ລີເວີພູລ ບັນລຸຂໍ້ຕົກລົງສ່ວນຕົວກັບ ດາວິນ ນູນເຢສ ຮຽບຮ້ອຍແລ້ວ

‘‘ The Athletic ’’ ສື່ຊັ້ນນຳລາຍງານວ່າ : ລີເວີພູລ ສາມາດບັນລຸຂໍ້ຕົກລົງສ່ວນຕົວກັບ ດາວິນ ນູນເຢສ ກອງຫນ້າຂອງສະໂມສອນ ເບນຟີກາ ຮຽບຮ້ອຍແລ້ວ ແຕ່ຍັງບໍ່ມີການເຊັນສັນຍາ ລວມເຖິງການຕົກລົງກັນລະຫວ່າງ 2 ສະໂມສອນ.

ໂດຍ ນູນເຢສ ຄືເປົ້າຫມາຍອັນດັບຫນຶ່ງຂອງ ລີເວີພູລ ແລະ ເຈີເກັນ ຄລອບ ສຳລັບການເສີມທີມໃນຕະຫລາດລະດູການນີ້ ຫລັງພວກເຂົາກຽມປ່ອຍຕົວ ຊາດີໂອ ມາເນ ກອງຫນ້າຄົນສຳຄັນອອກຈາກທີມ.

ຈົນຫລ້າສຸດ ເຈມ ພຽສ ນັກຂ່າວຄົນດັງຂອງ ສື່ດັ່ງກ່າວຂອງອັງກິດລະບຸວ່າ : ລີເວີພູລ ຫຍັບເຂົ້າໃກ້ໃນການເຊັນສັນຍາກັບ ນູນເຢສ ເຂົ້າໄປອີກຂັ້ນຫນຶ່ງ ຫລັງພວກເຂົາສາມາດບັນລຸຂໍ້ຕົກສ່ວນຕົວໃນເລື່ອງຄ່າເມື່ອຍ ແລະ ໄລຍະສັນຍາກັບດາວຍິງອາຍຸ 22 ປີ ລາຍນີ້ໄດ້ແລ້ວ.

ຫລ້າສຸດມີລາຍງານເພີ່ມວ່າ ຍັງບໍ່ມີການເຊັນສັນຍາກັບນັກເຕະ ລວມເຖິງ ລີເວີພູລ ແລະ ເບນຟີກາ ກໍຍັງບໍ່ມີຂໍ້ຕົກລົງໃດໆໃນ ການຊື້ຂາຍ ນູນເຢສ ດັ່ງກ່າວທີ່ຄາດວ່າຈະມີມູນຄ່າລວມກວ່າ 100 ລ້ານຢູໂຣ.

ສຳລັບ ນູນເຢສ ສ້າງຜົນງານໄດ້ຫນ້າປະທັບໃຈຢ່າງຫລາຍໃນລະດູການຜ່ານມາ ລາວຍິງໄດ້ເຖິງ 34 ປະຕູ ຈາກການລົງສະຫນາມ 41 ນັດລວມທຸກລາຍການ.