ນ້ຳມັນຄືໜຶ່ງທີ່ເປັນຕົ້ນເຫດເຮັດໃຫ້ລາຄາສິນຄ້າຂຶ້ນສູງ

ໂດຍ: ທິດກໍ່າ

ສະພາບການຈັບຈ່າຍຊື້ວັດຖຸສິ່ງຂອງ, ອາຫານການກິນ ນັບແຕ່ເຄື່ອງອຸປະໂພກ-ບໍລິໂພກໃນທ້ອງຕະຫລາດ ແລະ ບັນດາຕຶກ, ຫ້າງຮ້ານໃນປັດຈຸບັນ ລາຄາມັນພຸ່ງສູງຂຶ້ນຢ່າງເຫັນກັບຕາ. ອັນສາເຫດໜຶ່ງກໍຍ້ອນວ່າ ລາຄານ້ຳມັນຂຶ້ນຕິກໆ. ຈາກບັນຫາວິກິດນ້ຳມັນແພງທີ່ປະຊາຊົນລາວພວມຜະເຊີນ ໄດ້ກາຍເປັນກະແສສັງຄົມທີ່ວິພາກວິຈານຕ່າງໆນາໆ ທັງໃນທາງບວກ ແລະ ທາງລົບ. ຫາກພວກເຮົາພ້ອມກັນມາຕັ້ງບັນຫາເຖິງສາເຫດ ມັນກໍເປັນພວງພະນັງນຳກັນໄປທົ່ວໂລກ ຍ້ອນບັນຫານ້ຳມັນຂາດເຂີນ. ສຳລັບປະເທດລາວຂອງພວກເຮົາທີ່ມີເສດຖະກິດບອບບາງມາຫລາຍປີກໍຍິ່ງມີຜົນກະທົບຢ່າງໜັກໜ່ວງຢ່າງປະຕິເສດບໍ່ໄດ້.

ຫາກຕັ້ງໂຈດກັນວ່າ, ບັນດາຜົນກະທົບທີ່ເກີດຂຶ້ນໃນປັດຈຸບັນ ແລະ ອະນາຄົດນັ້ນມັນມີຫຍັງແດ່ ? ຄຳຕອບໂຈດກໍຄື: ກະທົບໄປທຸກຢ່າງ ລາມໄປທຸກບ່ອນທຸກທີ່ ບໍ່ວ່າພາກອຸດສາຫະກຳ, ກະສິກຳ ແລະ ການບໍລິການຕ່າງໆທີ່ມີໃນສັງຄົມ. ແຕ່ອັນທີ່ພວກເຮົາຈະພາກັນເປັນທຸກອຶດຫິວໃນຕໍ່ໜ້າກໍຄື ການຂາດເຂີນສະບຽງອາຫານ, ອຶດເຂົ້າຢາກເກືອ ຖ້າພວກເຮົາບໍ່ຂຸ້ນຂ້ຽວພາກັນແກ້ໄຂໂດຍໄວ ແລະ ກຽມຮັບມືກັບມັນຢ່າງຈິງຈັງ ແລະ ເດັດຂາດຕັ້ງແຕ່ເວລານີ້ເປັນຕົ້ນໄປ. ຈາກປັດໄຈການຜະລິດນ້ຳມັນໜ້ອຍຄວາມຕ້ອງການຫລາຍເປັນຕົ້ນເຫດໃຫ້ສິນຄ້າທຸກຢ່າງຖີບຕົວສູງຂຶ້ນຈົນບໍ່ສາມາດຜະລິດສິນຄ້າອອກມາຈຳໜ່າຍ ຫລື ຖ້າມີການຜະລິດ ລາຄາກໍສູງເກີນຄວາມເປັນຈິງ.

ຕົວຢ່າງ: ການເຮັດນາປີ, ນາແຊງ, ການປູກຝັງ, ລ້ຽງສັດ ກໍມີປະລິມານໜ້ອຍລົງ ເພາະໃຜກໍເຮັດພໍແຕ່ກຸ້ມຢູ່ກຸ້ມກິນ ຍ້ອນນ້ຳມັນແພງ, ປຸ໋ຍແພງ, ຢາຂ້າສັດຕູພືດແພງ, ອຸປະກອນໃນການຜະລິດກໍແພງ, ຊ້ຳບໍ່ໜຳ ສະພາບນ້ຳມັນພັດຂາດປ້ຳຕ້ອງເຂົ້າຄິວລຽນແຖວລໍຖ້າເປັນສາມສີ່ຊົ່ວໂມງຈຶ່ງໄດ້ໃສ່ລົດ, ຍິ່ງໄປກວ່ານັ້ນ ເຫັນບາງປ້ຳກໍປານປາງບຸນທາດຫລວງ.

