ລາວ-ກູບາ ເພີ່ມທະວີການຮ່ວມມືວຽກງານ ໄອຍະການປະຊາຊົນ ຜ່ານທາງລະບົບທາງໄກ

ວັນທີ 9 ມິຖຸນາ 2022, ສອງອົງການໄອຍະການປະຊາຊົນ ລາວ-ກູບາ ຈັດກອງປະຊຸມພົບປະທາງໄກ ນໍາໂດຍ ທ່ານ ນາງ ພອນເພັດ ອຸ່ນແກ້ວ ຄະນະບໍລິຫານງານພັກ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ທ່ານ ນາງ ລິສເນຍ ມາເລຍ ມີດີໂຣ ຕໍເລດ ຫົວໜ້າກົມ ຝ່າຍຄະດີອາຍາ ອົງການໄອຍະການສູງສຸດ ແຫ່ງ ສາທາລະນະລັດ ກູບາ ພ້ອມດ້ວຍຄະນະນໍາຂອງສອງປະເທດເຂົ້າຮ່ວມ ເພື່ອເພີ່ມທະວີການຮ່ວມມືວຽກງານໄອຍະການ.

ທ່ານ ນາງ ພອນເພັດ ອຸ່ນແກ້ວ ໄດ້ຍົກໃຫ້ເຫັນວ່າ: “ສປປ ລາວ-ສ ກູບາ” ຮ່ວມອຸດົມການອັນດຽວກັນສັງຄົມນິຍົມ, ຍາມໃດ ພັກ-ລັດ ແລະ ປະຊາຊົນສອງປະເທດ ລາວ -ກູບາ ຢູ່ຄົນລະທະວີບກໍຕາມ ແຕ່ເຄີຍມີມູນເຊື້ອອັນດີ ດ້ານການພົວພັນຮ່ວມມືກັນ ເເລະຊ່ວຍເຫລືອ ເຊື່ອໝັ້ນ ເຊິ່ງກັນ ແລະ ກັນໃນສະໄໝຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ ໂດຍພາຍໃຕ້ການນຳພາຂອງພັກປະຊາຊົນ ປະຕິວັດລາວ, ໃນເມື່ອກ່ອນພັກ-ລັດ ແລະ ປະຊາຊົນ ກູບາ ອ້າຍ-ນ້ອງໄດ້ຊ່ວຍເຫລືອປະຊາຊົນລາວ ໂດຍສະເພາະ ໄດ້ສົ່ງຜູ້ຊ່ຽວຊານ, ແພດໝໍມາຊ່ວຍປະຊາຊົນລາວໃນຍາມວິກິດ.

ມາຮອດປັດຈຸບັນ, ເປັນໄລຍະແຫ່ງການປົກປັກຮັກສາ ແລະ ພັດທະນາສ້າງສາປະເທດຊາດ ໄດ້ສືບຕໍ່ເສີມຂະຫຍາຍສາຍພົວພັນຮ່ວມມືລະຫວ່າງ ສປປ ລາວ ແລະ ສ ກູບາ ທີ່ມີມາແຕ່ດົນນານນັ້ນ ໃຫ້ນັບມື້ນັບຮັດແໜ້ນຍິ່ງຂຶ້ນ.

ໂອກາດນີ້, ສອງຝ່າຍໄດ້ແລກປ່ຽນບົດຮຽນໃນວຽກງານໄອຍະການປະຊາຊົນ, ການສະໜອງຂໍ້ມູນ-ຂ່າວສານ ທາງດ້ານກົດໝາຍ ໂດຍອີງໃສ່ບົດບັນທຶກຊ່ວຍຈໍາໃນປີ 2018 ແລະ ບົດໂຄງການຮ່ວມມືປີ 2022-2023 ໄດ້ລົງນາມຮ່ວມກັນ ເຊິ່ງເຮັດໃຫ້ການຈັດຕັ້ງປະຕິບັດໄດ້ສຳເລັດເປັນກ້າວໆ ແລະ ທັງເປັນການເພີ່ມທະວີການຮ່ວມມືວຽກງານໄອຍະການປະຊາຊົນຂອງສອງປະເທດ ໂດຍສະເພາະ ວຽກງານໄອຍະການປະຊາຊົນ ແຫ່ງ ສປປ ລາວ ໄດ້ຮັບການພັດທະນາດີຂຶ້ນ, ຮັບປະກັນການປະຕິບັດໜ້າທີ່ວຽກງານໄອຍະການມີປະສິດທິພາບ, ປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທໍາຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ເພີ່ມທະວີນິຕິກຳ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ຂ່າວ-ພາບ: ອອປສ