ສສຊ ເຂດເລືອກຕັ້ງທີ 11 ສະເໜີໃຫ້ລັດຖະບານແກ້ໄຂບັນຫາການຮຽນການສອນ ແລະ ຄູເຫລືອບໍ່ພໍ

ວັນທີ 14 ມິຖຸນາ 2022 ໃນວາລະກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ນາງ ຂັນທອງ ພັນທະຈັກ ສະມາຊິກສະພາແຫ່ງຊາດ ເຂດເລືອກຕັ້ງທີ 11 ແຂວງບໍລິຄຳໄຊ ໄດ້ສະເໜີໃຫ້ລັດຖະບານແກ້ໄຂ ໃນຂົງເຂດການສຶກສາເພື່ອພັດທະນາຊັບພະຍາກອນມະນຸດ ເພື່ອຊຸກຍູ້ເສດຖະກິດ ແລະ ການຈັດຕັ້ງເພື່ອເປັນຕົວຊີ້ວັດໃນຂະແໜງການສຶກສາ ເຊິ່ງໃນນີ້ມີ 2 ບັນຫາຄື :

1 ບັນຫາ ການປັບປຸງຄຸນນະພາບການຮຽນການສອນທຸກຊັ້ນທຸກສາຍໃນໄລຍະໃໝ່ ແລະ ສຳລັບຂໍ້ຫຍຸ້ງຍາກ ທາງດ້ານລັດຖະກອນ ແລະ ຄຸູອາສາ.

ສິ່ງທ້າທາຍຕົ້ນຕໍຈະເຮັດແນວໃດເພື່ອຮັບປະກັນວ່າເດັກນ້ອຍທຸກຄົນຈະໄດ້ຮຽນຮູ້ ຈະໄດ້ຮັບການສຶກສາຂັ້ນພື້ນຖານຢ່າງມີຄຸນນະພາບ, ການຈັດຕັ້ງບັນດາຄາດໝາຍທີ່ບໍ່ສາມາດບັນລຸນັ້ນລ້ວນແຕ່ພົວພັນເຖິງການສຶກສາຂັ້ນພື້ນຖານຂອງເດັກນ້ອຍ, ພ້ອມກັນນັ້ນເດັກຢູ່ໃນເກນອາຍຸເຂົ້າໂຮງຮຽນ ແຕ່ຍັງບໍ່ທັນໄດ້ເຂົ້າໂຮງຮຽນຢ່າງທົ່ວເຖິງ ບັນຫາດັ່ງກ່າວເກີດຈາກຫລາຍສາເຫດຈາກຫລາຍປັດໄຈ, ການກຳນົດນະໂຍບາຍການສຶກສາຈຳນວນໜຶ່ງແມ່ນບໍ່ທັນສອດຄ່ອງກັບຄວາມເປັນຈິງ ແລະ ເງື່ອນໄຂຂອງທ້ອງຖີ່ນ ການສະໜອງເຄື່ອງມື ອຸປະກອນ ຕຳລາການຮຽນ-ການສອນບໍ່ທັນພຽງພໍ ແລະ ທົ່ວເຖິງ ພື້ນຖານໂຄງລ່າງບາງບ່ອນກໍບໍ່ທັນຕອບສະໜອງໄດ້ຕາມຄວາມຕ້ອງການ, ຄວາມເຂົ້າໃຈຂອງຄູຕໍ່ເນື້ອໃນການຮຽນ-ການສອນຕາມຫລັກສູດແບບໃໝ່ແມ່ນຍັງບໍ່ທັນເລິກເຊິ່ງ ບໍ່ໄດ້ຮັບການເຝິກອົບຮົມຢ່າງທົ່ວເຖິງ ຫລື ເຝິກອົບຮົມໄປແລ້ວຈຳນວນໜຶ່ງກໍບໍ່ທັນຊິນເຄີຍຕ້ອງມີຄວາມພະຍາຍາມປັບປ໋ຽນໃນການສິດສອນເປັນຕົ້ນແມ່ນວິຊາຄະນິດສາດ ແລະ ວິຊາພາສາອັງກິດ.

ບັນຫາທີ 2 ແມ່ນ ການແກ້ໄຂບັນຫາຄູເຫລືອບໍ່ພໍ ຫລື ຄູອາສາສະໝັກ ຕາມຄວາມເປັນຈິງຄູສອນຢູ່ໃນແຕ່ລະໂຮງຮຽນແຕ່ລະຊັ້ນຍັງບໍ່ພຽງພໍກັບຄວາມຕ້ອງການ ແຕ່ໃນສະພາບຄູເຫລືອບໍ່ພໍໃນທີ່ນີ້ແມ່ນໝາຍເຖິງຄູເຫລືອບໍ່ພໍບາງວິຊາ, ຕາມການວິເຄາະ ຄູເຫລືອບໍ່ພໍໃນສົກ 2020-2021 ພົບເຫັນ ຄູສອນບໍ່ຖືກວິຊາ 380 ຄົນ ແຕ່ວ່າມີຄູທີ່ບໍ່ພໍຕາມວິຊາທີ່ຕ້ອງການແມ່ນ 618 ຄົນ ໝາຍວ່າພາກປະຕິບັດຕາມມາດຖານທີ່ນິຕິກຳວາງອອກນັ້ນເຫັນວ່າ ເຂດເລືອກຕັ້ງຍັງມີຄວາມຕ້ອງການຄູເພີ່ມຕື່ມ 238 ຄົນ, ເຊິ່ງໂກຕ້າລັດຖະກອນຄູໃນປີ 2022 ນີ້ໄດ້ຮັບພຽງ 11 ຄົນ ການແກ້ໄຂບັນຫາຄູອາສາຍັງເປັນບັນຫາທີ່ແກ່ຍາວ ແລະ ບໍ່ສາມາດແກ້ໄຂໄດ້ຢ່າງທົ່ວເຖິງ, ສະນັ້ນໃນການແກ້ໄຂບັນຫາຄູບໍ່ພຽງພໍແມ່ນມີຄວາມຈຳເປັນຈຶ່ງຮຽກຮ້ອງໃຫ້ເບິ່ງຄືນຄວາມສົມດຸນລະຫວ່າງຄູທີ່ອອກໃນແຕ່ລະປີ ແລະ ຄູທີ່ທົດແທນເຂົ້າໃນແຕ່ລະປີ, ເພີ່ມງົບປະມານເຂົ້າໃນການສຶກສາມີເປົ້າໝາຍທີ່ຊັດເຈນ ໂດຍເລີ່ມຈາກບູລິມະສິດໃຫ້ແກ່ການສຶກສາຂັ້ນພື້ນຖານເດັກກ່ອນໄວຮຽນ ຈະເປັນບັນຫາທີ່ສຳຄັນ ແລະ ເຮັດໃຫ້ນັກຮຽນເຮົາມີຄຸນນະພາບເພີ່ມຂຶ້ນ