ຊາຍຊາວຈີນຟ້ອງຢ່າຮ້າງເມຍ ຢູ່ນຳກັນມາ 16 ປີ ຫາກໍຮູ້ ລູກສາວ 3 ຄົນ ບໍ່ແມ່ນລູກຕົນເອງ
ຊາຍຊາວຈີນຂໍຢ່າຮ້າງຈາກເມຍທີ່ແຕ່ງດອງກັນມາ 16 ປີ ຫລັງຈາກຜົນການທົດສອບທາງພັນທຸກຳລະຫວ່າງລາວກັບລູກສາວທັງ 3 ຄົນ ບົ່ງຊີ້ວ່າ: ບໍ່ມີການກ່ຽວຂ້ອງກັນທາງສາຍເລືອດ.
ໃນປີຜ່ານມາ, ຊາຍອາຍຸ 45 ປີ ເຊິ່ງລະບຸພຽງຊື່ສະກຸນວ່າ: “ເສິນ” ຈາກມົນທົນຈຽງຊີ ປະເທດຈີນ ເລີ່ມສົງໄສພຶດຕິກຳຂອງເມຍ ເຊິ່ງລະບຸພຽງຊື່ສະກຸນວ່າ: “ອີ໋” ໃນຊ່ວງນັ້ນ ເສິນ ຕ້ອງໄປເຮັດວຽກຕ່າງເມືອງ ເພື່ອຫາເງິນລ້ຽງຄອບຄົວ ແຕ່ກໍຍັງຕິດຕໍ່ກັບເມຍທາງໂທລະສັບເປັນປະຈຳ ຈົນລາວຮູ້ສຶກວ່າ ຝ່າຍເມຍເລີ່ມຫລີກລ່ຽງການຮັບໂທລະສັບຂອງລາວ ແລະ ບອກວ່ານາງຢາກອອກໄປເຮັດວຽກ.
ເມື່ອວັນທີ 1 ມີນາຜ່ານມາ, ເສິນ ລັກຕາມເມຍໄປຈົນພົບວ່າ ນາງເຂົ້າພັກຢູ່ໂຮງແຮມແຫ່ງໜຶ່ງ ແລະ ລາວໄດ້ເຫັນນາງເຊັກເອົາອອກຈາກໂຮງແຮມດັ່ງກ່າວພ້ອມກັບຜູ້ຊາຍອີກຄົນໜຶ່ງ.
ເຖິງວ່າ ເສິນ ຈະບໍ່ເອົາຜິດກັບເມຍ ແຕ່ລາວຕັດສິນໃຈທີ່ຮັບການກວດສອບທາງພັນທຸກຳລະຫວ່າງລາວກັບລູກສາວທັງ 3 ຄົນ ເຊິ່ງຜົນປາກົດອອກມາວ່າ ພວກເຂົາບໍ່ມີການກ່ຽວຂ້ອງກັນທາງສາຍເລືອດ ແລະ ບໍ່ແມ່ນພໍ່-ລູກກັນແທ້ໆ ພຽງແຕ່ຄົນດຽວ.
ທັງຈາກຄວາມຈິງເປີດເຜີຍ ອີ໋ ຜູ້ເປັນເມຍໄດ້ຫາຍຕົວໄປ ແລະ ບໍ່ສາມາດຕິດຕໍ່ໄດ້, ເສິນ ຈຶ່ງຕິດຕໍ່ສື່ມວນຊົນໃນທ້ອງຖິ່ນ ເພື່ອຂໍການຊ່ວຍເຫລືອໃນການຕາມຫາເມຍ ຈົນສະຖານນີໂທລະພາບແຫ່ງໜຶ່ງສາມາດຕິດຕໍ່ ອີ໋ ໄດ້ທາງໂທລະສັບ ແຕ່ນາງປະຕິເສດວ່າບໍ່ເຄີຍນອກໃຈ ເສິນ. ອີກທັງກ່າວວ່າ: ການກວດສອບດີເອັນເອບໍ່ແມ່ນເລື່ອງສຳຄັນ. ນອກຈາກນີ້ ນາງຍັງຕຳໜິທີ່ຜົວຂອງນາງຄິດຈະຢ່າຮ້າງຈາກກັນ.
ອີ໋ ຮຽກຮ້ອງຂໍຄວາມເຫັນໃຈ ໂດຍອ້າງວ່າ: ຜົວເມຍຫລາຍຄູ່ທີ່ເປັນໝັນຍັງຮັບລູກບຸນທຳມາລ້ຽງ, ນາງກ່າວຕຳໜິຜົວວ່າ: ລູກສາວທັງ 3 ຄົນຂອງນາງເອີ້ນ ເສິນ ວ່າ “ພໍ່” ມາຕະຫລອດເວລາຫລາຍປີ ແຕ່ຕອນນີ້ລາວພັດເວົ້າວ່າ: ລູກທັງ 3 ຄົນບໍ່ແມ່ນລູກຂອງລາວ.
ເຖິງຢ່າງໃດກໍຕາມ, ທີ່ປຶກສາທາງກົດໝາຍຂອງຈີນຈາກສະຖານີໂທລະພາບຈຽງຊີກ່າວວ່າ: ໃນກໍລະນີນີ້ ເສິນ ມີສິດເຕັມສ່ວນທີ່ຈະຟ້ອງຢ່າຮ້າງ ຖ້າລາວເຊື່ອວ່າພຶດຕິກຳຂອງ ອີ໋ ທຳລາຍການພົວພັນຂອງພວກເຂົາໂດຍສິ້ນເຊີງ. ນອກຈາກນີ້ ລາວຍັງມີສິດຟ້ອງສານເພື່ອຮຽກຮ້ອງໃຫ້ ອີ໋ ຄືນເງິນທີ່ລາວຈ່າຍເປັນຄ່າລ້ຽງດູເດັກທັງສາມຄົນ ລວມທັງຄ່າທຳຂວັນ ເນື່ອງຈາກຖືວ່າເປັນການທຳຮ້າຍທາງຈິດໃຈ.
