ຍາມວິກິດ ເອົາຊິວິດລອດໄດ້ແນວໃດ?

ໂດຍ: ລູກເມືອງພວນ

ວິກິດການເສດຖະກິດໃນຂະນະນີ້ມີຄວາມຮຸນແຮງຂຶ້ນຊັກໄຊ້ໃນທົ່ວໂລກ ໂດຍສະເພາະລາຄານໍ້າມັນ, ລາ ຄາຄຳ, ວັດຖຸສິ່ງຂອງທຸກຢ່າງ, ໄພເງິນເຟີ້ ໄດ້ສົ່ງຜົນກະທົບຕໍ່ການດຳລົງຊີວິດຂອງມວນມະນຸດໃນລະດັບທີ່ແຕກຕ່າງກັນ.

ເວົ້າສະເພາະຢູ່ປະເທດເຮົາຍິ່ງມີຄວາມຫຍຸ້ງຍາກບໍ່ໜ້ອຍ ເພາະປະເທດເຮົາເປັນປະເທດນ້ອຍດ້ອຍພັດທະນາ, ເສດຖະກິດ, ຊີວິດການເປັນຢູ່ຂອງປະຊາຊົນຍັງອາໄສເຄິ່ງທຳມະຊາດ ແລະ ເຄິ່ງອຸດສາຫະກຳ-ເຕັກໂນໂລຊີ.

ການຜະລິດຍັງອ່ອນນ້ອຍ, ສິນຄ້າເຄື່ອງຂອງຮັບໃຊ້ໃນການດຳລົງຊິວິດປະ ຈຳວັນຍັງອາໄສການນຳເຂົ້າຈາກຕ່າງປະເທດເປັນສ່ວນໃຫຍ່. ເມື່ອຕ່າງປະເທດກໍຫຍຸ້ງຍາກເຊັ່ນດຽວກັນ ເຂົາເຈົ້າກໍຈະຫຼຸດຜ່ອນການສົ່ງອອກສິນຄ້າຂອງຕົນອອກຕ່າງປະເທດໃຫ້ໜ້ອຍລົງ ກັກຕຸນໄວ້ເພື່ອລ້ຽງປະ ຊາຊົນພາຍໃນປະເທດ ຈຶ່ງເຮັດໃຫ້ສິນຄ້າທຸກປະເທດ ພຸ່ງສູງຂຶ້ນຢ່າງບໍ່ຢຸດຢັ້ງ.

ເມື່ອເປັນເຊັ່ນນັ້ນ ພວກເຮົາກໍຕ້ອງເປັນເຈົ້າການເອົາຕົວລອດ ດ້ວຍວິທີການ, ເງື່ອນໄຂ ແລະ ຄວາມສາມາດຂອງແຕ່ລະຄົນ, ແຕ່ລະຄອບຄົວ, ແຕ່ໂດຍລວມແລ້ວ ແມ່ນພ້ອມກັນປະຢັດມັດທະຍັດ:

1.ຫຼຸດຜ່ອນການໃຊ້ຈ່າຍສິ່ງທີ່ບໍ່ຈຳເປັນລົງ.
2.ຫຼຸດຜ່ອນການໄປມາຫາສູ່ກັນໃນກໍລະນີບໍ່ຈຳເປັນ ຫຼື ອາດຈະຫັນມາໃຊ້ລົດໄຟຟ້າ(ຖ້າມີເງື່ອນໄຂ) ເພື່ອປະຢັດພະລັງງານເຊື້ອໄຟຊ່ວຍກັນ.
3.ຫຼຸດຜ່ອນການຊຸມແຊວ ສ້າງສັນ ໃນວັນຕ່າງໆ
4.ເພີ່ມທະວີການປູກ ການລ້ຽງ ພາຍໃນຄອບຄົວໃຫ້ຫຼາຍຂຶ້ນ ເພື່ອເພິ່ງຕົນເອງ ກຸ້ມຕົນເອງ.
5.ບໍ່ຟຸມເຟືອຍໃນການໃຊ້ນໍ້າ, ໃຊ້ໄຟ ເພື່ອຫຼຸດຜ່ອນລາຍຈ່າຍ
6.ເຊີດຊູການຊົມໃຊ້ຜະລິດຕະພັນພາຍໃນໃຫ້ຫລາຍຂຶ້ນ ເພື່ອໃຫ້ເງິນໝູນວຽນຢູ່ພາຍໃນປະເທດ ຫຼີກເວັ້ນເງິນຕາໄຫຼອອກໄປຕ່າງປະເທດ ທັງເປັນການຊຸກຍູ້ສົ່ງເສີມການຜະລິດພາຍໃນຂອງລາວ ແລະ ຜູ້ອອກ ແຮງງານລາວໃຫ້ແຂງແຮງ.
7.ຢູ່ລາວຕ້ອງໃຊ້ຈ່າຍແຕ່ເງິນກີບ ເພື່ອໃຫ້ຄຸນຄ່າເງິນກີບເຂັ້ມແຂງຂຶ້ນ.
8.ສ້າງຄ່ານິຍົມລາວທ່ຽວລາວເພື່ອຊ່ວຍໜູນຊຶ່ງກັນແລະກັນ ທັງຫຼຸດຜ່ອນການຫຼັ່ງໄຫຼເງິນຕາອອກໄປຕ່າງປະເທດ

ຖ້າທຸກຄົນຊ່ວຍກັນເຊີດຊູຄວາມເປັນເຈົ້າການໃນການປະຢັດມັດທະຍັດດັ່ງທີ່ກ່າວມານັ້ນ ຄົງຈະເປັນການປະກອບສ່ວນສຳຄັນເຂົ້າໃນການປະຄັບປະຄອງໃຫ້ປະເທດຊາດຂອງພວກເຮົາຄ່ອຍໆຟື້ນຕົວກັບຄືນມາໄດ້ໃນລະດັບໃດໜຶ່ງ, ຊີວິດການເປັນຢູ່ຂອງປະຊາຊົນຈະໄດ້ຮັບການປັນປຸງໃຫ້ດີຂຶ້ນເປັນກ້າວໆ.