນແພງ ໃຫ້ປາກົດຜົນເປັນຈິງເພື່ອແກ້ໄຂຊີ ວິດການເປັນຢູ່ຂອງປະຊາຊົນໃຫ້ດີຂຶ້ນ.

ທ່ານ ວົງສະຫວັນ ທິບພະຈັນ ສະມາຊິກສະພາແຫ່ງຊາດເຂດເລືອກຕັ້ງທີ 6 ແຂວງຫລວງພະບາງ ກໍໄດ້ຍົກບັນຫານີ້ເຊັ່ນດຽວກັນໂດຍສະເໜີໃຫ້ລັດຖະບານເລັ່ງແກ້ໄຂ ໂດຍ 6 ເດືອນທ້າຍປີນີ້ຈະມີວິທີການໃດບໍ່ໃຫ້ເໜັງຕີງຫລາຍກວ່າເກົ່າເພາະເຫັນໃຈປະຊາຊົນທີ່ມີລາຍຮັບໜ້ອຍ ຖ້າເປັນແບບນີ້ຕໍ່ໄປຢ້ານເກີດຜົນກະທົບຕາມມາເປັນຕົ້ນ: ການຂາດເຂົ້າກິນເພາະປະຊາຊົນບໍ່ສາມາດຜະລິດໄດ້ເນື່ອງຈາກຂາດນໍ້າມັນແລະ ລາຄາປຸຍທີ່ແພງຂຶ້ນຈາກເມື່ອກ່ອນເປົາລະ 4-5 ແສນກີບແຕ່ປີນີ້ເປົາລະ 1 ລ້ານກີບແລ້ວ ຊຶ່ງເປັນບັນຫາສົ່ງຜົນກະທົບຕໍ່ການຜະລິດກະສິກຳຂອງປະຊາຊົນ. ສ່ວນບັນ ຫາເງິນເຟີ້ເປັນໄປໄດ້ບໍ່ຖ້າກໍານົດຫົວໜ່ວຍອັດຕາແລກປ່ຽນຊື້ໄດ້, ແຕ່ບໍ່ໃຫ້ຂາຍເພື່ອເປັນການດຶງເງິນນອກລະບົບເຂົ້າສູ່ທະນາຄານ.

ທ່ານ ສາຍທອງ ໄຊຍະວົງ ສະມາຊິກສະພາແຫ່ງຊາດເຂດເລືອກຕັ້ງທີ 15 ແຂວງຈໍາປາສັກ ໄດ້ສະເໜີໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 14 ມິຖຸນາວ່າ: ເງິນເຟີ້ ເປັນຜົນມາຈາກການຄຸ້ມຄອງລັດດ້ວຍກົດໝາຍ ຍັງບໍ່ສາມາດຈັດຕັ້ງປະຕິບັດໄດ້ຢ່າງເຂັ້ມງວດພາໃຫ້ເກີດປາກົດການແລກປ່ຽນເງິນຕາຕ່າງປະເທດແບບຊະຊາຍ, ກັກຕຸນ ແລະ ຂຶ້ນລາຄາສິນຄ້າຕາມລຳພັງໃຈ, ການຊື້ຂາຍສິນຄ້າຜ່ານມາ ແລະ ປັດຈຸບັນ ຍັງເປັນເງິນຕາຕ່າງປະເທດ ແລະ ບັນຫາການສົ່ງອອກ-ນໍາເຂົ້າ ກໍຍັງບໍ່ທັນເປັນລະບົບເຂັ້ມງວດ, ຂາດຂອດການຕິດຕາມຄຸ້ມຄອງເງິນຕາ ແລະ ການຜະລິດເປັນສິນຄ້າຢ່າງຈິງຈັງ ຖ້າມີແຕ່ວ່າປະຕິບັດແຕ່ບໍ່ກວດກາ ຖືວ່າເປັນຂໍ້ຄົງຄ້າງ. ສ່ວນບັນຫານໍ້າມັນແພງ, ຂາດເຂີນນໍ້າມັນ, ບາງປໍ້າກັກຕຸນ, ບາງປໍ້າຂາຍແພງກວ່າລາຄາທີ່ລັດວາງອອກກໍໃຫ້ຮີບຮ້ອນແກ້ໄຂຢ່າງເລັ່ງດ່ວນ ເຊິ່ງບັນຫານີ້ໄດ້ສ້າງຄວາມຫຍຸ້ງຍາກຕໍ່ການດໍາລົງຊີວິດ, ການຜະລິດກະສິກໍາ ແລະ ອື່ນໆ.