5 ເດືອນຕົ້ນປີ 2022 ທະນາຄານ ແຫ່ງ ສປປ ລາວ ກວດພົບຮ້ານແລກປ່ຽນເງິນຕາ ຜິດກົດໝາຍ 137 ຮ້ານ
ວັນທີ 13 ມິຖຸນາ 2022 ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານການຈັດຕັ້ງປະຕິບັດແຜນເງິນຕາໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຕໍ່ກອງປະຊຸມສະໄໝສາມັນເທື່ອທີ 3 ຂອງສະມາຊິກສະພາແຫ່ງຊາດຊຸດທີ IX ໃຫ້ຮູ້ວ່າ:
ໃນໄລຍະ 5 ເດືອນຕົ້ນປີ 2022, ທະນາຄານ ແຫ່ງ ສປປ ລາວ ໄດ້ລົງກວດກາການເຄື່ອນໄຫວ
– ພົບຮ້ານແລກປ່ຽນເງິນຕົວແທນ ແລະ ຫົວໜ່ວຍທຸລະກິດແລກປ່ຽນເງິນຕາແບບຜິດກົດໝາຍ ໃນຂອບເຂດທົ່ວປະເທດ ຈໍານວນ 137 ຮ້ານ;
– ຖອນໜັງສືອະນຸຍາດດໍາເນີນທຸລະກິດແລກປ່ຽນເງິນຕາ ຈາກບັນດາຮ້ານແລກປ່ຽນເງິນຕາທີ່ບໍ່ສາມາດເປັນຕົວແທນຂອງທະນາຄານທຸລະກິດ ໄດ້ທັງໝົດ 101 ຮ້ານ;
ປະຕິບັດມາດຕະການລົງໂທດຕໍ່ບັນດາຮ້ານແລກປ່ຽນເງິນຕາຕົວແທນ ທີ່ເຄື່ອນໄຫວບໍ່ສອດຄ່ອງ ແລະ ຫົວໜ່ວຍທຸລະກິດແລກປ່ຽນເງິນຕາແບບຜິດກົດໝາຍ ດ້ວຍຮູບການຕ່າງໆ ເປັນຕົ້ນ
– ຖອນໜັງສືອະນຸຍາດດໍາເນີນທຸລະກິດ
– ລະງັບບັນຊີເງິນຝາກ
– ປັບໃໝ
– ເຮັດບົດບັນທຶກກ່າວເຕືອນ.
ພ້ອມກັນນີ້, ໄດ້ຮ່ວມເຮັດວຽກກັບຂະແໜງສື່ມວນຊົນ ເພື່ອຊ່ວຍເປັນກະບອກສຽງໃນການໂຄສະນາ ກ່ຽວກັບໂທດຂອງການເຄື່ອນໄຫວແລກປ່ຽນແບບຜິດກົດໝາຍ ແລະ ລະດົມມວນຊົນໃນການຊ່ວຍສະກັດກັ້ນ ແລະ ຕ້ານການເຄື່ອນໄຫວທີ່ບໍ່ຖືກຕ້ອງດັ່ງກ່າວ.
