ຜູ້ວ່າການທະນາຄານແຫ່ງ ສປປ ລາວ ເນັ້ນແຂວງອຸດົມໄຊ ເອົາໃຈໃສ່ຄຸ້ມຄອງລາສິນຄ້າ, ການແລກປ່ຽນເງິນຕາ ແລະ ແກ້ໄຂບັນຫາເງິນເຟີ້

ວັນທີ 8 ມິຖຸນາ 2022 ນີ້, ທ່ານ ສອນໄຊ ສິດພະໄຊ ກຳມະການສູນກາງພັກ ຜູ້ວ່າການທະນາຄານແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມເຮັດວຽກຢູ່ແຂວງອຸດົມໄຊ ແລະ ໄດ້ພົບປະໂອ້ລົມແລກປ່ຽນຄວາມຄິດເຫັນກັບບັນດາທະນາຄານທຸລະກິດ ແລະ ພະນັກງານຫຼັກແຫຼ່ງຂອງທະນາຄານແຫ່ງ ສປປ ລາວ ພາກເໜືອແຂວງອຸດົມໄຊ.

ທ່ານ ສອນໄຊ ສິດພະໄຊ ໄດ້ເນັ້ນໃຫ້ບັນດາທະນາຄານທຸລະກິດຄື:
– ເອົາໃຈໃສ່ໃນການຄຸ້ມຄອງການໝູນວຽນຂອງເງິນໃນແຕ່ລະໄລຍະ
– ເອົາໃຈໃສ່ຄຸ້ມຄອງສິນເຊື່ອໃຫ້ກຸ່ມເປົ້າໝາຍຢ່າງມີຄຸນນະພາບ ແລະ ຮັບປະກັນດ້ານຄວາມສ່ຽງໃຫ້ດີ
– ຄຸ້ມຄອງການແລກປ່ຽນເງິນຕາ ຕາມຈຳນວນທີ່ທະນາຄານກາງກຳນົດໄວ້ໃຫ້ໄດ້
– ເອົາໃຈລະດົມທຶນພາຍໃນ ແລະ ນຳໃຊ້ທຶນດັ່ງກ່າວເຂົ້າໃນການສົ່ງເສີມທຸລະກິດຕ່າງໆພາຍໃນແຂວງໃຫ້ເຂັ້ມແຂງ
– ກຳນົດ ແລະ ຕິດປ້າຍລາຄາສິນຄ້າເປັນສະກຸນເງິນກີບ
– ລົງຕິດຕາມກວດກາຢູ່ບັນດາທ້ອງຕະຫຼາດຢ່າງເປັນປົກກະຕິ ເພື່ອຕອບໂຕ້ກັບບັນຫາເງິນເຟີ້

ພ້ອມນີ້ທ່ານຍັງໄດ້ອະທິບາຍໃຫ້ເຂົ້າໃຈກ່ຽວກັບບັນຫາເງິນເຟີ້, ຍ້ອນການນຳເຂົ້າສິນຄ້າຈາກຕ່າງປະເທດ, ຕົ້ນທຶນການຜະລິດ, ການຂົນສົ່ງ ແລະ ອື່ນໆ.

ສະນັ້ນ, ຮຽກຮ້ອງໃຫ້ບັນດາທຸລະກິດເອກະຊົນຈົ່ງຊ່ວຍກັນສະໜອງທຶນກັບບໍລິສັດ ຫຼື ກຸ່ມຜູ້ຜະລິດທີ່ມີຄຸນນະພາບ ພ້ອມທີ່ຈະພັດທະນາຢ່າງກະໂດດ, ເພື່ອໃຫ້ມີສິນຄ້າສົ່ງອອກ ຈຶ່ງສາມາດດຶງເອົາເງິນຕາຕ່າງປະເທດເຂົ້າມາພັດທະນາປະເທດເຮົາ.