ນີ້ຄືເຫດການ ແລະ ປາກົດການໃໝ່ຫລັງໂຄວິດ-19 ເຊິ່ງບາງມື້ຊາວນະຄອນຫລວງວຽງຈັນຕ້ອງປະສົບພົບພໍ້ ແລະ ຢູ່ຕ່າງແຂວງໃນທົ່ວປະເທດກໍມີລັກສະນະຄ້າຍໆຄືກັນ. ຕາມທິດກໍ່າວ່າ, ອັນນີ້ມັນບໍ່ແມ່ນເລື່ອງຈິດຕະສາດ ມັນຕັ້ງແມ່ນບັນຫາການຂາດເຂີນນ້ຳມັນອີ່ຫລີ. ມີເງິນຊື້ນ້ຳມັນ ແຕ່ນ້ຳມັນຊ້ຳພັດບໍ່ພຽງພໍ. ຂີ່ລົດຫາເລາະໃສ່ນ້ຳມັນ ສຸດທ້າຍມານ້ຳມັນໃນລົດກໍໝົດ.

ແຕ່ແນວໃດກໍຕາມ, ເພື່ອແກ້ໄຂບັນຫາວິກິດທີ່ເກີດຂຶ້ນນີ້ ພວກເຮົາຕ້ອງພາກັນແກ້ ແລະ ພາກັນເຂົ້າໃຈຢ່າງພາວະວິໄສ. ຕາມທິດກໍ່າວ່າ, ກ່ອນອື່ນໝົດພວກເຮົາຕ້ອງເພີ່ມທະວີໃນການປະຢັດທຸກຢ່າງເທົ່າທີ່ຈະປະຢັດໄດ້ ທັງນີ້ກໍເພື່ອຄວາມຢູ່ລອດປອດໄພໃນສັງຄົມ. ອັນສອງມາກໍແມ່ນສຸມໃສ່ການປູກ, ການລ້ຽງແບບເພິ່ງຕົນເອງກຸ້ມຕົນເອງຕາມສະພາວະການປ່ຽນແປງຂອງສັງຄົມໃນຍຸກໂລກາພິວັດ. ແຕ່ທີ່ສຳຄັນບໍ່ຄວນໄປເຮັດຜິດກົດໝາຍບ້ານເມືອງ. ຈາກພະຍາດຄວາມອຶດຫິວທີ່ອາດຈະເກີດຂຶ້ນໃນພາຍໜ້າ ພວກເຮົາຕ້ອງກຽມຮັບມືກັບມັນໄວ້.

ສ່ວນວ່າວິທີການແກ້ໄຂອີກຢ່າງໜຶ່ງ ທ່ານນາຍົກລັດຖະມົນຕີໄດ້ແຕ່ງຕັ້ງ ຄະນະສະເພາະກິດ ຮັບຜິດຊອບຊີ້ນຳ ແລະ ວາງມາດຕະການຮີບດ່ວນ ໃນການແກ້ໄຂບັນຫານ້ຳມັນເຊື້ອໄຟ, ລາຄາສິນຄ້າ ແລະ ເງິນຕາຕ່າງປະເທດ ແລະ ມີການປັບຫລຸດອາກອຊົມໃຊ້ນໍ້າມັນແອັດຊັງລົງຍັງເຫລືອ 5% ແລະ ກາຊວນລົງຍັງຫລືອ 0%

ເຖິງຢ່າງໃດກໍດີ, ພວກເຮົາກໍມີຄວາມເຊື່ອໝັ້ນການນຳພາຂອງພັກ ແລະ ລັດຖະບານ ເພາະທຸກສິ່ງທຸກຢ່າງຍ່ອມມີທາງອອກ ແລະ ມີການແກ້ໄຂ, ແຕ່ຈະໄວ ຫລື ຊ້ານັ້ນກໍຍ່ອມຂຶ້ນກັບປັດໄຈ ແລະ ເງື່ອນໄຂນອກຕົວ ແລະ ໃນຕົວ. ອີກບໍ່ນານເກີນລໍ 2 ບໍລິສັດກັ່ນນ້ຳມັນຂອງລາວທີ່ຕັ້ງຂຶ້ນໃໝ່ໆໝາດໆຈະຜະລິດນ້ຳມັນມາບໍລິການຮັບໃຊ້ປະຊາຊົນຢ່າງພຽງພໍ ເຊິ່ງປັດຈຸບັນແມ່ນໄດ້ເຊັນສັນຍາກັບບໍລິສັດນ້ຳມັນເຊື້ອໄຟລາວເປັນທີ່ຮຽບຮ້ອຍແລ້ວ, ຄາດວ່າບໍ່ປີນີ້ກໍປີໜ້າ ຫລື ອີກປີຮື ແລະ ປີຕໍ່ໆໄປ ພວກເຮົາຈະໄດ້ໃຊ້ນ້ຳມັນລາຄາຖືກຢ່າງແນ່ນອນ.