ແມນເຊສເຕີ ຢູໄນເຕັດ ພ້ອມຈ່າຍຄ່າເມື່ອຍເທົ່າກັບ ໂຣນັລໂດ ຫວັງດຶງ ເລວານດອບສະກີ ຍ້າຍຮ່ວມທີມ

ສຳນັກຂ່າວ Mirror ລາຍງານວ່າ ແມນເຊສເຕີ ຢູໄນເຕັດ ສະໂມສອນດັງຈາກພຣີເມຍລີກ ອັງກິດ ກຽມເຂົ້າຮ່ວມວົງໃນການລ່າຕົວ ໂຣເບີດ ເລວານດອບສະກີ ກອງຫນ້າຊື່ດັງຂອງທີມຊາດໂປແລນ ທີ່ກ່ອນຫນ້ານີ້ອອກມາຢືນຢັນວ່າພວມຈະບອກລາ ບາເຢິນ ມິວນິກ ຕົ້ນສັງກັດໃນບຸນເດສລີກາ ເຢຍລະມັນ.

ກ່ອນຫນ້ານີ້ ເລວານດອບສະກີ ທີ່ເຫລືອສັນຍາກັບ ບາເຢິນ ມິວນິກ ອີກ 1 ປີ ໃຫ້ສຳພາດກັບ ໂອເນັດ ສະປອດ ສື່ໃນບ້ານເກີດ ໂດຍຢ້ຳວ່າ ຕ້ອງການຍ້າຍອອກຈາກ ບາເຢິນ ມິວນິກ ແລະ ຍ້າຍໄປຫລິ້ນໃຫ້ບາເຊໂລນາ ‘‘ ຂ້ອຍຕ້ອງການອອກຈາກຈາກ ບາເຢິນ ມິວນິກ ເທົ່ານັ້ນ ຄວາມພັກດີ ແລະ ຄວາມເຄົາລົບກັນ ແລະ ກັນ ສຳຄັນກວ່າທຸລະກິດ ວິທີທີ່ດີທີ່ສຸດຄືການຫາທາງແກ້ໄຂຮ່ວມກັນ ບາງຢ່າງໃນຕົວຂ້ອຍຕາຍໄປແລ້ວ ຂ້ອຍຢາກອອກຈາກ ບາເຢິນ ມິວນິກ ເພື່ອເພີ່ມອາລົມໃຫ້ຫລາຍຂຶ້ນໃນຊີວິດ ’’.

ຂະນະດຽວກັນມີລາຍງານວ່າ ລາວອາດຈະຍ້າຍໄປຫລິ້ນໃນ ລາ ລີກາ ສະເປນ ກັບສະໂມສອນດັງຢ່າງ ບາເຊໂລນາ ແນວໃດກໍຕາມ ທີມດັງຈາກສະເປນຍັງຄົງມີບັນຫາດ້ານການເງິນຂອງສະໂມສອນ ເຮັດໃຫ້ອາດຈຳເປັນຕ້ອງປ່ອຍນັກເຕະບາງຄົນ ອອກຈາກທີມ ກ່ອນ ຈຶ່ງຈະສາມາດຊື້ນັກເຕະທີມຊາດໂປແລນໄປຮ່ວມທີມໄດ້.

ແນວໃດກໍຕາມຫລ້າສຸດ ມີການເປີດເຜີຍວ່າ ແມນເຊສເຕີ ຢູໄນເຕັດ ໄດ້ເຂົ້າມາຮ່ວມວົງໃນການລ່າຕົວ ເລວານດອບສະກີ ແລ້ວ ແລະທີມແມນຢູ ພ້ອມຈະສະເຫນີຄ່າເມື່ອຍອາທິດລະ 400,000 ປອນ ເຊິ່ງເປັນຄ່າເມື່ອຍທີ່ທຽບເທົ່າກັບດາວຍິງຢ່າງ ຄຣິສຕຽນໂນ ໂຣນັລໂດ.

ຂະນະທີ່ທາງຝັ່ງຂອງ ບາເຢິນ ມິວນິີກ ລາຍງານລະບຸວ່າ ທີມແຊ໊ມບຸນເດສລີກາ ຕ້ອງການຄ່າຕົວ 20 ລ້ານປອນ ເພື່ອແກກັບ ການປ່ອຍໃຫ້ ເລວານດອບສະກີ ໄດ້ຍ້າຍໄປລ່າປະຕູໃນຖິ່ນໂອນແທຣຟຟອດ.