ສສຊ ເຂດ18 ແຂວງໄຊສົມບູນ ສະເໜີໃຫ້ລັດຖະບານ ເລັ່ງແກ້ໄຂບັນຫາບັນຫາການຈັບຈອງທີ່ດິນຊະຊາຍ
ກອງປະຊຸມສະໄໜສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 13 ມິຖຸນາ 2022 ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ພາຍຫລັງທ່ານພັນຄຳ ວິພາວັນ ນາຍົກລັດຖະມົນຕີ ໄດ້ລາຍງານສະພາບພົ້ນເດັ່ນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022 ແລ້ວ, ບັນດາສະມາຊິກສະພາແຫ່ງຊາດ ໄດ້ປະກອບຄໍາຄິດຄໍາເຫັນໃສ່ບົດລາຍງານດັ່ງກ່າວໂດຍລວມແລ້ວເຫັນດີເປັນເອກະພາບ. ຂະນະດຽວກັນ, ສສຊ ບາງເຂດສະເໜີໃຫ້ປັບປຸງບາງເນື້ອ ໃນທີ່ເຫັນວ່າ ຍັງບໍ່ສອດຄ່ອງກັບສະພາບຄວາມເປັນຈິງ.
ທ່ານ ແດງ ປະທຸມທອງ ສະມາຊິກສະພາເຂດເລືອກຕັ້ງທີ 18 ແຂວງໄຊສົມບູນ ສະເໜີໃຫ້ລັດຖະບານ ຍົກລະດັບຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນ ຫລັງພົບວ່າ:ໂດຍແກ້ໄຂຄວາມທຸກຍາກ, ການແກ້ໄຂຊີວິດການເປັນຢູ່ຜ່ານມາຍັງຊັກຊ້າ. ຂະນະທີ່ການສ້າງອາຊີບໃໝ່ທີ່ໝັ້ນຄົງ, ການຊຸກຍູ້ການຜະລິດເປັນສິນຄ້າ ເພື່ອສ້າງລາຍຮັບໃຫ້ພໍ່ແມ່ປະຊາຊົນ ຍັງເຮັດໄດ້ໜ້ອຍ, ບໍ່ມີແຜນການ ແລະ ການປະຕິບັດຕົວຈິງຍັງມີໜ້ອຍ. ສຳລັບບັນດາໂຄງການທີ່ອະນຸມັດລົງທຶນໃນປີ 2021-2022 ສະເໜີໃຫ້ລັດຖະບານ ພິຈາລະ ນາຄືນວ່າ: ໂຄງການໃດ ຄວນສືບຕໍ່ ແລະ ຄວນໂຈະ. ນອກນີ້ຍັງມີບັນຫາການຈັບຈອງທີ່ດິນຊະຊາຍທີ່ບໍ່ໄດ້ຮັບການແກ້ໄຂແບບຈິງຈັງ ແລະ ຄວນສ້າງເປັນຂະບວນການໂດຍການລົງໄປບ້ານເພື່ອອອກໃບຕາດິນ ທັງນີ້ເພື່ອແກ້ໄຂການຈັບຈອງທີ່ດິນແບບຊະຊາຍ ແລະ ສົ່ງເສີມການປົກປັກຮັກສາສິ່ງແວດລ້ອມໃຫ້ອຸດົມ ສົມບູນ ແລະ ຫລຸດຜ່ອນໄພພິບັດຕ່າງໆຈາກທຳມະຊາດ.
ສ່ວນ ສສຊ ເຂດເລືອກຕັ້ງທີ 3 ແຂວງຫລວງນໍ້າທາ ແລະ ສສຊ ເຂດເລືອກຕັ້ງທີ 16 ແຂວງເຊກອງ ໄດ້ສະເໜີໃຫ້ລັດຖະບານເລັ່ງແກ້ໄຂບັນຫາປາກທ້ອງ, ອັດຕາແລກປ່ຽນ ຫລື ຄ່າເງິນກີບ, ບັນຫານໍ້າມັນ ທີ່ບໍ່ພຽງພໍຕາມຄວາມຕ້ອງການ, ຄຸ້ມຄອງສິນຄ້ານໍາເຂົ້າ, ສົ່ງເສີມການຜະລິດພາຍໃນໃຫ້ຫລາຍຂຶ້ນ, ສ້າງກຸ່ມຜະລິດພາຍໃນເຊັ່ນ: ການປູກພືດ, ການລ້ຽງສັດ ໂດຍອີງໃສ່ຄວາມເໝາະສົມຂອງແຕ່ລະເຂດ, ແຂວງ ແລະ ເມືອງ.
