ກະຊວງການຕ່າງປະເທດ ຈະເປີດການສຳພາດເຮັດໜັງສືຜ່ານແດນຢູ່ຫລາຍແຂວງ ແລະ ອອກບັດຄິວຜ່ານອອນລາຍໃນການນັດສຳພາດ
ທ່ານ ສີສຸພັນ ມະນີວັນ ຮອງຫົວໜ້າກົມກົງສຸນ ກະຊວງການຕ່າງປະເທດ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວໃນວັນທີ 14 ມິຖຸນາ 2022 ວ່າ: ພາຍຫລັງລັດຖະບານແຈ້ງການເປີດປະເທດແຕ່ວັນທີ 9 ພຶດສະພາ2022 ເປັນຕົ້ນມາ, ປະຊາຊົນມາຂໍເຮັດໜັງສືຜ່ານແດນມີຫລາຍຂຶ້ນບວກໃສ່ຫລາຍປະເທດໄດ້ຫລຸດຜ່ອນມາດຕະການການເຂົ້າ-ອອກເມືອງແລະ ຫລາຍປະເທດເລີ່ມເປີດປະເທດເປັນປົກກະ ຕິ ຈຶ່ງເຮັດໃຫ້ປະຊາຊົນມາຂໍໜັງສືຜ່ານແດນເພີ່ມຂຶ້ນຫລາຍ ແລະ ມີລັກສະນະຮີບດ່ວນ.
ຕໍ່ບັນຫານີ້ພວກເຮົາໄດ້ຊອກຫາວິທີ ແລະມາດຕະການຕ່າງໆ ເພື່ອຮອງຮັບ ແລະ ແກ້ໄຂບັນຫາຢ່າງຮີບດ່ວນໃນສະເພາະໜ້າໂດຍການປຸກລະດົມພະນັກງານພາຍໃນກົມໃຫ້ເສຍສະລະເວລາຂອງຕົນເພື່ອບໍລິການປະຊາຊົນທັງໄດ້ຈັດຕັ້ງພະນັກງານຈຳ ນວນໜຶ່ງ ມາຈັດຄວາມເປັນລະບຽບ ແລະ ກວດກາເອກະສານໃຫ້ປະຊາຊົນຢູ່ພາຍໃນກົມກ່ອນໂມງລັດຖະການ, ເພີ່ມການຮັບເອກະ ສານຄຳຮ້ອງໃນແຕ່ລະວັນຫລາຍຂຶ້ນກວ່າເກົ່າ ໂດຍໃຫ້ພະນັກງານສຳພາດໝົດທຸກຄົນ ເຖິງວ່າຈະກາຍໂມງເລີກວຽກລັດຖະການແລ້ວກໍຕາມ ແລະ ຈະສົ່ງພະນັກ ງານສຳພາດຕື່ມຢູ່ແຕ່ລະສູນຮັບຄຳຮ້ອງຂໍໜັງສືຜ່ານແດນທີ່ຕ່າງແຂວງເພື່ອເພີ່ມຂີດຄວາມສາມາດຮັບຄຳຮ້ອງໃນແຕ່ລະວັນໃຫ້ໄດ້ຫລາຍຂຶ້ນຕື່ມອີກ, ເພີ່ມການເຜີຍແຜ່ຂໍ້ມູນການປະກອບເອກະສານ, ຂັ້ນຕອນການຍື່ນຄໍາຮ້ອງໂດຍຕົນເອງໃຫ້ປະຊາຊົນຮັບຮູ້ ແລະ ບໍ່ຫລົງເຊື່ອບັນດາກຸ່ມນາຍໜ້າທີ່ອ້າງວ່າສາມາດຊ່ວຍແລ່ນເອກະສານໃຫ້ໄດ້, ສ່ວນມາດຕະການແກ້ໄຂບັນຫາໃນໄລຍະຍາວນັ້ນ, ປັດຈຸບັນພວມຄົ້ນຄວ້າ ແລະ ອອກແບບລະບົບແຈກບັດຄິວນັດສຳພາດໂດຍຜ່ານລະບົບອອນລາຍ.
ຕໍ່ສະພາບການທີ່ເກີດຂຶ້ນຜ່ານມາ, ທ່ານ ສີສຸພັນ ມະນີວັນ ຕາງໜ້າກົມກົງສຸນ ສະແດງຄວາມຂໍໂທດມາຍັງປະຊາຊົນທີ່ມາໃຊ້ບໍລິການ ແລະ ຂໍຄວາມຮ່ວມມືມາຍັງຜູ້ທີ່ຕ້ອງການເຮັດໜັງສືຜ່ານແດນນອກຈາກກົມກົງສຸນທີ່ນະຄອນຫລວງວຽງຈັນ, ຍັງມີສູນຮັບຄໍາຮ້ອງຂໍໜັງສືຜ່ານແດນຢູ່ແຂວງອຸດົມໄຊ, ຊຽງຂວາງ, ໄຊຍະບູລີ, ຄຳມ່ວນ, ສະຫວັນນະເຂດ ແລະ ແຂວງຈຳປາສັກ.
ໃນໄລຍະນີ້ປະຊາຊົນທີ່ຢູ່ແຂວງເຫລົ່ານີ້ ຫລື ບັນດາແຂວງໃກ້ຄຽງສາມາດໄປໃຊ້ບໍລິການຢູ່ບັນດາສູນຮັບຄຳຮ້ອງດັ່ງກ່າວເພື່ອຫລຸດຜ່ອນຄ່າໃຊ້ຈ່າຍການ ເດີນທາງທັງຫລຸດຜ່ອນຄວາມແອອັດຢູ່ນະຄອນຫລວງວຽງຈັນ ແລະ ຂໍໃຫ້ມີສະຕິຢ່າຫລົງເຊື່ອບັນດານາຍ ໜ້າທີ່ອ້າງຕົນວ່າຈະສາມາດພາໄປເຮັດ ຫລື ຊ່ວຍແລ່ນເອກະສານ ທັງເລັ່ງລັດຂັ້ນຕອນການອອກໜັງສືຜ່ານແດນໃຫ້ຕົນໄດ້ໄວຢູ່ນະຄອນຫລວງວຽງຈັນ, ແຕ່ເຈົ້າໜ້າທີ່ຈະພິຈາລະນາອຳນວຍຄວາມສະດວກອອກດ່ວນໃຫ້ສະເພາະກໍລະນີສຸກເສີນເຊັ່ນຄົນເຈັບທີ່ຈໍາເປັນເດີນທາງດ່ວນໄປປິ່ນປົວຢູ່ຕ່າງປະເທດໂດຍມີເອກະ ສານຢັ້ງຢືນຈາກໂຮງໝໍເທົ່ານັ້ນ.
