250 ຫົວໜ່ວຍທຸລະກິດຢູ່ເມືອງໄຊທານີ ນວ ຮັບຟັງການເຜີຍແນະນໍາຢູ່ໃນ ອມພ ແລະ ໂປຣແກຣມບັນຊີ

ໃນວັນທີ 9 ມິຖຸນາ 2022 ນີ້, ທີ່ສະໂມສອນໃຫຍ່ເມືອງໄຊທານີ ນະຄອນຫຼວງວຽງຈັນ (ນວ), ກົມສ່ວຍສາອາກອນ, ສ່ວຍສາອາກອນປະຈຳ ນວ ຮ່ວມກັບສ່ວຍສາອາກອນ ປະຈຳເມືອງໄຊທານີ, ໄດ້ເຄື່ອນໄຫວລົງເຜີຍ ແຜ່ແນະນໍາໃຫ້ບັນດາຫົວໜ່ວຍທຸລະກິດເປົ້າໝາຍເຂົ້າໃນລະບົບອາກອນມູນຄ່າເພີ່ມ (ອມພ) ແລະ ຕິດຕັ້ງການນໍາໃຊ້ໂປຣແກຣມບັນຊີທີ່ຕິດພັນກັບໃບເກັບເງິນ.

ໂດຍການເປັນປະທານຂອງທ່ານ ຄໍາພັນ ສຸລິຍະນັນ ຄະນະປະຈໍາພັັກເມືອງ, ຮອງເຈົ້າເມືອງໄຊທານີ, ທັງເປັນຜູ້ຊີ້ນໍາວຽກງານເສດຖະກິດ, ມີຄະນະຮັບຜິດຊອບການເຜີຍແຜ່ຈາກກົມສ່ວຍສາອາກອນ ກະຊວງການເງິນ, ສ່ວຍສາອາກອນ ປະຈຳນະຄອນຫຼວງວຽງຈັນ (ນວ), ມີຮອງຫົວໜ້າຫ້ອງການ-ການເງິນເມືອງໄຊທານີ, ຫົວໜ້າສ່ວຍສາອາກອນປະຈໍາເມືອງໄຊທານີ, ພະນັກງານວິຊາການສ່ວຍສາອາກອນປະຈໍາເມືອງ, ພ້ອມດ້ວຍບັນດາຫົວໜ່ວຍທຸລະກິດເປົ້າໝາຍເຂົ້າຮ່ວມ.
ທ່ານ ຄໍາພັນ ສຸລິຍະນັນ ໄດ້ມີຄໍາເຫັນກ່າວເປີດກອງປະຊຸມຄັ້ງນີ້ວ່າ: ດັ່ງທີ່ຮູ້ນຳກັນແລ້ວວ່າວຽກງານຂະແໜງການເງິນ ໂດຍສະເພາະວຽກງານສ່ວຍສາອາກອນແມ່ນມີຄວາມໝາຍສຳຄັນ, ຊຶ່ງປັດຈຸບັນພັກ-ລັດຖະບານໄດ້ບັນຖືເອົາວຽກງານດັ່ງກ່າວເປັນວາລະແຫ່ງຊາດ ແລະ ໃນຂົງເຂດສ່ວຍສາອາກອນກໍ່ໄດ້ມີການປັບລຸດອັດຕາອາກອນເປັນຕົ້ນ: ອາກອນກຳໄລຈາກ 24% ມາເປັນ 20%, ອາກອນມູນຄ່າເພີ່ມຈາກ 10% ມາເປັນ 7% ເຮັດໃຫ້ລາຍຮັບງົບປະມານສູນເສຍໄປ.
ສະນັ້ນ, ເພື່ອແທນຄືນລາຍຮັບດັ່ງພັກ-ລັດຖະບານ, ຈຶ່ງໄດ້ວາງນະໂຍບາຍເພີ່ມຖານລາຍຮັບສ່ວຍສາອາ ກອນຂຶ້ນເປັນຕົ້ນແມ່ນຫົວໜ່ວຍທຸລະກິດໃຫ້ເຂົ້າສູ່ລະບົບອາກອນມູນຄ່າເພີ່ມ, ເພາະວ່າລາຍຮັບຈາກອາກອນມູນຄ່າເພີ່ມແມ່ນກວມເອົາເປີເຊັນສູງກວ່າໝູ່ຂອງລາຍຮັບສ່ວຍສາອາກອນທັງໝົດ.

ດັ່ງນັ້ນ, ຂົງເຂດການເງິນ-ສ່ວຍສາອາກອນ, ໄດ້ມີການປັບປຸງກົດໝາຍລະບຽບການຕ່າງໆ…ທີ່ຕິດພັນເປັນ ຕົ້ນກົດໝາຍສ່ວຍສາອາກອນ 4 ສະບັບຄື: ກົດໝາຍວ່າດ້ວຍການຄຸ້ມຄອງວຽກງານສ່ວຍສາອາກອນ, ກົດໝາຍວ່າດ້ວຍການຊົມໃຊ້, ກົດໝາຍວ່າດ້ວຍອາກອນມູນຄ່າເພີ່ມ ແລະ ກົດໝາຍວ່າດ້ວຍອາກອນລາຍໄດ້, ເພື່ອເປັນອີງໃນການຈັດຕັ້ງປະຕິບັດ, ກະຕຸກຊຸກຍູ້ ແລະ ສ້າງທ່າແຮງໃຫ້ງົບປະມານແຫ່ງລັດເຮັດໃຫ້ວຽກງານໃນຂົງເຂດລາຍຮັບໃຫ້ມີລັກສະນະເພີ່ມຂຶ້ນ ແລະ ລາຍຈ່າຍກໍ່ໃຫ້ມີລັກສະນະປະຢັດ.

ກອງປະຊຸມເຜີຍແຜ່ແນະນໍາໃຫ້ບັນດາຫົວໜ່ວຍທຸລະກິດເປົ້າໝາຍເຂົ້າໃນລະບົບອາກອນມູນຄ່າເພີ່ມແລະ ຕິດຕັ້ງການນໍາໃຊ້ໂປຣແກຣມບັນຊີທີ່ຕິດພັນກັບໃບເກັບເງິນ, ແມ່ນເພື່ອບັນດາຫົວໜ່ວຍທຸລະກິດເປົ້າໝາຍເຂົ້າໃຈກຳແໜ້ນຮັບຮູ້ເຂົ້າໃຈເລິກໃນການເຂົ້າສູ່ລະບົບອາກອນມູນຄ່າເພີ່ມ, ລວມທັງຮູ້ກ່ຽວກັບສິດ-ໜ້າທີ່ຂອງຜູ້ຢູ່ໃນລະບົບ ອມພ, ເຫັນໄດ້ສິດ-ໜ້າທີ່, ຜົນປະໂຫຍດຂອງການເຂົ້າໃນລະບົບອາກອນມູນຄ່າເພີ່ມ, ການອອກໃບເກັບເງິນ, ການສະຫຼຸບບັນຊີໂດຍຜ່ານໂປຣແກຣມບັນຊີ, ແນະນໍາໃຫ້ຮູ້ໄດ້ເຖິງຫົວໜ່ວຍຈຸນລະວິສາຫະກິດ, ຫົວໜ່ວຍຂະໜາດນ້ອຍ ແລະ ກາງໃນການເຂົ້າລະບົບອາກອນມູນຄ່າເພີ່ມທີ່ຈະໄດ້ຮັບນະໂຍບາຍອັດຕາອາກອນກຳໄລ ນໍາອີກດ້ວຍ.

ສຳລັບເປົ້າໝາຍຫົວໜ່ວຍທຸລະກິດທີ່ເຂົ້າຮ່ວມຮັບຟັງຄັ້ງນີ້ມີທັງໝົດ 250 ຫົວໜ່ວຍ, ໂດຍໄດ້ແບ່ງ ອອກເປັນ 2 ເທື່ອ. ສະນັ້ນ, ມັນຈຶ່ງຮຽກຮ້ອງໃຫ້ຫົວໜ່ວຍທຸລະກິດທີ່ເຮັດໜ້າທີ່ແທນພາກລັດໃນການເກັບອາກອນມູນຄ່າເພີ່ມຈາກຜູ້ຊົມໃຊ້ສິນຄ້າ ແລະ ບໍລິການ, ໄດ້ປະຕິບັດສິດ-ໜ້າທີ່ຂອງຜູ້ຢູ່ໃນລະບົບອາກອນມູນຄ່າເພີ່ມຢ່າງຖືກຕ້ອງໂດຍສະເພາະແມ່ນການແຈ້ງ-ມອບ, ການນຳໃຊ້ໃບເກັບເງິນ ແລະ ການຖືບັນຊີໃຫ້ຖືກຕ້ອງ ແລະ ສອດຄ່ອງຕາມກົດໝາຍກຳນົດ, ເພື່ອຮັບປະກັນການຈັດຕັ້ງປະຕິບັດການເຂົ້າໃນລະບົບອາກອນມູນຄ່າເພີ່ມຢ່າງມີປະສິດທິຜົນເປັນການປະກອບສ່ວນເຂົ້າໃນການສ້າງສາພັດທະນາປະເທດຊາດ ນໍາອີກດ້ວຍ.